shadow
Diocese de Dili > NOTÍCIAS > OPINIÃO > MANE SIMU FETO HO LARAN-KSOLOK NU’UDAR NIA-ISIN BALUK RASIK

MANE SIMU FETO HO LARAN-KSOLOK NU’UDAR NIA-ISIN BALUK RASIK

Adaun nebé laran taridu, mesak-oan (solitário) hela iha Jardim luan-boot Eden-laran, senti duni nia moris ho saudade-klean hodi buka no hein hela nia sorin-baluk. Eva mosu tiha maka foin bele halakon tiha nia sentimento saudade nebé klean tebes (kerinduan yang mendalam) no ambiente solitário (kesepian) nebé mak nia koko hela daudaun, tuir Na’i criadór nia hakaran mos. Tan ne’e, bainhira Ad Adão hasoru ho makhoris foun Eva, nia sorin-baluk, nia senti kedas laran-ksolok, haksoit hodi expressa nia sentimento saudade tan domin :

“Haiii, ó mak doben nebé ha’u buka duni! “Loos ona, ó mak ruin ha’u-nia ruin, isin husi ha’u-nia isin” (Jen 2:22), la seluk ida, la leet duni. Mai, it’rua hakonu-malu ho knaar domin ida rohan laek. Ó mak ha’u-sorin, ha’u-baluk, ha’u sudin rohan laek. Ha’u hein ó iha kalan, bali ó iha loron; la mosu ó-illas, la fihir o-klatak ida. Ha’u husu ó hakbesik mai ha’u hodi latan ha’u isin-kolen, sadere ba ha’u ulun-todan; hakuak metin ha’u ba ó-nia futar fuan-manas. Nuu hali-huun mahon ida ho tahan-matak tatebar, naleuk we-lihun moru ida, sai fatin-malirin ba ha’u hola anin-fresco, dada iis-kokolen, husu we-mrook ba ó, ha’u-nia doben-murak.

Em hotu nu’udar makhoris, feto no mane, sai illas tatutan derasaan ida deit husi bei-ala Eva no Adão; nebé, tuir nia natureza social, sira buka-malu hodi sadere ba malu nafatin. Loos duni, domin rohan-laek nebé Na’i Maromak criador haraik ona mai ita ema, feto no mane, liu nanis husi bei-ala Adão no Eva hodi hatutan no hadaet husi derasaan ba derasaan ba makhoris hotu-hotu iha universo ne’e. Domin rohan-laek ne’e maka sai duni tali-kakesi ida nebé labele kotu; bainhira ema buka koko hakotu karik domin ne’e husi maluk sira, sei lori nia ba hasoru susar, terus no mate. Mas que, iha modo ka maneira hatudu (expressa) domin ne’e ba malu, la hanesan husi ema ida ba maluk seluk, husi feen ba laen, oan sira ba inan-aman no husi criatura sira ba Na’i criadór; maibé, domin ida, ho nia cor oin-oin ne’e, mai husi huun ida deit, mak Na’i Maromak no hodi domin ne’e mak kesi ema-nia moris hamutuk.

Domin ne’e aasliu buat hotu (1Kor 13:1-13). Ho domin mak hakiak, fó-moris, motiva no inspira ema hodi hatudu (expressa)-an, halo obra sira furak-kmanek hanesan cultura, arte no poesia. Ema nebé domin-laek tanesan ho babadok ida nebé lian makaas; maibé, nia laran mamuk-boot hela; no bele tanesan  mos domin ne’e nu’u tasi ba ikan no anin ba makhoris sira, iha rai-leten. Karik we-tasi maran, ikan sira sei iis-kotu no mate hotu; no anin la iha mos susar ba ema, balada no ai-horis sira seluk sei sai namlaik no dodok-mohuk hotu. Nune’e mos ho domin : Laiha domin, la iha moris (vida) ba ema no makhoris (os seres vivos) sira seluk. Tan domin ne’e duni, maka ita ema soi kbiit hadomi no hanai ba malu, “Hadomi no hanai maluk sira nuudar hadomi no hanai an rasik (“Ukunfuan X, habadak tiha ba Fukun rua deit…”).

