shadow
Diocese de Dili > NOTÍCIAS > LETURA DIÁRIA > DOMINGGO III QUARESMA

DOMINGGO III QUARESMA

DOMINGGO III QUARESMA

ANO A

 

 

Primeira Leitura (Ex. 17, 3-7)

  Lia housi Livro Êxodo

 Iha loron hirak nebá, povo Israel terus ba hamrook, hahú hasouru Moisés, dehan: “Tansá, ó hasai ami housi Egipto? Atu oho ami, oho ami nia oan sira, ho ami nia balada sira?” Tan ne’e, Moisés foti lian ba Na’i: “Ha’u halo lós saida ba povo ida ne’e? Koi-kois sira atu tuda mate ha’u!” Na’i dehan ba Moisés: “Ó liu housi povo nia leet, hili katuas nain balu. Kaer iha liman óe nebé uluk ó hodi baku mota Nilo, imi hahú la’o. Ha’u sei iha ó nia oin, iha fatuk boot leten, iha foho Horéb. Ó sei baku fatuk boot ne’e, wé suli housi nia, povo bele hemu. Moisés halo hanesan ne’e, iha katuas Israle sira nia oin. Nia tau naran ba fatin ne’e: Massá no Meribá, katak: “koko” no “halolon”, basá, Israel oan sira haksesuk malu, hodi koko Maromak; sira dehan: “Maromak iha ka laiha ita nia leet”.

Maromak Futar Lia.

 

Salmo Responsorial (Sal. 94 (95), 1-2, 6-7, 8-9ab)

Refrão: Rona ohin Na’i nia lian,

            keta taka imi laran. Repete-se.

 

Mai hotu, hananu haksolok, mai hahí ita Maksoyn.

Hahí haksolok ba hasouru ita Na’in

Hananu knananuk ba ita Na’in. Refrão

 

Mai hotu tuku tur ba rai,

hana’i ita Na’in nebé halo ita moris.

Na’i, ita nia Maromak;

ita nia povo Nia bibi oan. Refrão

 

Rona ohin Na’i nia lian, keta taka imi laran.

hanesan iha Meribá, éh iha loron Massá,

iha rai fuik-maran:

Imi nia bei-ala sira halo Ha’u iha nebá,

Sira sadik Ha’u, maski haré Hau nia kbiit. Refrão

 

Segunda Leitura (Rom. 5, 1-2, 5-8)

 Lia housi São Paulo nia surat

ba sarani sira iha Roma:

Maun-Alin sira: Ita ema mós, tan fé; ne’e duni, hodi ita Na’in Jesus Cristo, ita damen ho Maromak. Hodi Jesus Cristo, ita hetan tulun nebé, ita simu iha fé. Ita sai boot, tan hatene katak ita sei tama iah Maromak nia glória. Ita sei la hein leet de’it, basá, hodi Espírito Santo nebé ita simu Maromak nia domin tama tama iha ita nia fuan. Wainhira ita sei kbiit laek, to’o ona loron, Cristo mate ba ema maksalak sira. Susar, ba ema ida fó an ba mate tan ema sala laek; mate tamba ema di’ak ida, ema ruma kala sei barani fo an ba mate. Ne’e duni, Maromak hatudu Nia domin mai ita nune’e: Cristo mate tan ita, wainhira ita sei ema maksalak.

Maromak Futar Lia.

 

 Aclamação (Jo. 4, 42, 15

 Refrão: hahí nafatin, hasai kbiit ba liurai. Repete-se.

Na’i, ita mundo nia maksoyn; haraik w’e moris mai ami,

Atu keta hamrook teni. Refrão

 

Evangelho (forma breve) Jo. 4, 5. 19b-26. 39ª. 40-42

 Na’i Jesus Cristo nia Evangelho

nu’udar São João haktuir:

 

Iha tempo nebá, Jesus to’o iha cidade samaria nian ida, naran sicar, besik toos nebé Jacob fó hela ba José. Jacob nia wé-matan iha nebá. Jesus la’o kole ona, Nia tur iha wé-matan. Loron besik fahe-rua, feto Samaria nian ida mai kuru wé. Jesus dehan ba nia: “Fó wé mai Ha’u, atu hemu”. Escolante sira ba cidade, hola ai-han. Feto hatán ba Nia, dehan: “Oinsá mak Ó ema Judeu ida, husú wé mai ha’u, ema Samaritana?” Ema Judeu sira ho ema Samaritano sira la haré malu di’ak. Jesus simu hodi dehan: “Ó hatene karik Maromak nia tulun, ó hatene karik ema nebé dehan ba ó:” Fó w’e mai ha’u hemu”, ó mak sei husu ba Nia, Nia sei fó wé moris ba ó”. Feto dehan ba Nia: “Na’i, ita kuru fatin ida laiha, wé matan mos klean. Ita hetan wé moris oinsá? Ita kala boot liu fali ami nia aman Jacob, nebé fó wé matan ne’e mai ami, nia rasik hemu, nia oan sira, nia balada sira mos hemu?” Jesus hatán: “Ema nebé hemu wé ne’e sei hamrook fali. Se hemu wé nebe Ha’u fó, sei la hamrook tan. Wé nebé Ha’u fó ba nia, sai nu’udar wé matan ida iha nia suli ba moris rohan laek. Feto dehan: “Na’i, fó w’e ne’e mai ha’u, atu ha’u keta hamrook, atu keta mai kuru tan iha ne’e”. Ha’u haré Ita Profeta. Ami nia beiala sira adora iha foho ida ne’e, maibé, imi dehan katak adora fatin iha Jerusalem.” Jesus dehan tenik: “Feto, ó bele fiar Ha’u: loron sei to’o, imi sei adora Aman laós iha foho ne’e ka Jerusalém. Imi adora bu’at nebé imi la hatene; ami adora buat nebé ami hatene, basá Maksoyn mai husi Judeus sira. Maibé, loron sei to’o – to’o duni ona – wainhira ema sira ne’e hadomi lolós, sei adora Aman tuir Espírito no lialós basá, aman hakarak ema adora Nia nune’e. Maromak Espírito duni; “Nia emar sira be adora Nia, adora tuir Espírito no lialós.” Feto dehan ba Nia: “ ha’u hatene katak Messias, ida be bolu katak Cristo sei mai. Nia mai, Nia sei hanourin buat sira ne’e hotu.” Jesus hatán: “Ha’u duni mak ko’alia daudaun ho ó ne’e.” Ema barak housi cidade Samaria fiar Jesus, tamba feto ne’e dehan: “ Nia dehan mai ha’u, buat hotu nebé ha’u halo.” Tan ne’e, Samaritano sira nebé mai hasouru Jesus, husu ba Nia atu hela hamutuk ho sira. Nia hela ho sira loron rua. Sira barak liu fiar, tan Nia liafuan, ne’e duni sira dehan ba feto ne’e: “Oras ne’e ami fiar, laós tamba liafuan hirak neb’e ó dehan. Ami rasik rona, ami hatene katak Nia, lós duni, Maksoyn mundo nian.

Lia Maksoyn.

Leave a Reply

Your email address will not be published. Required fields are marked *