shadow
Diocese de Dili > NOTÍCIAS > OPINIÃO > Música “Sacra- Liturgia” e Música “Religiosa non Litúrgico”

Música “Sacra- Liturgia” e Música “Religiosa non Litúrgico”

(Por Don. Nelson da Costa Freitas)

  1. Uma análisa crítico

Preparação ba Festa sira no Solenidade Natal no Páscoa tuir calendário Litúrgico

Uma Kreda Universal iha mundo tomak no Uma Kreda Particular iha rai Timor Lorosae iha momento ne’e dadaun tama ona iha Semana Santa: Sarani sira hadera-an hodi halo abstinência, jejum, penitência no oração durante Domingo I-V (se sura loron ho kalan karik hamutuk 40, número nebe coincidência ho jejum nebe Jesus halo iha deserto: símbolo bíblico). Iha domingo IV tempo quaresma nian liturgia fo naran especial hodi bolu “Doménica Laetare” (iha latim), se traduz ba língua volgare povo nian karik hanesan Português bolu “alegrar, alegrai-vos” iha Tétum “haksolok, imi haksolok ba”, Inglês “rejoice” no bahasa Indonésia “bergembira-lah”. “Doménica Laetare” (IV Domingo) da quaresma paralelo ho III Domingo do Advento bolu “Doménica Gaudete” nia significado hanesan “Doménica Laetare”.

Pontos importante saída ma’k liturgia Igreja Católica Romana hakarak hanorin nia sarani sira iha Domingo IV nebe ita bolu “Domingo haksolok nian”? liturgia hanorin kona ba regra celebração nian katak : iha tempo quaresma nia laran hananu sira nebe ita canta iha domingo no loron bain-bain sei la usa instrumento (órgão etc.), aifunan se la infeita iha altar nia leten ga sorin-sorin, maibe iha Domingo Laetare-IV Domingo ( liturgia fo licença atu bele usa instrumento hodi acompanha cântico sira missa nian, bele tau aifunan iha altar nia leten/sorin) ho razão “Domingo haksolok” nian tambá sarani sira iha ona metade penitência nian no liturgia convida ita atu  “haksolok ba festa Páscoa”. “Páscoa “nomeadamente bolu “Primordialis dies festus”: festa primordial dos cristãos mak “mistério de Cristo” ou “mistério Pascal”. Testemunho husi Novo Testamento afirma kona ba celebração “Eucaristia”, nebe halo iha Loron Domingo Dies Dómini” primeiro dia da semana nebe Cristo Moris Hias Husi Mate tuir tradição Apóstolo sira nian: “Loron Domingo” Loron nebe mak sarani sira sei halibur hamutuk iha assembleia atu celebra eucaristia (Cf. 1Cor 16, 1-2; Act 20, 7-12: Ap 1,9-10 no texto iha “Encíclica Dies Domini” no. 21).

Em relação ho festa Uma Kreda nian no Solenidade Páscoa nebe sai tradição boot iha Liturgia Romana no mos iha Igreja Timor Leste, mak liturgia bolu atenção ba maluk sira hotu nebe serviço iha dioceses (paróquias, estações missionárias, conventos, liu-liu ba “grupos corais” hirak nebe mak existi iha ida idak nian paróquia iha diocese tolu nia laran precisa atu hatene no compreende didiak saída mak “Música sacra” ga “Música liturgia” no saída mak “Música Religiosa non litúrgica” nune’e la bele kahur no canta arbiro tuir ema idak ida nia “gosto” ga nia “hakarak”. Ema nebe mak la iha formação ga escola especializada ba “Música Sacra-Liturgia” la bele compôs no inventa e traduz música arbiro hodi ba canta iha “CELEBRAÇÃO EUCARÍSTICA GA LITURGIA NIA LARAN” sem hetan aprovação husi órgão competente Uma Kreda Particular nian (Bispo sira nudar Ordinário Lugar) no verificação husi ema esperto/perito sira tuir área música no liturgia.

Oinsa iha Timor Leste, ita nia compreensão kona ba “música sacra-liturgia” e “música religiosa non litúrgica?

