shadow
Diocese de Dili > NOTÍCIAS > Notícias > PAZ NO ESTABILIDADE RAI IDA NE’E NIAN IHA ITA HOTU NIA LIMAN

PAZ NO ESTABILIDADE RAI IDA NE’E NIAN IHA ITA HOTU NIA LIMAN

DCDD DILI – Quinta Feira 2 de Março 2017, (02:00) Htl, liburan hamutuk sarani Timor oan hodi participa iha Jornada da Paz nebé Comissão Justiçã e Paz Diocese Dili nian prepara hodi ba hasoru festa Democratico nebé mak sei halao iha tempo badak ne’e. Iha evento ne’e participa housi Líder Igreja, Governo, Organisação Sociadade Civil, Político nain sira, PNTL, F-FDTL, Organização Intercional no sarani sira hahú housi katuas eh ferik labarik eh klosan.

Dom Virgilio iha nia intervenção hateten: Uluk nanain ita agradece ba Maromak nebé housi kedas ona mundo ne’e hahú mai to’o ohin, haburas no hametin nafatin, hamatak nafatin mundo ho nia Espírito dame ne’e nian. Ohin ita mos hakarak agradece mos ba ita nia matebian Dom Alberto Ricardo ba nia iniciativa mak hahu kedas ona iha fulan Maio iha 1999 wainhira nu’udar Reitor Seminário Ano Espiritual halo ona Oração da Paz nebé lao housi Igreja Catedral liu housi Matadoru, Balide, Culuhun, Bidau no ikus tama iha Lecidere, hamutuk ho Seminarista no sarani sira reza terço iha liman hodi harohan ba Paz. Iha 2006, nu’udar Bispo halao Jornada kiik ida ho naran: “Movimento Ação la Violéncia” hodi lao housi Igreja Catedral ba to’o Santa Cruz hodi hatudu ba mundo katak Timor la’os centro comflito, maibé, centro ba Dame. Iha tinan 2012, hamutuk ho Comissão Justiça e Paz halao Jornada da Paz no lao housi Aimutin mai to’o Lecidere ho tema “Muda ó nia Fuan Muda Mundo”.

Dom Virgilio haktuir tan katak: Espírito ida ne’e mak ohin lori ita hotu atu halibur hamutuk atu hametin liu tan compromisso ida ne’e ho tema: “Muda ó nia fuan Muda Timor”. Ita bele husu ba ita nia an; tamba sá mak ita preucupa ho Dame. Beato Paulo VI iha primeira Dia Mundial da Paz ba sarani nune’e mos ba ema nebé la’os sarani nia dehan nune’e: “Paz mak único diração ba progresso, conquista la’os ho Violéncia”. Papa Francisco celebra Dia Mundial da Paz tinan ne’e nia dehan: “Não Violéncia mak istilo política Dame nian”. Papa Emérito Bento XVI dehan: Não Violéncia la’os tática ida iha ita ema nia comportamento, maibé, ita nia maneira de ser pessoa atitude nebé comvencido kona ba Maromak nia domin iha nia an no iha ninia moris”. Los duni maluk doben sira, ita hatu hatene didiak katak; Paz mak dalan ba desemvolvimento no estabilidade nação ida nian.

Dom Virgilio hateten: Ohin ita mai hamutuk iha ne’e, hatudu katak Timor oan no sarani hotu hakarak atu Paz mak ukun ita nia fuan no Paz mak tenki sai abut no fundamento ba rai doben ida ne’e, nebé terus barak ona hakarak atu moris nafatin iha hakmatek laran. Povo ida nebé hafoin nia Ukunan rasik lakohi tan ona violéncia no hakribit tiha ona violéncia ho nia motto nebé dehan: “Adeus Violéncia Bemvindo ba Paz”. Finalidade ita nia halibur hamutuk ohin atu renova ita Timor oan hotu nia comprimisso ba dame liu-liu iha momento nebé ita nia rain atu halo tan hostória foun ida liu housi celebração Democracia. Festa da Democracia mak ita sei hilí ita nia nai-ulun sira atu kaer nação ne’e nia destino no povo ne’e nia futuro. Ita hanaran festa tamba festa iha carácter ida, festa katak ksolok, precisa ambiente ksolok nian ida, festa ita hotu nian precisa ambiente ida família nian, festa katak comunhão basá ema hotu halibur hamutuk laiha discriminação. Ne’e duni atu garante Espírito festa nian ida ne’e, wainhira ema hotu hakasan atu tane as valor no respeito liberdade, direito no dignidade ema ida-idak nian nu’udar hatur ona iha Artigo Constituição RDTL.