“Por natureza”, matenek-sciênsia nian hatudu ona katak, atu iha (existe) moris oin-oin, maka Maromak, Domin-Nain, hafutar ona ema (feto no mane) ho género no sexo nebé ketak-ketak eh caraterístico (feto-mane/femininu-masculinu/inan-aman/). Nuudar makhoris (criatura), ema (feto/mane), tuir loloos, nunka bele hewai (nega) fali nia an, nia natureza rasik; maske ita haree, bele mosu makhoris ho nia karáter (individual) ruma “específico, incompleto/deficiente”, por exemplo: Panaleiro/bermane/buifeto, nst.; maibé, sira hetan dignidade moris nakunu.

Tan deit domin ne’e mak (mosu) existe moris; mak ema (feto-mane) moris, iha rai ne’e, atu hadomi malu. Ema hadomi moris ne’e tanba nia iha ona domin ne’e rasik. Ho base klean (fundamental) ida ne’e, maka hodi hatuur, iha nação hotu-hotu, iha mundu ne’e, Lei-Inan Moral no Lei-Inan Formal sira atu ema, iha rain barbarak, tane netik valor moris ne’e. Husi Basee Lei-Inan Moral nian, maka ita fihir tiha ona uitoan. Oras ne’e, mai ita haklean fali mak Lei Formal sira mundu nian. Maibé, ita sei limita an lai ba Lei sira nebé decreta no ratifica tiha ona iha constituição RDTL. Tuir mai, ita hakerek artigo balun atu feto sira hatene no, liuliu, usa hanesan instrumento defesa ba direito feto sira nian :

  1. Feto no mane sira iha direito no obrigação sira hanesan deit iha kampu hotu-hotu : familiar, cultural, sosial, economia no polítca (Artigo 17.0 : Igualdade entre mulheres e homens).
  2. Cidadão hotu-hotu (feto no mane) atu la bele lori todan no terus husi orden ilegal hirak nebé hakanek, hatuun sira-nia direitu, liberdade no garantia fundamenal sira; no sira hetan direito legítima ba defende-an tuir lei nebé iha ona (Artigo 28.0 : Direito de resitência e de legítima defesa).
  3. Bandu viola ema-nia moris (a vida é inviolável). Estado reconhece no garante direito ba moris; no la iha castigo-mate (pena de morte) (Artigo 29.0 : Direito à vida).
  4. Ema hotu (feto no mane) iha direito atu dehan-sai (expressa) hanoin, fo no hetan informação livre, la hetan censura ho base iha constituição no ema-nia dignidade ( Artigu 40.0 : Liberdade de imprensa e dos meios de comunicação social).
  5. Ema hotu-hotu (feto no mane) iha direito atu hola-fatin, hodi nia an rasik, ka liu husi nia representação democráticamente nebé hili (eleito), iha moris política no assunto público sira iha rai-laran; atu sai elemento no hola-fatin iha partido político sira nebé estebelece ona tuir lei (Artigu 46.0 : Direito de participação política); no sei iha seluk-selkuk tan.

Atu hakotu : Artigo hirak leten ne’e, no sei iha seluk-seluk tan, maka sai base escrito no nu’udar instrumento maktenen no mahein ba direito feto nian, iha campo hotu-hotu, la’os ba mane deit, atu ema hotu haktuir, hanai no tane duni.

Mane sira hadomi imi-nia feen, hanai imi-nia feto-maluk sira nuudar imi-nia baluk-sorin rasik. Hadomi no hanai sira, katak imi hanai (respeita) mos sira-nia knaar, direito no obrigação sira, dignamente, hanesan mos mane nian, iha aspeto no campo hotu-hotu (…). Luta maka’as ba atu hadook tiha caráter, lala’ok no hahalok feudalista iha sistema (sosio-político-cultural-religioso) sira nebé hanehan, hatuun, la dignifica feto nia knaar, direitu no liberdade, iha ita-nia rain.

Leave a Reply

Your email address will not be published. Required fields are marked *