shadow
Diocese de Dili > NOTÍCIAS > OPINIÃO > Kiak barak iha Timor tamba ema laiha ethos of work (ética de trabalho)

Kiak barak iha Timor tamba ema laiha ethos of work (ética de trabalho)

Agostinho Piedade Babo

(Estudante iha ISFIT Fatumeta-Dili).

Ita hotu hatene no kaer metin hela princípiu funda mental ita nia luta ba ukun-an nian katak atu ita be moris iha colonialista nia okos durante tinan 450 nia laran no ocupação Indonésia nian durante tinan 24 nia laran, tenki liberta-an husi “mentalidade colonizada” atu bele hadia ita nia ekonomia ho objetivo atu reduz ita nia pobreza no halakon miséria ka mukit no beik iha ita nia rai doben Timor Leste. Entretanto, ita nia realidade hatudu sai katak iha era independência durante tinan 14 nia laran ne’e ita sei enfrenta hela nafatin kiak no mukit iha área hot-hotu. Atu hela concreto liu tan, ita consciente hela katak ema barak mak seidauk moris ho dignidade, katak, seidauk iha hela fatin ida adequada, labarik barak mak ladauk hetan edukasaun proporcional, jovem barak mak sei hasouru nafatin hela dezemprego, no hetok liu tan, ema barak mak sei halerik nafatin hela kona ba bé-mós,estrada, eletricidade, saúde no edukasaun. Pergunta bo’ot nebé desafia ukun na’in sira no componente sociedade civil tomak mak: tamba sá mak povo barak sei hela nafatin iha situasaun kurian no mukit nia laran? Halo oin sá mak ita bele liberta ema sai husi situação kiak no mukit atu ema hot-hotu bele iha direito atu goza riku-soin Timor nian ho liberdade, responsabilidade no Iha artigu ne’e hakerek na’in hakarak foti Platão nia hanoin nebé dehan:”Nasaun la’o diak,ema hotuhotu moris iha ekonomia nebé sustentável wainhira ema filósofo sira mak kaer ukun”. Platão iha nia hanoin dehan katak só filósofo sira de’it mak hatene saida mak lialos no oinsa mak ema hotu bele hetan felicidade. Wainhira ema moris iha felicidade significa katak ema hotu moris iha ekonomia nebé sustentável no laiha tan kiak no mukit barak iha sociedade.Ne’e hakarak dehan katak existe ema kiak maibé existe ho númeru ida reduzido. Iha tempu Grecia antiga nian, ema grego sira fahe sociedade ba classe importante tolu: filósofo, militar no negociante. Maibé ba sira ida nebé soin atu kaer nasaun mak filósofo de’it. Ema hotu-hotu nebé kaer ukun tenke ema filósofo ida. Ema filósofo sira de’it mak hatene no estuda kona ba lialos no justiça, tan ne’e, sira de’it mak hatene kona ba saida mak”Bonum Commune”. Ho hanoin ida ne’e, ita bele dehan katak, iha Timor ema sei moris iha situasaun kiak no mukit tamba ema sira nebé kaer kbiit no hala’o knaar ukun nian la fo

importância ba bem comum. Atu reduz pobreza ka kiak iha ita nia rain preciza estuda husi experiência nebé uluk ema grego sira hatudu hela no ita mos tenke uza princípio nebé sira uza atu bele alcança prosperiedade iha parte hotu-hotu nebé ita iha. Por exemplo: parte administrativa, ekonómica finanseira, saúde, edukasaun nebé adequadu hodi reduz desempregu iha rai laran. Mentalidade Timor oan nian sei belit metin hela ba fini a’at nebé Indonesia sira kari hela. Katak sei buras hela iha sociedade Timor nia le’et trilogia Corupção,Colusão no Neopotismo (KKN). Hahalok ne’e mak ita nia Ex- Primeiro Ministro no atual Ministro Planeamento Estratégico Sr. Kay Rala Xanana Gusmão hanaran “Naoksaun”.