Artigo simples ida ne’e bele fo naroman ema hotu nebe mak iha “gosto” kona ba música, liu-liu belum sira nebe mak kaer grupo coral (coro sira iha paroquias, bairros husi estação missionária sira, conventos religioso/sas, escolas católicas e públicas etc.) hodi ajuda ita boot sira atu bele compreende diak liu tan kona ba sentido “Música Sacra-Liturgia” no “Música religiosa-non litúrgica”. Música hirak ne’e bele canta iha momento saída? se mak bele compôs? no se mak bele aprova no autoriza? Tambá ohin loron grupo coral sira nebe ida-idak estabelece sira nia an iha paróquia Uma Kreda Timor Lorosae nia laran; inventa cântico sira arbiro deit, traduz no halo harmonização ba música sira sem hetan autorização husi nia nain (compositor), copia husi “you tube”, “Mp3”, “Mp4” dala barak mak la os música nebe merece atu hananu iha “Liturgia” nia laran. Canta iha língua oin oin hanesan “ es campur ga sedok ou marotok. Ema idak idak compôs música liturgia nian sem iha conhecimento profundo, formação adequada, kona ba música sacra liturgia nian nune’e resultado mak: estraga lia tétum, dessacraliza música sacra liturgia ho música profana ga musica animação, toca la tuir notas, hanorin música inventa mak barak. Música nebe sira compôs la iha aprovação husi “Conferência Episcopal Uma Kreda Timor nian”, la liu husi seleção ga exame ida husi comissão Liturgia (Música e Liturgia) nível Nacional hodi bele verifica katak: música hirak ne’e  bele canta ga lae?, serve ba liturgia ga lae?. Grupo coral sira ne’e hili música ba canta iha celebração liturgia sem conhecimento husi amo pároco no mos sira canta tambá ema selu sira, sira bele canta husi dader too fali lokraik (exemplo; casamento, matebian, agradecimento: tinan, graduação, simu cargo foun ga poder foun etc., dala barak mak sira la distingui música hirak ne’e. Grave liu mak iha capital Dili.

  1. Distinção entre Música Sacra (M. Liturgia) no Música Religiosa non Litúrgica”

“Música Sacra” ou “Música Liturgia”

 Música Sacra significa: Música ida nebe ma’k nobre liu, besik liu, no diretamente serve liu ba culto divino, parte integrante ho Liturgia ou celebração Eucarística (cf. SC. nn.113-114: Normas gerais (329).

Objetivo no carater husi música sacra ma’k atu fo maior eficácia ba funções sagradas, hasa’e espírito ba Maromak, excita fé no piedade iha celebração divino mistério sira nian.

Música Sacra ou Música Liturgia nia qualidade mak hanesan :

  1. Santidade. Dehan santidade, portanto deve ser excluída não só o que é impuro, mas também qualquer profanação: exclui husi Liafuan no ritmo nebe impuro no profanação. Música liturgia nian la os deit halo ema haksolok maibe tem que santifica ema sai santo (SC no 7).
  2. A bondade de formas. Significa: se hakarak sai eficácia, então música sacra liturgia tem que sai lolós “arte” ida nebe lolós. Quando nia iha ona arte então nia tipo ou caracter música Sacra Liturgia tem que inclui buat nebe mak ita bolu: educativo (moral, catequese, pastoral no aprofundamento da fé), anúncio kona ba boa nova, Liafuan nebe bele converte ema, lori ema besik kedas ba Maromak, nia valor tahan tinan ba tinan ema canta bele repete dala 10 iha missa ida ema la senti bosan no continua atua iha tempo no espaço iha cultura nebe deit. Tamba ne’e mak o canto sacro (música sagrada) sempre unida hamutuk ho Liafuan no hola parte integrada iha liturgia solene (SC nn.112-113).
  3. Katak sem excluída husi carater específica husi música sira nação ga povo oin oin. Universalidade ita bele compreende mos hanesan cânticos nebe mak ema hananu iha Uma Kreda Europa nian, iha África no América Latim hanesan mos ita hananu iha Oceânia no Ásia: Rai Timor, so troka deit mak nia lian (letra husi latim ga português ba tétum ) maibe nia tom hanesan, exemplo “Povo de Reis Assembleia Santa” compôs husi Lucien Deiss, ou Magnificat: “O Senhor fez em mim maravilhas” compôs husi Joseph Gelineau sj, “Paixão do Senhor” iha sexta feira santa em foram gregoriana, Hino Jubileo 2000  “Christ hier, Christ aujurd’hui: Cristo ontem, Cristo hoje” compositor J.P. Lécot, “ Panis angélicos” (Cesar Frank) no música sacra liturgia sira nebe “musicistas legendários” ga “ magnum compositores ” hanesan A. Mozart, JS Bach, F. Haendel, Vivaldi, Beethoven, J. Arcadelt, etc. sira halo música sacra acompanha ho orquestra bele hananu iha celebração litúrgica.

