shadow
Diocese de Dili > NOTÍCIAS > LETURA DIÁRIA > DOMINGGO I QUARESMA

DOMINGGO I QUARESMA

DOMINGGO I QUARESMA

ANO A

 

Primeira Leitura (Gén. 2, 7-9; 3, 1-7)

 Lia husi Livro Génesis:

Na’i Maromak halo ema ho rai-rahun. Nia huu íis ida, moris nian, housi ema ínus; nune’e, ema sai buat moris ida. Na’i Maromak kuda toos ida iha Edén, iha oron-sa’e; Nia tau, ema nebé Nia halo, iha nebá. Maromak halo moris ai-horis oin-oin, fuan mesak furak, di’ak atu han; Ai-horis moris nian iha toos klaran no mos ai-horis hatene di’ak no hatene aat nian. Balada sira hotu nebé Na’I Maromak halo, samean mak laran kman liu atu bobar. Samean dehan ba feto: “Tebes ka? Maromak dehan ba imi: imi labele han ai-fuan hirak iha toos laran ne’e”? Feto hátan ba samean: “Ami bele han ai-fuan hirak nebe iha toos laran. Maibé, kona ba ai-fuan nebé iha toos klaran Maromak dehan mai ami: imi keta han nia; kona de’it mos labele. Keta halo ii mate”. Samean hátan ba feto: “ Lae ida! Imi sei la mate. Maromak hatene katak, wainhira imi han ai-fuan ne’e, imi nia matan nakloke, imi sei hanesan Maromak, imi hatene diak no aat”. Feto haré ba ai ne’e nia fuan diak tebes atu han, matan kan, ai diak ida atu fo matenek. Nia ku’u ai-fuan ba han; hafoin nia fó ba nia laen nebé hamutuk ho nia; nia laen mos han; sira naín rua nia matan nakloke, sira hatene katak, siran nia isin tanan. Tan ne’e sira suku ai figueira tahan, hodi taka an.

Maromak Futar Lia.

 

Salmo Responsorial (Sal. 50 (50), 3-4. 5-6ª. 12-13. 14-17)

Refrão: Na’i ami sala! Hanoin ami! Repete-se

Na’i, sadia ami, tan Ita laran di’ak,

tan ita laran luak kasu ami salan;

hamós ha’u nia hahalok aat,

kasu ha’u nia salan hotu.     Refrão

 

Ha’u fihir ba ha’u salan,

ha’u salan hetan nafatin iha haú oin.

Na’i, ha’u salan hasoru Ita,

ha’u halo salan iha Ita oin. Refrão

 

Maromak, haraik neon foun mai ha’u,

halo ha’u klamar nabilan.

Keta soe ha’u housi Ita futar oin,

Keta hadook ha’u housi Ita neon. Refrão

 

 

Segunda Leitura (Forma longa) Roma. 5, 12-19

  Lia housi São Paulo nia surat

 ba sarani sira iha Roma    

 Maun- alin sira: salan tama iha mundo hodi ema ida de’it: housi salan tama mate. Nune’e mata tama iha ema hotu-hotu, basá, ema hotu sala. Houri uluk too Moises nia Lei, mundo iha salan. Maibé , mate iha kedas ona, husi Adão to’o Moises, ba mos sira nebé la sala hanesan Adão; Adão, Jesus Cristo nebé atu mai ne’e nia ilas. Maibé, tulun la simu leet hanesan salan. Tan ema ida de’it nia salan, ema barak hetan aat. Maibé, Maromak nia graça liu tan fali: ho ema ida de’it – Jesus Cristo, nia tulun ema wa’in tebes hetan di’ak. Tulun ne’e  la hanesan salan ema ida de’it nian: salan mesak ida ne’e, lori ema ba terus; maibé, tulun simu leet, nebé mai tuir salan barak, lori ba di’ak. Tan ema mesak ida nia salan, mate tama housi ema mesak ne’e; liu tan fali; ema sira nebé simu graça barak no tulun justiça nian, sei hetan moris housi ema ida mesak, Jesus Cristo. Tan ema mesak ida nia salan, susar mai to’o hotu; nune’e mos, hodi hahalok di’ak ema mesak ida nian, ema hotu hetan di’ak nebé fó moris. Tan ema ida mesak lakohi halo tuir, ema batrak sai maksalak; nune’e mos, tan ema mesak ida halo tuir, ema barak sai lós.

 

Segunda Leitura (Forma breve) Rom. 5, 12. 17-19

Lia housi São Paulo nia surat

ba sarani sira iha Roma:

Maun-Alin sira: Housi ema ida de’it, salan tama iha mundo; housi fali salan, tama mate. Nune’e, mate tama iha ema hotu, basá, sira hotu sala. Tan ema ida mesak nia salan,, mate mai housi ema mesak ida ne’e; lós liu tan fali, sei hetan moris ema sira nebé simu graça barak no tulun justiça nian, housi ema ida mesak, Jesus Cristo. Hanesan, housi ema mesak ida nia salan, susar mai to’o ema hotu, nune’e mos, housi ida mesak nia hahalok di’ak, ema barak nebé hetan di’ak nebé fó moris. Hanesan, tan ema ida de’it la halo tuir, ema barak sai maksalak, nune’e mos, tan ema ida de’it halo tuir, ema barak sai lós.

Maromak Futar Lia.

 

Aclamação (Mt. 4,4b)

 Refrão: Ami hahí Cristo, Maromak nia lia-fuan. Repete-se.

La moris de’it ho ai-han,

Maibé, ho liafuan nebé mai housi Maromak. Refrão

 

Evangelho (Mt. 4,1-11)

Na’i Jesus Cristo nia Evangehlo

nu’udar São Mateus haktuir:

iha tempo nebá, Espírito Santo lori Jesus ba rai-fuik maran atu Demónio babeur Nia. Jesus halo Jejum loron hatnulu, kalan hatnulu, liu tiha Nia hamlaha. Babeur-na’in hakbesik ba Nia, hodi dehan: “Ó Maromak Oan sá, dehan ba fatuk hirak ne’e, atu sira nakfilak ba pão”. Jesus dehan ba nia: “Hakerek nanis ona, ema la moris ho ai-han de’it, maibé, ho lia-fuan sira hotu, nebé sai housi Maromak Futar ibun”. Demónio lori Nia ba tau tiha iha templo tutun, dehan: “Ó Maromak Oan sá, soe-An to’ok ba kraik. Basá, hakerek nanis ona: Maromak sei hanorin Nia Anjo sira, kona ba Ó, sira sei simu Ó iha sira liman, keta halo Ó nia ain baku ba fatuk ruma”. Jesus hátan dehan: “Hakerek mos nanis ona: keta babeur ó nia Na’in, ó nia Maromak”. Demónio lori fali Nia ba foho aas teb-tebes ida; hatudu tiha reono hotu-hotu mundo nian, hamutuk ho nia riku-soin, nia dehan: “Ha’i fó buat sira ne’e hotu ba Ó, karik Ó hakneak, adora ha’u”. Jesus hátan: adora de’it ó nia Na’in, ó nia Maromak; ba Nia mesak de’it mak ó hasa’e ó nia hamulak”. Nune’e, Demónio husik tiha Nia. Anjo sira mai kedas serbí Jesus.

Lia Maksoyn.

Leave a Reply

Your email address will not be published. Required fields are marked *