Hahalok ne’e mosu tamba ema seidauk iha “ethos of work” katak, molok servisu tenke hetan uluk osan. Molok atu halo servisu ema husu uluk osan. Sosa uluk kareta, halo uluk uma. Uluk seidauk sai membro governo uma at hela, sae hela motor. Foin sae membro governo fulan ida, uma halo ona iha Bali, iha Portugal. Kareta foun HUMMER iha ona uma oin. Ema la servisu atu dignifica nia a’an nu’udar ema, maibé osan mak dignifica nia. Haluha tiha ema seluk nebé sei moris hela iha susar no hamlaha nia laran. La sente krize nebé ema ki’ik sira hasouru hela.

Ethos of work katak ema servisu maka’as mak bele hetan osan no servisu tenki tuir horário no tempu nebé iha. Maibé, realidade hatudu katak ema barak mak la servisu ho rigorosidade tuir oras nebé estipulado iha instituisaun hanesan vigora nanis kedas iha lei funsaun pública nian. Funcionário barak lorloron ba kantor halimar de’it  “Game” mos ful-fulan simu salário estável, lor-loron uza kareta estadu nian pasiar ba-mai estável. Koitadu ba ema ki’ik, kiak no beik sira be la’o ain ba-mai bilan hela. Ai-han la to’o ba sira, oan kiak sira nebé lakon aman-inan iha funu laran ohin loron moris abandonado lahetan educação no moris iha dalan ninin (marginalizado). Eskola balun iha foho aluno sira sei tur hela iha rai, laiha kondisaun ba aprendizagem nebé diak no soin ba sira nia idade. Ema moras sira sei kuran hela aimoruk, falta de ambulância, ema sei halerik kona ba estrada, eletricidade, bé mos, até iha Dili laran mos ema sei konsumo hela mota no udan ben. Iha contexto ida hanesan ne’e, ita assiste membro Parlamento sira, ho consciência cauterizada, aprova lei pensão vitalícia no tinan-tinan, hodi povo nia naran, aprova orçamento ho montante milhões ba biliõesho razão fundamental katak atu hatan ba necessidade povo nian,maibé,iha realidade, ninia rezultado mak povo hela mukit no halerik nafatin. Kiak ba nafatin, edukasaun kudeik ba nafatin. Na’iulun sira kakorok lotuk no uza osan povo nian hodi sosa kareta Hummer, Pajero no Prado luxo-luxo nian sa’e pasiar ba-mai enquanto povo ki’ik sira virus mal-nutrisaun nian contamina ba bebeik no hemu de’it mak rai-rahun iha luron ibun sira. Wainhira mak reduz pobreza iha Timor se enquanto hahalok sira ne’e la halakon husi autoridade sira nebé kaer poder no ukun? Fila fali ba ema grego sira nia teoria katak precisa tau ema nebé matenek no filósofo iha cadeira ukun nian atu, nune’e, ema hotu bele moris diak, hetan edukasaun diak, iha acesso ba informasaun rai laran no liur, saudável hodi goza duni independência nebé durante kolonializmu nia tempuTimor oan sira mehi no aspira hela de’it.

Ita bele halo komparasaun ki’ik ida kona ba governasaun rua, por exemplu Atambua hanesan distrito ida nebé iha nia populasaun liu milhão rua ba leten nebé lidera husi administrador distrito (Bupati) ida, membru DPRD sanulu resin, administrador sub-distrito (Camat) ha’at ka lima iha nebá hamutuk ho chefe suco no chefe aldeia lubuk ida bele lidera no ukun populasaun milhão rua resin ne’e. Ita iha Timor iha órgão ha’at: Presidente República ho Assessores no directores sira nebé besik rua nulu resin, Tribunal nebé composto husi Presidente no diretores sira, Parlamentu Nacional nebé iha Membro 65, Governu nebé composto husi membro governante 55, directores regional no distrital lubuk ida. Kada tinan hasai orçamentoho montante nebé bo’ot kompara ho Indonesia nian nebé ki’ik maibé povo bele hetan benefisiu iha edukasaun, saúde, infra-estrutura, ekonomia, saneamento nst.

Wainhira los mak ita bele reduz kiak no mukit iha rai Timor? Uluk wainhira ita nia ex-presidente RDTL Dr. José Ramos Horta iha nia campanha eleitoral nia promete ba povo katak nia sai presidente ba ema kiak sira no nia esforço maka’as atu combate pobreza iha Timor Leste. Maibé solusaun ikus mak sei existe nafatin ema kiak no mukit.

Posted in:
Articles by:
Published:

Leave a Reply

Your email address will not be published. Required fields are marked *