shadow
Diocese de Dili > NOTÍCIAS > Notícias > Hamoris Moris Foun Povo Maromak Nian

Hamoris Moris Foun Povo Maromak Nian

DCDD – (16/04/2017) Domingo da Páscoa ou Domingo da Ressureição do Senhor, Bispo de Dili; Dom Virgilio do Carmo da Silva celebra missa hamutuk ho sarani tomak iha Sé Catedral Dili. Tan ne’e, iha nia reflexão ba Domingo Páscoa nee hateten: Ita haré Maria Madalena iha momento ne’e iha hela entre nakukun ho naroman, entre kalan ho loron, maibé, nia rasik la hatene kona ba buat nebé nia halo, nia lao deit la tauk hanesan iha Cántico ida iha Bíblia dehan: iha kalan boot nakukun, buka hau nia doben ida nebé hau hadomi. Iha dadersan nakukun Páscoa nian, sira nebé hetan experência diak no forte kona ba domin nian ho Jesus. Maria Madalena rasik, discípulo nebé Jesus hadomi; Pedro nune’e mos feto sira, sinal dahuluk ne’e buat nebé simples los, laos aparição nebé ita dehan Glorioso, nabilan, maibé, hetan rate nebé mamuk iha dadersan. Buat ruma nebé simples nune’e mos laos fácil atu compreende. Maria la compreende  no halai ba Pedro karik mos laos atu anuncia, laos atu haklaken kona ba Jesus Nia moris, maibé, atu denuncia, atu declara hahalok ema aat sira nian. Nia lao ho fuan nebé todan wainhira nia hasoru Apóstolo sira nia dehan; Sira hasai tiha ona Nai! Sira hotu iha dader ne’e halai ba rate: Maria, Pedro, João sira la halai tamba hakarak halai, maibé sira halai tamba razão ida nebé enorme, razão ida nebé imenso, razão ida nebé fó. Wainhira too iha rate, sira hare hena sira iha hela nebá, maibé Jesus nia Isin laiha ona, hanesan ema hasai tiha ona Nia Isin housi nebá.

Bispo haforsa tan: Iha Evangelho dehan; Nia tama iha rate laran hodi hare hena sira namkari iha rai no mos hena mutin nebé hodi falun Jesus nia Ulun ketak housi hena sira seluk. Sira hasai tiha ona Nia Isin housi nebá, sira hetan mak Rate mamuk. Extranho oituan  mai ita katak; iha Domingo Páscoa ne’e, liturgia la haktuir mai ita kona ba Jesus nia aparição kedas, nebé Jesus nia moris hias housi mate, maibé haktuir kona ba rate mamuk. Dala ruma ita husu tamba sa! mensagem saida mak haksumik iha Evangelho ohin ninian.

Bispo haklean tan: Iha razão barak, maibé razão ida mak hakarak husik hela mai ita lisan ida oinsa ema oi-oin, rasa oi-oin, matenek oi-oin, maibé sira nia reagem wainhira descobre katak rate mamuk. Ita hare uluk kedas Judeu sira nia ulun, oinsa sira nia reagem wainhira Jesus sei moris, sira sai ona hanesan obstáculo ida ba Jesus nia hanorin, Nia Doutrina. Sira taka sira nia matan ba verdade, sira preocupa  atu oinsa tau buat hirak nee hotu ba ema nia fiar. Judeu nia ulun boot hirak ne’e reseita Jesus nia moris hias. Hanesan wainhira Jesus sei moris, sira reseita Jesus nia hanourin, Nia milagre sira. Grupo ida seluk ita hare feto sira. Oinsa mak feto hirak ne’e nia reagem, grupo nebé dahuluk descobre rate mamuk no simu housi anjo sira novidade ida katak “Jesus moris hias ona”. Ho fiar tomak sira comunica novidade ou boa nova ba Apóstolo sira. Ita hare oinsa feto hirak ne’e nia curiosidade; deseja atu partilha no buka atu hatene, maibé, contrário ho Apóstolo sira Pedro ho João hanesan ita rona, rona tiha mensagem ne’e halai ba rate no descobre katak buat hotu nebé feto sira dehan ne’e lós. Wainhira sira fila no sira mos hakfodak. Maibé tuir Evangelho sublinha buat ida importante nebé dehan “entre Pedro, João no feto sira ne’e hotu João deit mak ida nebé tama klean iha mistério ida ne’e katak Apóstolo ida nebé Jesus hadomi, Nia laos to’o hare deit, maibé, dehan nia mak compreende, aprofunda kona ba nia hare no fiar hanesan Evangelho São João nian dehan; Escolante nebé to’o uluk ba rate, nia hare hodi fiar”. Iha oras ne’e sira nia fiar ladauk nakloke ba lia Escritura nian katak Nia sei moris hias duni housi mate, nia hare no nia fiar.