Qualidade 3 ne’e la hetan iha música popular sira seluk hanesan (Jaz, rock, country, koremetan, dandut, shamba, hotahe-india, marcha e valsa nebe artista Timor sira inventa música sem escola música), nem mos iha música religiosa no animação hanesan Pe. Zezinho nian no música sira seluk nebe ema compôs atu ajuda halo animação ba vocação, catequese : ba kaben, primeiro comunhão, ba concerto, meditação nian iha rai Timor música hirak ne’e ema canta hotu iha liturgia nia laran, ate grupo coral halo salmo hodi canta ba matebian iha ema java sira nia toada (Tom-gaya Jawa) nebe la os cultura Timor nian, em vez halo salmo ho caracter java nian diak liu halo ita nia salmo iha ita nia cultura rasik hanesan  “Sídon” música ba matebian sira ou introduz ita nia música nia tom-toada hanesan Tebe Tebe, likurai, dahur e lorsá, etc. Hahu uluk kedas missionários balun traduz música husi latim ga português ba tétum halo kedas erros boot (Ex. Cristo dará liberdade: Cristo sei haraik liberdade la os Cristo haraik fo liberdade, Povo de Reis assembleia santa, povo sacerdotal… (Povo liurai assembelia santa, povo nailulik; la os ema rai hotu ema lubun boot: Hau hasa’e ba Maromak nia uma, la os hau lao ba Maromak nian uma Tpo. quaresma) Nune’e mos iha ocupação Indonésia to’o Independência (missionários religiosos e religiosas husi Indonésia barak mak lori sira nia música Indonésia mai introduz iha Timor, maibe música hirak ne’e estraga fali tétum, dala barak compositor sira la os ema eskola música sacra liturgia maibe curso música bain bain hanesan hatene halo nota ho angkah 1,2,3,4,5,6,7, bele compôs ona música liturgia nian no grave liu música hira ne’e lori ba canta sem hetan verificação e aprovação husi autoridade Igreja Local hanesan bispo sira.

Iha celebração liturgia nian regra fahe música hirak ne’e ba parte :

  1. Canções liturgia iha Missale Romanum, cantos hirak nebe mal ligada ho “ministro sagrado: celebrante, diácono no leitor sira nuudar ministro instituido. Canta ministro sira nian mak ho estilo silábico ga recitativo, inclui mos saudação sira hanesan; Dominus vobiscum, Pareceptis salutaribus moniti antes, prefatio, orações colecta, secreta, postcomunione, no ita Missa est.
  2. Iha liturgia canções hirak nebe atu canta iha missa fahe tuir ordem hanesan :
  • Canções de Ordinarium Missae: Kyrie, Gloria, Credo, Sanctus, Agnus Dei. Música hirak ne’e la bele hamenos (koa), inventa ga aumenta tan letra seluk ou canta deit nia refrão hanesan resumo ida. Bolu música ordinarium tamba hasai husi rúbrica ga Missale Romano. Ohin loron iha Igreja Timor ema canta inventa Gloria ho Credo canta deit nia refrão hanesan fali resumo ida ou canta Kyrie, Sanctus, Agnus Dei inventa ga aumenta tan fali Liafuan seluk nebe la tuir iha “Rúbrica” ou “Missale Romano” (Ordinário da Missa) Erros ne’e mai husi missionários religiosos rai liur sira no diocese mos la iha ema atu hare buat hirak ne’e. Realidade canta nebe mak compôs husi grupo coral balun ga tradução husi ema rai liur nia caracter “Santidade, arte e bondade de formas no Universal la iha duni, la respeita ordem música sacra liturgia, música balun nia irama/ritmo “cengeng-manhosa” la iha valor santidade no arte. Música nebe sira adapta, sira traduz sem conhecimento seleção husi “Comissão Liturgia kona ba Música no Liturgia, sem hetan autorização ga aprovação husi bispo sira, maibe lori ba fo ensaio coro sira, lori ba canta dadaun sem apresenta ba amo pároco atu hare: aat liu mak amo pároco sira la interesse, la hatene tan canta então grupo coral sira ne’e hili música ba Domingo no loron boot hanesan Páscoa e Natal etc., la tuir ordem liturgia maibe tuir gosto, asal umat senang, bapak senang, dan dirinya menjadi puas. (Iha tempo Natal ema grupo coral balun canta fali música natal hanesan; we wish you and Mery Christmas, Belem2X haksolok belem ne’e música (Ambom manise) música animação la os liturgia, Alam Raya karya Bapa nebe tradução la tuir música original “Aleluia2 Benedicat vobis” ou “Joy to the world, the Lord is come” etc, iha Timor hanesan pepatah bahasa Indonesia dehan: tidak ada akar rotan pun jadi: buat nebe mak ema la hatene foti riba deit ba, importante canta.
  • Canções de Proprium Missae: Entrada, gradual (livro litúrgico nebe contém texto musical no canções interlezional entrada no comunhão), Aleluia, Tractus (movimento lento, naran nebe mak fo ba cantos litúrgicos interlezional antes proclamação evangelho iha eucaristia), ofertório, comunhão. Iha canções hirak ne’e nia texto tem que próprio ba domingo idak-idak, ba festa ou ba celebração idak idak. Nune’e mos ba nia melodia mos própria cada texto katak: leitura nebe hili husi Sagrada Escritura no cântico sira tem que combina hanesan forma parte principal iha liturgia da palavra (SC 33). Oin sa ho cântico final?. La existe iha missa liturgia tamba rito taka ho “Ite missae est” la iha tan cerimonia seluk, maibe bele canta atu acompanha procissão sai nian ou fo deit honra ba Nai feto taka ho Salve regina.