Dom Vrgilio sublinha tan katak: Ita nia halibur hamutuk ohin la’os automático, maibé simplesmente atu dehan de’it ba Timor oan ida-idak katak: Paz no Estabilidade rai ida ne’e nian iha ita hotu nia liman, Paz tenki hahú housi ha’u, Paz depende housi ha’u. São João Paulo II dehan: “Violéncia nia abut iha ha’u nia fuan, ema nia fuan mak campo de batalha entre Violéncia ho não Violéncia”. Muda Ó nia fuan muda mundo no muda Timor. Papa Emérito Bento XVI aumenta hodi dehan: “Violéncia injustiça bele conquista ho domin no laran di’ak ba malu”. Mai ita nebé ohin halibur hamutuk iha ne’e, Jesus mos hanourin ita egise housi ita iha Evangelho São Marcos nian Nia dehan: “Sé ó hadomi ema nebé hadomi ó sa diak ida mak ó sei hetan, sala nain sira mos hadomi sira nebé hadomi sira, nune’e mos, sé ó halo diak ba ema nebé halo dial ba ó sa diak mak ó sei hetan sala nain sira mos halo hanesan ne’e. Ida ne’e ha’u nia obrigação, ida ne’e ha’u nia vocação, ida ne’e mai ita sarani mak ita nai Cruz.

Dom Virgilio hatutan tan katak: ha’u comvida ema hotu kiik eh bo’ot, ferik eh katuas atu hola conciência katak: Paz tenki hahú housi ha’u. Ha’i bele contribui ba Paz ga lae. Ne’e duni ohin ita halo ita nia proceição hodi haksolok reza mai to’o iha fatin ida ne’e. Ita mai atu reza ba Paz. Iha ita bo’ot sira nia liman iha oração ba Paz nian nebé molok hahú ita reza no oração ida ne’e mai ita continua reza iha ita nia família, reza iha ita nia Paróquias, reza iha ita nia grupo sira.

Dom Virgilio reforsa tan katak: Wainhira ita hare iha surat tahan sira nebé hakerek loron 123 ne’e katak hah’u housi loron Campanha ba ba eleição Presidencial ba to’o iha eleição Parlamentar nemak ita konta iha 123 dias. Mai ita utiliza 123 dias ne’e, ita hakasan, maibé, ita buka nafatin Maromak ninia tulun atu ita hotu loke duni ita nia an ba Paz. Ne’e duni mai ita hotu nebé ohin halibur iha ne’e iah Timor nia Liurai Feto nia oin ho haraikan husu atu loke Timoran ida-idak nia fuan no laran atu hatene respeita, perdua no hadomi malu nu’udar maun ho alin.

Iha sorin seluk, director Comissão Justiça e Paz Padre Heminio de Fátima Gonçalves hateten: lorokraik kmanek ida ne’e ita hotu hamutuk atu hala’o Jornada da paz hahú housi Aimutin ba to’o iha Lecidere. Ita hotu hatene katak: aban tama ona ba Campanha Política ba eleição 2017 nian, molok ita atu tama ba eleição hanourin ita nia an rasik no mos fo testemunha ba liderana sira katak; ita tenki harí no moris iha Paz no dame nia laran. Dame importante ba ita hotu, dame importante ba Timoroan sira, dame mos importante ba nai-ulun sira hotu. Dame mak is ba actividades Govenantes sira no mos actividades povo tomak, dame mak fuan ba moris nian, laiha dame bu’at hotu sai sabraut no actividade tomak sei la halo wainhira laiha dame.

Padre Heminio de Fátima Gonçalves reforsa tan katak: Oras ne’e ema hotu prepara an hodi tama ba festa Democracia nebé atu mai dau-daun, laos de’it povo nebé atu hilí, maibé, sira nebé Candidata an ba posição sira hanesan; Presidente da República no Parlamento Nacional. Ita hotu preucupa hodi fo atensão ba lalaok política ida ne’e.

Iha biban hanesan Presidente ba Jornada da Paz Padre João Soares hato’o agradecimento ba entidades hotu hahú housi parte Igreja, Estado, sociadade Civil, Organização Internacional, líderes Político, sarani Timoran tomak nebé participa no colabora hamutuk hodi realiza evento Jornada da Paz ne’e hodi lao ain hahú housi Igreja Aimutin to’o iha Lecidere.(C/a)

Leave a Reply

Your email address will not be published. Required fields are marked *