Bispo dehan tan: Escolante nebé halai uluk mak João ida nebé Jesus hadomi nia mak to’o uluk iha rate hodi hateke ba rate laran, maibé nia la tama nia hein Pedro to’o atu tama uluk. Tamba sa João to’o uluk maibé Pedro nebe ikus mak tama uluk? Razão simples tamba Pedro katuas liu e tamba Pedro mos Apóstolo sira nia ulun. Tan iha consideração ida ne’e, João maski nia lais, maibé nia iha consideração ba ida nebé boot iha nebe deit Jesus entrega ba nia atu ukun. Depois de hasoru malu ho Jesus, sira nia hanoin sira, sira nia ksolok, sira nia terus no sira nia futuro, laiha buat ida nebe sira sente katak bele haketak fali sira ho Jesus nebe moris hias fali housi mate. Laiha ema ida nebe hetan buat hirak nee;  Apóstolo nudar sira nia moris ida nebe fahe episode rua nebe premeira Parte sira nia moris antes Jesus ressureição, maibe depois de Jesus nia Ressureição involve sira ida-idak transforma fali, sai ema nebe atu partilha ida nee,  lori ita mos atu hanoin, maibe ida mos mai ita nia encontro ho Jesus.

Bispo hateten tan: infelizmente sarani barak nebé tuir Jesus nia terus, tuir Jesus nia mate, maibe dala barak ita remata ita nia viagem hamutuk ho Jesus iha rate mamuk, ita termina ita nia viagem ho Jesus iha rate mamuk. Ba sira pascoa nee Comemoração Jesus nia ressureição ba 2017, liafuan seluk katak Jesus moris hias housi mate sira la tuir conselho São Paulo nian ba sarani sira iha Roma nebe dehan; “mate ba sala atu moris ba moris foun ida iha Cristo. Sira la partilha iha moris, moris Espírito nian, tan ne’e sira la hetan paz no la hetan ksolok. Dala barak mos ita bele fo Boas Festa da Páscoa, maibé ita nia lia-fuan mamuk, laiha significado nebe klean. Ida nee laos falhanso ida housi Jesus nia mate, Jesus hakarak manifesta nia-An ba sira, maibé sira taka sira nia fuan ba Jesus. Hanesan Apóstolo sira dehan ema bulak sira taka sira nia uma atu prevene loron matan fo naroman ba uma laran. Sira koko, sira hili hakarak moris nafatin iha nakukun laran. Los duni laiha força ida iha mundo ne’e atu prevene tan Jesus nia moris   hias, maibe nia la obriga nia An atu tama iha ema ida-idak nia fuan, se ema nee la loke nia fuan ba malu. Ha’u hanoin ida nee verdade ida, ida ne’e mos conselho ida mai ita mos. Jesus convida ita hotu atu respeita ita nia liberdade.