Música Sacra-Liturgia nia Género mak :

  • Canto Gregoriano. Canta hirak nebe mosu iha papa Gregório Magno nia tempo no nia duni mak compôs música hira ne’e hodi sai tradição iha Ritos Romanos nian nebe usa iha Vaticano no Igreja Católica iha mundo tomak, exemplo mak: cantos angelis sira bolu missa angelis. Santo Ambrósio husi Milano iha nia rito Ambrosiano compôs Kyrie, Sanctus, Agnus Dei no hatama ba iha “Rito Romano nebe ohin loron ita canta ou recita. Canto Gregoriano mak canto próprio oficial tradicional husi Uma Kreda Romana no sempre usa latim nudar língua oficial. Depois de reformação Concilio Vaticano II mak fo dalan hodi traduz ba língua volgare- povo nação ida nia lian (SC 40,54)
  • Polifonia clássica. Liafuan Polifonia mai husi lia grego “polys” =barak e phonè= lian/som. Polifonia significa União entre dois ou mais dos sons vogais instrumentais. Tuir tradição no lei uma kreda nian, só bele usa deit órgão nu’udar instrumento oficial iha celebração litúrgica. Maibe hahu iha século XVI-VIX, bispos sira iha Alemanha no Áustria husu ba Amadeus Mozart atu introduz vários instrumentos nebe sai lia ida hanesan “Polifonia” hodi bele canta iha celebração liturgia. Hahu husi Mozart nia tempo mak ema toca música polifonia, orquestra hodi acompanha procissão solene sira hanesan: “Corpus Dómini”, “O Senhor dos Passos” procissão de Nossa Senhora, Anjo Santo/ Santa mahein diocese no paróquia nian. Ohin loron, iha Vaticano Basílica São Pedro usa ona combinação entre órgão litúrgica no instrumento polifónica hirak (Violino, celo, trombeta, harpa, cítara, flauta, guitarra, saxofone.
  • Música Moderna; polifonia, popular, instrumental para (Órgão). Dala barak ita usa.

Música religiosa non litúrgica

Distinta husi Música Sacra ou Música Liturgia ma’k música religiosa lá os música liturgia.  Música Sacra-Liturgia ma’k “canto gregoriano” nuudar canta própria oficial tradicional Igreja Romana nian sempre canta iha lian ida deit. Língua própria ma’k Latim. ( Cf: MS,1, Enc.Musica Sacrae, 25-12-1955 (AAS, 48, 12,15-16, Canon 1917 art.1).

