shadow
Diocese de Dili > NOTÍCIAS > LETURA DIÁRIA > DOMINGO II DA PASCOA

DOMINGO II DA PASCOA

ANO A

Premeira Leitura

Lia housi livro Apóstolo sira nia hahalok:

Iha loron hirak nebá, maun alin sira nebé ba rona bei-beik Apóstolos sira nia hanourin, sira haré malu di’ak hodi fahe ha-han ba malu, hodi reza mos ba malu. Ema hot hotu ta’uk; Apóstolos halo kmanek wa’in no buat oin oin de’it. Sira hotu nebé fiar, moris hamutuk, hodi tau hamutuk riku-soin, hodi fahe osan ba malu, tuir ida-idak nia susar. Loron loron sira ba Uma Kreda ho neon no laran ida, sira fahe pão iha uma hodi han ho ksolok ho domin. Sira hahí Maromak. Povo hotu-hotu laran di’ak ba sira. Nai Maromak, loron-loron halibur hamutuk tamba sira ema nebé Nia hakarak soy.

Maromak Futar Lia.

 

Salmo Responsorial                                                                                        (Sal. 117 (118), 2. 4, 13-15, 22-24)

Refrão: Haklaken Maromak, tan Nia di’ak, Nia hadomi nafatin. Repete-se

Israel nia uma laran dehan:

Nia hadomi nafatin!

Aarão nia uma laran dehan:

Nia hadomi nafatin!

Ema hotu nebé hamtauk Maromak, dehan:

Nia hadomi Nafatin! Refrão

 

Sira hakarak halakon ha’u,

maibé, Nai tahan ha’u;

Maromak ha’u nia kbiit,

Nia, ha’u nia maksoyn.

Ema di’ak hananu haksolok,

Na’i nia liman beran boot. Refrão

 

Fatuk ida be ema hewai sai tiha fatuk inan;

ne’e, Maromak nia beran,

nebé, Maromak halo mai ita.

Ne’e, Maromak nia loron;

hawelok hananu ba Maromak. Refrão

 

Segunda Leitura                                                                                                                                   (1 Ped. 1, 3-9)

Lia housi São Pedro nia surat

Maun alin sira: Kmanek ba Maromak, ba ita Na’in Jesus Cristo nia Aman, nebé, tan Nia laran luak, no tan Jesus Cristo nia moris hias housi mate, halo ita moris ba neon metin foun, ba rahun diak ida la aat, la fo’er, la lakon. Rahun-di’ak ne’e, rai hela iha lalehan, ba imi nebé, tan fiar, Maromak nia kbiit tahan imi, atu hetan Maksoyn nebé sei mosu iha loron ikus. Lia hirak ne’e fo ksolok ba imi, maski imi sei hetan babeur no susar, iha loron ruma karik. Nune’e, housi susar nebé mai, tan fiar, imi bele hetan kbiit, di’ak no soyn, iha loron Jesus mosu mai; Fiar folin liu osan-mean nebé bele lakon, maski áhi la han. Imi hadomi Jesus Cristo maski la hatene Nia; hanesan imi fiar Nia, maski la haré, imi nia ksolok ida rohan laek, no beran boot; imi sei hetan rahun di’ak iha loron ikus, tan imi nia fiar: maksoyn ba imi nia klamar.

Maromak Futar Lia.

 

Aclamação                                                                                                                                                  (Jo. 20, 29)

Refrão: Aleluia. Repete-se

Na’i hehan ba Tomé:

“Tan haré, ó fiar;

rahun-di’ak ba sira nebé fiar,

Maski la haré. Refrão

 

Evangelho                                                                                                                                              (Jo. 20, 19-31)

Na’i Jesus Cristo Nia Evangelho nu’udar São João haktuir;

Iha loron hirak nebá, iha loron kraik, loron uluk semana nian, uma nebé Apóstolo sira hela nia odamatan taka metin tan sira ta’uk Judeu sira. Jesus mosu mai hamriik iha sira leet hodi dehan: “Paz hela ho imi!” Dehan tiha nune’e, Jesus hatudu daudaun ba sira Nia liman no sorin Kanak. Haré tiha Jesus, Apóstolo sira haksolok teb-tebes. Jesus lia tun teni ba sira: “Paz hela ho imi!” Nu’udar Aman Maromak haruka Ha’u mai, nune’e mos, Ha’u haruka daudaun imi.” Hotu tiha ne’e, Jesus hu’u iis ba sira dehan: “Simu Espírito Santo! sira nebé imi perdua sira salan, sira hetan duni perdua ba sira salan; sira nebe imi la perdua sira salan, sira la hetan duni perdua ba sira salan. “Tomé, sira sanulu resin rua ne’e ida nebé ema hanaran  Dídimo, nia laiha nebá, wainhira Jesus mosu. Apóstolo sira seluk hateten ba nia; Ami haré ona Na’i! Maibé Tomé hatán ba sira: “Ha’u la haré karik besi-kusan fatin iha Nia liman, ha’u la hatama karik ha’u nia liman iha Nia sorin kanek, ha’u sei la fiar!” Liu tiha loron walu, Apóstolo sira halibur hamutuk fali iha uma laran. Tomé mos iha hotu nebá. Odamatan sei taka metin hela, Jesus mosu mai; Jesus hamriik iha sira leet, dehan: “Paz hela ho imi” Tuir, Jesus lia tun ba Tomé: “Hakbesik ó nia liman fuan mai, hodi haré Ha’u nia liman! Hakbesik ó nia liman hodi hatama ba Ha’u nia sorin kanek! Keta laran to’os, maibé laran mamar atu fiar!” Tomé hasae lia ba Jesus, dehan: “Ha’u na’i, ha’u nia Maromak!” Jesus lia tun teni ba nia: “”Ó fiar tan ó haré Ha’u. Rahun di’ak ba sira nebé fiar maski la haré!” Iha Apóstolo sira leet, Jesus halo tan milagre oi-oin. Milagre hirak ne’e la hakerek iha livro ida ne’e. Ami hakerek milagre iha livro ne’e, atu imi bele fiar katak, Jesus, Maromak Oan mane; Atu nune’e, hodi imi nia fiar, imi bele hetan mos moris rahun di’ak, tan Jesus naran.

Lia Maksoyn. 

Leave a Reply

Your email address will not be published. Required fields are marked *