shadow
Diocese de Dili > NOTÍCIAS > LETURA DIÁRIA > DOMINGGO V QUARESMA

DOMINGGO V QUARESMA

ANO A

Premeira Leitura

Lia housi Livro Profeta Ezequiel

Na’i Maromak dehan: “Ha’u loke imi nia rate; Ha’u halo Moris hias imi, Ha’u nia povo, hodi lori hikas imi ba rai Israel. Imi sei fiar katak Ha’u Maromak, wainhira Ha’u loke imi nia rate, hodi halo moris hias imi, Ha’u nia povo. Ha’u tau Ha’u nia Espírito iha imi: imi sei moris, Ha’u sei tau metin imi, iha imi rain; imi sei fiar katak Ha’u Maromak, dehan no halo”.

Maromak Futar Lia

 

 

Salmo Responsorial                                                                            (Sal. 129 (130), 1-2. 3-4. 5-6. 7-8)

Refrão: Na’i laran luak duni, haraik maksoyn wa’in tebes. Repete-se

 Na’i, foti ha’u lian ba ita ho neon ho laran,

Na’i rona ha’u lian!

Haraik tulun mai ha’u,

rona ha’u susar. Refrão

 

Ita hanoin karik ami salan,

Na’i sê mak bele soy-an?

Maibé, iha Na’i ema hetan perdua;

tan ne’e, ami hamulak ho laran. Refrão

 

Ha’u klamar hein Maromak,

Ha’u fiar Nia lia-fuan.

Ha’u klamar buka Maromak

di’ak liu ema hein rai hun mutin. Refrão

 

Hanesan ema hein loron atu sa’e,

nune’e, Israel hein nia Na’in.

Tan Na’i laran luak,

haraik maksoyn wa’in tebes.

Na’i de’it mak sei soy Israel, housi nia susar tomak. Refrão

 

 Segunda Leitura                                                                                                                        (Rom. 8, 8-11)

 Lia housi São Paulo nia surat

sarani sira iha Roma:

 Maun alin sira: ema nebé husik isin lolon ukun sira, sira la hetan Maromak nia domin. Maromak nia Espírito horik karik iha imi, Espírito mak ukun imi, laós buat isin mak ukun imi. Maibé, ema ruma la iha Cristo nia Espírito karik, espírito ne’e laós ninian. Cristo horik karik iha imi, maski imi nia isin sei mate, tamba salan, imi nia Espírito moris, basá imi sala laek. Maromak nebé halo Cristo moris hias housi mate, Ninian Espírito horik karik iha imi, Nia sei fó mos moris ba imi nia isin maten, hodi nia Espírito nebé horik iha imi.

 Maromak Futar Lia

 

Aclamação                                                                                                                                 (Jo. 11, 25a, 26)

Refrão: Na’i Jesus Cristo, ami hahi hana’i Ita. Repete-se

 Na’i ko’alia: Ha’u moris hias no moris hun;

Sé fiar ha’u,sei la mate teni. Refrão

 

Evangelho (forma breve)                                                                              (Jo. 11, 3-7. 20-27. 33b-45)

 Na’i Jesus Cristo Nia Evangelho

nu’udar São João haktuir:

          Iha Tempo nebá, Lázaro nia feton sira haruka dehan: “Na’i, ita nia belun moras”. Jesus rona tiha, Nia dehan: “moras ne’e laós atu mate; ne’e atu fo glória ba Maromak, atu ema hahí Maromak Oan”. Jesus ho Marta, ho nia alin Maria ho Lázaro, sira belun boot. Maibé, rona tiha katak Lázaro moras, Nia hela tan loron rua iha nebá. Liu tiha, Nia dehan ba Escolante sira: “ita ba fali Judeia”. Jesus to’o ba, hetan Nia belun ema hakoi liu tiha ona loron haat. Marta rona katak Jesus to’o dadaun ona mai, nia sai ba hasouru. Maria tur hela iha uma. Marta dehan ba Jesus: “Na’i ita iha ne’e karik, ha’u nia maun la mate. Maibé, ha’u hatene katak, oras ne’e mos, buat hotu nebé Ita husu ba Maromak, Maromak haraik ba Ita”. Jesus dehan: “Ó nia maun sei moris hias”. Marta hatán: “Ha’u hatene katak, nia sei moris hias, wainhira ema hotu moris hias iha loron ikus”. Jesus dehan: “Ha’u mak moris hias, Ha’u mak moris hun. Ema nebé fiar Ha’u, maski neneik sei mate, nia sei moris; Ema hotu nebé moris no fiar Ha’u, sei la mate tan. Ó fiar buat ne’e? “Marta dehan: “Na’i ha’u fiar. Ha’u fiar nanis katak Ita mak Messias, Maromak Oan nebé atu mai iha Mundo!” Jesus laran nakdedar, neon susar tan hanoin. Hafoin, Nia husu: “Imi tau nia iha nebé?” Sira dehan: “Na’i, ami haré.” Jesus tanis. Judeus sira dehan: Nia be loke matan delek sira nia matan, Nia labele halo ema ne’e la bele mate?” Jesus laran nakdedar tan dala ida, tan hanoin, hodi to’o ba rate. Rate ne’e fatuk ko’ak ida, taka hela ho fatuk ida. Jesus dehan: “Hasai tiha fatuk. “Marta, mate-bian nian feton dehan: “Íis ona Na’i, basá loron haat ona. “Jesus dehan ba nia: Ha’u la dehan ba ó katak, ó fiar karik, ó sei haré Maromak nia glória?” Sira hasai tiha fatuk, Jesus foti matan ba Lalehan dehan:”Aman, Ha’u fó agradece ba ita, tan rona Ha’u. Ha’u hatene katak, Ita rona nafatin Ha’u; Maibé, Ha’u ko’alia hanesan ne’e, tamba ema lubun nebé hale’u ami, atu sira fiar katak, Ita mak haruka Ha’u mai.” Dehan tiha ne’e, Nia foti lian maka’as, dehan: “Lázaro, sai mai liur.” Mate sai mai, ain ho liman bobar ho hena, oin, falun ho lensol ida. Jesus dehan ba sira: “Kore tiha nia, husik nia la’o.” Judeus barak, nebé mai haré Maria, haré buat nebé Jesus halo, sira fiar Nia.

Lia  Maksoyn  

Leave a Reply

Your email address will not be published. Required fields are marked *