shadow
Diocese de Dili > NOTÍCIAS > LETURA DIÁRIA > DOMINGO DA PÁSCOA DA RESSUREIÇÃO DO SENHOR

DOMINGO DA PÁSCOA DA RESSUREIÇÃO DO SENHOR

Premeira Leitura                                                                                                                                (Act.10,34-43)

Lia housi Livro haktuir Apóstolo sira nia hahalok:

Iha loron hirak nebá, Pedro hamrik, ko’alia nune’e: “Liu tiha João Baptista nia Baptismo imi hatene ona sá lós mak mosu iha rai Judeia tomak, hahú housi Galileia: Maromak halo Espírito Santo tun ba Jesus Nazaré hodi haraik kbiit wa’in ba Nia. Jesus Nazaré la’o lemo rai hodi halo di’ak no fó matenek oi-oin ba ema hotu-hotu nebé moris hela iha diabo nia liman tan Nia ho Maromak la’o hamutuk. Ami hirak ne’e Jesus Nazaré nia sasin: Ami fó lia sasin kona ba Jesus Nazaré Nia hahalok iha rai Judeia, iha Jerusalém. Ami fó lia sasin katak ema sira hedi mate Nia iha Cruz. Maibé, Maromak haraik ba Nia Moris hias, liu de’it loron tolu. Maromak haraik mos, Nia atu mosu, laós ba ema tomak, maibé, ba sasin sira nebé Maromak fihir kedas houri uluk, katak mosu deit mai ami, ami nebé han hemu hamutuk ho Nia. Wainhira Nia moris hias tiha fali. Jesus haruka ami hanourin lia-foun ba Povo; Nia haruka mos ami, atu fó hatene katak Maromak foti duni Nia, nu’udar ema mate no ema moris sira nia Zuís. Lia hotu nebé Profeta sira fó hatene sai kona ba Jesus mak ida ne’e: Tan Jesus nia naran, ema hotu-hotu nebé fiar Nia hetan duni perdua ba sira nia salan.”

Maromak Futar Lia.

 

Salmo Responsorial                                                                         (Sal. 117 (118), 1-2. 16ab-17. 22-23)

Refrão:Loron ida ne’e Maromak fó Tulun, Mai hawalok haksolok

Ou

Aleluia! Repete-se

Hana’i Maromak tan Nia di’ak!

tan Nia laran luak ba nafatin.

Israel nia uma laran bele dehan,

Nia Laran luak ba nafatin. Refrão

Na’i nia liman halo buat kmanek,

Na’i nia liman kmanek tebes.

Sei la mate maibé sei moris,

atu haklaken Na’i nia hahalok Refrão.

Fatuk ida be badaén sira hewai,

nakfilak ba fatuk inan.

Buat ne’e hotu mai housi Maromak,

kmanek oi-oin mosu iha nia oin. Refrão

 

Segunda Leitura                                                                                                                          (1) Col. 3, 1-4

Lia housi S. Paulo nia surat ba sarani sira iha Calosso:

Maun alin sira: Imi moris hias ona ho Cristo! Tan ne’e, imi sei tau deit matan ba sasán leten nian. Iha lalehan, Cristo moris, tur iha Maromak sorin kuanan. Imi nia laran sei monu de’it ba lalehan nia di’ak; keta hadomi sasán rai-klaran ida ne’e nian. Imi nia moris subar hela iha Maromak, hamutuk ho Cristo, tan imi mate tiha ona ho Cristo. Wainhira Cristo hiit-An mai hikas, Imi nia moris sei sai kmanek loloós, nu’udar Cristo Ninian, tan Cristo, imi nia moris hun.

Maromak nia Futar Lia.

 

SEQUÊNCIA PASCAL

Sarani sira hananu ba Bibi-Oan sala laek,

hasae iha Páscoa foun. Kasu tiha Nia bibi sira: Ba Aman Maromak,

Cristo Maksoyn soy ema maksalak.

 

Mate ho moris hasouru malu,

Maibé moris nia nain ukun ho kbiit liu tiha mate.

Maria, mai haktuir mai ami,

Buat nebé ó haré iha dalan

 

Ha’u haré Cristo nia rate,

Moris hias, moris ho beran;

Hau hré Anjo sira haklaken

 

Rate fatin ho unuk.

Cristo hamrik housi mate sira nia leet,

Nia ha’u nia laran metin,

imi sei hare Nia iha Galileia.

 

Ami hatene: lós duni,

Na’i Manán tiha mate;

Na’i Liurai sadia ami. Amen!

 

Aclamação                                                                                                                                    1 Cor 5, 7b-8ª

Refrão: Aleluia! Repete-se

Cristo, ita nia Páscoa, hasae ona;

haksolok hahí ita Na’i nia Fatin! Refrão

 

Evangelho (de Manhá)                                                                                                                   Jo. 20, 1-9

 Nai Jesus Cristo Nia Evangelho, nu’udar São João haktuir:

Iha loron uluk semana nian, dadersan de’it, rai sei nakukun hela, Maria Madalena ba to’o rate. Nia haré fatuk boot iha rate nia oin duka hela ba sorin. Tan ne’e, nia halai  fila hikas ba hasouro Simão Pedro ho Apóstolo ida seluk nebé Jesus hadomi. Nia dehan ba sira na’in rua: “Ema lori tiha ona Nai housi rate! La hatene sira tau lós Nia iha nebé!” Pedro ho Apóstolo ida seluk, hamríik ba kedas rate. Sira na’in rua halai hamutuk, maibé Apóstolo ida seluk lais liu Pedro, hodi to’o uluk iha rate. Nia hakruuk hateke ba laran, hodi haré hena sira namkari iha rai, maibé nia la tama. Simão Pedro mos to’o dadaun. Nia tama ba rate laran hodi haré hena sira be namkari iha rai; Nia haré hena mutin nebé hodi falun Jesus nia ulun, la sóe iha rai ho hena seluk, maibé lulun iha fatin seluk. Hafoin, tama mós Apóstolo ida seluk nebé to’o uluk. Nia haré ho matan hodi fiar duni! Tebes, sira neon ladauk nakloke ba lia Escritura nian. Tuir Escritura, Jesus sei moris hias duni housi mate.

Lia Maksoyn.

Leave a Reply

Your email address will not be published. Required fields are marked *