shadow
Diocese de Dili > NOTÍCIAS > LETURA DIÁRIA > DOMINGGO IV QUARESMA

DOMINGGO IV QUARESMA

DOMINGGO IV QUARESMA

ANO A

Primeira Leitura (1 Sam. 16, 1b, 6-7, 10-13a)

Lia housi Livro Samuel nian:

Iha loron hirak nebá, Na’i lia tun ba Profeta Samuel: “Tau mina nakonu iha nia fatin, atu lori. Ha’u atu haruka ó ba Jessé, Belém nian, basá, Ha’u hili nia oan ida ba liurai”. Wainhira Profeta to’o, sira mai hotu hasouru nia; Samuel haré sira ida naran Eliab nia hanoin iha laran: “Ida ne’e Na’i hili atu simu mina mak ne’e duni”. Maibé Na’i dehan ba Samuel: “Ó keta haré de’it nia housi liur, ka nia ain-as ne’e, basá Ha’u hakribit nia. Maromak la haré nu’udar ema haré: ema haré housi liur de’it; Na’i haré fuan”. Jessé haruka nian oan na’in hitu liu housi Samuel oin, maibé, Samuel dehan ba nia: “Na’i la hili sira ne’e ida”. Nia husu ba Jessé: Ó  nia labarik sira mak ne’e hotu?” Jessé hatán: “sei iha ida kiik liu, nebé hein balada”. Samuel dehan ba nia: “Haruka bolu nia, basá, nia la mai ita la tur iha mesa”. Jessé haruka bolu nia: nia fuuk mean, matan kmook, oin furak. Naí dehan ba Saumel: “Ó hamrik kose mina liurai nian ba nia; nia mak ne’e duni!” Samuel kaer mina fatin, kose mina ba nia, iha nia maun sira leet. Housi loron ne’e ba oin, Na’i nia Espírito tama iha David.

Maromak Futar Lia.

 

Salmo Responsorial (Sal. 22 (23), 1-3ª. 3b-4. 5. 6)

Refrão : Na’i ha’u nia dalan di’ak; ha’u sei la hetan susar. Repete-se

Na’i ha’u nia dalan di’ak, ha’u sei la susar:

halo mahan iha fatin matak,

lori ha’u ba wé-matan kmook,

haraik kbiit mai ha’u. Refrão.

 

hala’o ha’u iha dalan lós,

atu hahí Nia naran.

Sei liu housi nakukun, maibe, la tauk:

Ita la’o ho ha’u, ita tahan ha’u. Refrão.

 

Iha ema at sira oin,

Ita hadi’a hela fatin di’ak mai ha’u.

Tau mina morin iha ha’u ulun;

Ha’u nia hemu fatin nakonu. Refrão.

 

Ita nia laran luak no di’ak

Hala’o ha’u iha ha’u nia moris tomak.

Sei hela iha Na’i nia kadunan

Wainhira ha’u sei moris. Refrão.

 

Segunda Leitura (Ef. 5, 8-14)

Lia housi São Paulo nia surat ba sarani sira iha Êfeso:

Maun alin sira: Uluk imi nakukun, ohin loron imi naroman, tan hamutuk ho Na’i. Imi buka moris tuir naroman oan. Basá, naroman mak haki’ak laran luak, justice no lialós. Imi keta tu’ir hahalok nakukun nian sira, basá sira la folin bu’at ida; imi hakribi tiha sira, basá, bu’at nebé ema sira halo, ita moe atu dehan. Bu’at hotu nebé aat, naroman mak hatudu sai, basá, bu’at hotu ema hare, tan naroman. Tan ne’e ema deahn: “Hadér, ó be toba ne’e, hamrik housi mate sira leet, Cristo nabilan iha ó!”

Maromak Futar Lia.

 

Aclamação (Jo. 8, 12b)

Refrão: Ami hahí Cristo, Maromak lia-fuan. Repete-se.

Na’i ko’alia: Ha’u mundo nia naroman; Sê tuir Ha’u, sei hetan naroman. Refrão

 

 Evangelho  (forma breve) Jo,8,1-41

Na’i Jesus Cristo Nia Evangelho Nu’udar São João haktuir

Iha Tempo nebá, Nia haré ema ida matan delek houri moris mai. Nia tafui ba rai, halo tahu ho kabén; hafoin Nia kose taho ne’e ba matan delek nia matan, hodi dehan: “Ó ba fase iha wé-matan Siloé”; Siloé katak “haruka ba”. Nia fase tiha, fila mai, nia haré. Ema sira be hela besik nia, ho sira nebé uluk haré nia husu esmola, husu ba malu: “Laós ida ne’e mak uluk tur husu esmola?” Balun dehan: “Nia!” sira seluk fali dehan: Laós! Atu hanesan nia”. Sira lori ema oan matan delek ne’e ba fariseu sira. Loron nebé Jesus halo taho hodi loke nia matan ne’e loron Sábado. Fariseu sira mós husu ba nia, oin sá nia hahu haré. Nia dehan sai ba sira: “Jesus tau taho ba hau nia matan, hafoin ha’u ba fase, oras ne’e ha’u haré”. “Fariseu balu dehan: ”Ema ne’e la mai housi Maromak, basá, Nia la halo tuir Sábado”. Sira seluk dehan: “Oin sá ema maksalak ida bele halo milagre hanesan ne’e?” Sira lia la tuir malu. Sira husu fali ba matan delek: “Ó dehan to’ok, ida be loke ó nia matan ne’e, nia ema sê?” Ema oan hatán: “Nia Profeta ida”. Sira dehan: “Ó, ida be moris tomak iha salan laran, hakarak haunorin fali ami?” Sira duni sai nia. Jesus rona katak ema duni sai nia. Hafoin, hetan nia, Jesus dehan: “Ó fiar Mane-Maksoyn?” Nia hatán: “Maibe, sê, Na’i atu ha’u bele fiar Nia?” Jesus dehan: “Ó haré tiha ona Nia; Nia mak koa’alia daudaun ho ó ne’e”. Ema oan dehan: “Ha’u fiar, Na’i!” Nia hakneak iha Jesus futar oin.

Lia Maksoyn.

Leave a Reply

Your email address will not be published. Required fields are marked *