shadow
Diocese de Dili > NOTÍCIAS > LETURA DIÁRIA > IMI MASIN RAI NIAN

IMI MASIN RAI NIAN

Primeira Leitura: Lia housi Livro profeta Isaias (Is.58,7-10)

Maromak dehan nune’e:”Fahe ó nia ai-han ba ema nebé hamlaha; fó uma ba ema ki’ak, sira nebé horik fatin la iha; fó hena ba ema nebé ó haré la’o luan; keta fila kotuk ba ó nia maluk. O halo hanesan ne’e, ó nia naroman sei mosu hanesan rai-hun mutin; ó nia kanek la kleur de’it sei sai di’ak; ó nia justiça sei la’o uluk iha ó nia oin; iha ó nia kotuk, Maromak nia gloria la’o tuir ó. O bolu karik, Maromak sei hatán: “Ha’u mak ne’e”.

O soe tiha karik buat fo terus, buat halo ta’uk, lia-fuan kro’at, ó fo karik buat nebé ó nian ba ema hamlaha; ó fo han karik ema nebé ki’ak, ó nia naroman sei nabilan iha nakukun laran, ó nia kalan sei sai hanesan loron fahe-rua.”

Maromak Futar Lia.

 

Salmo Responsorial Sal.111(112),4-5. 6-7. 8a. 9

Refrão:Ema laran mos hetan áhi oan ida

Lakan iha nakukun laran. Repete-se

Iha nakukun laran áhi ida sei naroman

Ba ema sira be laran mós, liman mós,

Laran luak no laran di’ak.

Rahun di’ak ba ema nebé laran di’ak,

Empresta, fahe lolós nia riku-soin. Refrão

Ema laran mós tuba rai metin,

Ema temi nafatin nia naran;

Nia ta’uk lia susar,

Nia laran metin iha Maromak.Refão

Nia la tauk buat ida

Nia fahe riku-soi ba kiak sira.

Nia naran boot nafatin,

Nia kbiit boot nafatin. Refrão

 

Segunda Leitura:

Lia housi são Paulo nia surat Ba sarani sira iha Corinto (1Cor.2, 1-5).

Maun alin sira: Uluk, ha’u ba buka imi, laós hodi lia-fuan di’ak nian, ka matenek boot nian, mak ha’u ko’alia ba imi, kona ba Maromak nia Misterio, lae. Ha’u hanorin, iha imi leet, ha’u la hatene buat ida, ha’u hatene de’it mak Cristo Jesus, Cristo Jesus nebé hedi iha cruz. Ha’u to’o tiha imi leet, ha’u kbiit la iha, ha’u ta’uk, ha’u nakdedar tebes duni. Ha’u ko’alia, ha’u hanourin, la’os hodi lia matenek nian, maibé hodi Espirito Santo nia kbiit. Ne’e duni, imi nia fiar hari metin, laós housi matenek ema nian. Maibé hodi Maromak nia kbiit.

Maromak futar lia.

 

Aclamação Jo. 8, 12

Refrão; Aleluia. Repete-se

Ha’u mak roman mundo nian:

Se tuir ha’u sei hetan roman. Refrão

Evangelho: Na’i Jesus Cristo nia Evangelho Nu’udar são

Mateus haktuir (Mt. 5, 13-16)

Iha tempo nebé, Jesus lia tun ba Eskolante sira: “imi masin rai nian. Maibé, masin lakon karik nia meer, nia hameer ai-han oin sá? Nia la soy ona ba buat ida; nia soy de’it atu soe ba liur, ema atu sama. Imi mundo nia naroman, Cidade nebé harí iha foho leten, la bele subar-an; áhi–oan sunu, laós atu atu tau iha fatin okos, maibé, atu tau iha fatin aas, hodi leno ema hotu iha uma laran. Imi nia naroman sei nabilan mos hanesan ne’e iha ema sira oin, atu sira haré buat di’ak imi halo, sira hahí imi nia Aman iha lalehan”. Lia Maksoyn.

 

Leave a Reply

Your email address will not be published. Required fields are marked *