Música Religiosa (normas 340) define kona ba música religiosa nia conteúdo/objetivo ma’k; Religioso no Piedoso, ho estilo/gaya/irama nebe livre liu/lebih bebas, la iha caraterística música sacra – Liturgia hanesan santidade, no la iha seriedade nebe la carateriza passos música sacra-liturgia tamba ne’e ma’k “Música religiosa non Litúrgica” absolutamente exclusa husi função litúrgica, la serve atu canta iha celebração liturgia nian ga culto divino, só bele canta deit iha concerto, animação, teatro, meditação. Distinção ida ne’e precisa duni ho atento tamba música religiosa balun nia gosto de mos furak hanesan “Ave Maria” husi Franz. Schubert, maibe la os musica liturgia ou música Pe. Zezinho “Um dia uma criança me parou” ou oração pela família; nebe sai tiha toman ida iha Timor Leste hodi canta iha casamento: ida ne’e completamente la os música liturgia maibe acompanhamento husi uma ba Igreja, ou sai husi Igreja ba Uma no tama tenda laran.

Iha regra “Música sacra-liturgia” respeito ba honra no hanorin husi “Magistério Supremo” Uma Kreda nian (Papa no Bispo sira nebe ukun sira nia diocese) iha cerimónia liturgia bandu atu la bele canta música profana, música religiosa (animação, meditação) hirak nebe la iha carácter no valor santidade no la iha contexto litúrgico nebe halo lakon nia forma santidade, arte, universalidade, no inspiração bíblica. Nune ‘e mak iha celebração litúrgica qualquer diocese ida proibido música hirak nebe compôs husi ema hirak nebe la iha curso ou especializado iha música sacra-liturgia ( ex.mak hanesan iha Timor, ema naran-naran deit ba halo salmo, inventa no copia música husi internet, you tube, mp3 e mp4, halo tradução no halo arrasamento ba ema seluk nia música sem husu autorização husi compositor, sem hetan aprovação husi bispo sira no dala barak música hirak ne’e la os caracter música sacra liturgia maibe música profana no religiosa.

Em geral iha qualquer diocese ida Igreja Romana proibido música hirak nebe la bele canta no toca iha cerimónia liturgia nia laran , exemplo: Ave Maria sira nebe mak compôs husi grandes compositores: F. Schubert, Gounod, Mascagni: Ave Maria nupcial husi Mendelssohn; o Sonho de Schumann; A largura de Haendel ( la os Aleluia de Haendel; bele canta tamba ne’e inspiração bíblica husi livro Apocalipse, maibe usa nia “aleluia” hodi canta ba aclamação Evangelho hanesan iha catedral Dili no paroquia sira seluk halo, ida ne’e mak la permite!); A largura de Mulé; as noites de Chopin; inclui mos música husi Pe. Zezinho nebe iha Timor ema usa hodi canta ba liturgia, ne’e erros boot. Música hirak ne’e só bele toca ga hananu deit iha momento cerimónia non litúrgico (concerto, reflexão pessoal ga meditação, animação, teatro, acompanha nubentes sira husi uma ba Igreja, husi Igreja ba uma no ba tenda laran, promoção vocação nian).

Música sacra-liturgia nia Liafuan sempre inspira husi “Sagrada Escritura” tuir linguagem música sacra bolu “repertório” katak Liafuan nebe iha canto litúrgico ga música sacra baseia sempre ba “Liafuan Sagrada Escritura” ; hahu husi século IX, repertório hotu hotu construído husi Liafuan Bíblia iha tradução latina;  respeita kona ba divisões textuais, acentos tónicos , expressivos; no nia serviço tem que tomar medidas ruma hanesan variedade ida husi elementos de ornamentações e funções litúrgicas. Iha ne’e mak ema nebe hasai curso especializado iha música sacra no liturgia la hanesan ema hasai música bain bain. Ita bele rona no hare sira nia maneira de toca, hanorin diferente. Escola música sacra iha Europa (ex. Roma, Áustria, Alemanha, França e Espanha (conservatório iha Portugal) lori tempo naruk mais ou menos 5-7 anos: Música sacra-liturgia hanesan mos disciplina eclesiástica nebe duro no difícil hanesan mos  Bíblia, Liturgia, no Patrística tamba aluno sira tem que domina sulvejo, notas, instrumento sira hotu no bele sai compositor nebe diak.

(Hakerek nain sacerdote diocesano de Baucau, docente iha ISFT – Fatumeta Dili Timor Leste)

Leave a Reply

Your email address will not be published. Required fields are marked *