Liutan nee Prelado nee ascentua : Tempo Páscoa nian, ita gosta fila fali ba ita nia família, ba ita nia knua halibur hamutuk nudar família atu participa Festa Páscoa; nudar família mak ita hasoru malu ho Cristo nia moris hias. Ida ne’e atu Jesus nia moris hias hasoru ita nudar família, halibur hamutuk iha Creda. Creda ne’e laos uma, maibé ema sarani nebé fiar iha Jesus moris hias, ita nebé halibur hamutuk tamba Jesus mak convida ita, Nia promete hakarak hasoru malu ho ita, nia garantia ba Apóstolo sira liu housi feto sira katak; Ha’u sei hasoru sira iha Galileia, iha neba mak sira hare Ha’u. Jesus deseja atu manifesta nia-An mai ita. Buat nebé ita precisa halo mak ne’e; loke odamatan, loke Janela, ita nia fuan atu iha arrependimento ida sincero , ne’e mak Jesus nia naroman bele halakan, Nia ksolok bele conquista ita nia tristeza. Nia moris hias bele troca ho mate sala nian nebé iha ita ida-idak nia laran. São João paulo II nia lia-fuan nebé continua nafatin hodi dehan; “loke odamatan ó nia fuan nian ba Cristo”. Atu loke odamatan;  ita nain mak tenki loke laos ema seluk mak loke, ita nain mak sente necessidade ida nee atu loke ita nia odamatan ba Maromak.

Mai ita hare iha segunda leitura São Paulo nia Surat ba sarani sira iha Coloso nebé dehan; Maun alin sira: Imi moris hias ona ho Cristo! Tan ne’e, imi sei tau deit matan ba sasán leten nian. Iha lalehan, Cristo moris, tur iha Maromak sorin kuanan. Imi nia laran sei monu de’it ba lalehan nia di’ak; keta hadomi sasán rai-klaran ida ne’e nian. Imi nia moris subar hela iha Maromak, hamutuk ho Cristo, tan imi mate tiha ona ho Cristo. Wainhira Cristo hiit-An mai hikas, Imi nia moris sei sai kmanek loloós, nu’udar Cristo Ninian, tan Cristo, imi nia moris hun. Ida ne’e ita tenki koko iha ita nia an, saida los mak ha’u nia preocupação, saida los mak hau nia hanoin, saida mak finalidade iha hau nia moris, moris ba hau katak sá, facil  duni mai ita atu monu fali husi naroman ba iha nakukun, atu hahu dalan ita lao ksolok nebé mamuk, lao dala ida tan ba buka fali paz iha fatin nebé mak lolos la iha paz, buka moris iha fatin nebé laiha moris, fatin nebé lolos laiha justiça, fatin ida nebé lolos laiha lialos. Paulo mos la obriga ita keta han, keta hemu, keta pasiar, husik ita nia preocupação  lor-loron nian, maibé nia bolu ita nia atenção; keta hakanek ita nia demais, keta habokur ita nia an demais, keta buka ksolok isin ninian demais too haluha rai tiha. Mentalidade ida nee ita hanaran mentalidade Hedonismo katak buka ksolok isin ninian to haluha tia Cristo iha ita nia moris. Basá nia mak razão ba ita nia moris. Ponto ida nebé importante precisa tau iha ita nia neon, Paulo hakerek nia surat ba sarani sira Coloso ho intensão atu surat ne’e bele lee ba sarani sira hodi rona wainhira  sira halibur hamutuk; fo hanoin fali kona ba prova ida nebé dehan: Nai hakarak mundo tomak atu rona mensagem salvação ninian atu liu husi rona mak ema bele fiar, husi fiar mak ema sei hatene tau iha esperança, wainhira iha esperança mak ema hadomi. Ita rona buat barak maibé ita mos la too atu rona deit, buka atu tau mos ita nia esperança iha Maromak. Paulo hakarak sarani sira atu realiza buat rua: primeiro sarani sira nee hasoru malu ho Cristo moris hias iha liturgia Domingo ninian, tenki bolu sira atu partilha sira nia moris mais intenso, atu hametin sira nia paz iha sira nia leet no atu nune’e, sira mos hadaet ksolok ida ne’e iha sira nia moris lor-loron. Segundo; Paulo mos hakarak Domingo-Domingo  wainhira  ita hasoru iha Cristo tenki tulun mos ita ida-idak atu nunee pronto ba encontro ikus ida nebé Paulo dehan iha nia surat wainhira Cristo hatudu nia An ba nia; Nia mak ó nia moris, atu ó mos sei hatudu buat hotu-hotu ho Nia. Ne’e duni leitura sira nebé foin ita rona hakarak husik hela conclusão haat: primeiro dehan la iha força iha mundo nebé bele prevene Jesus husi moris hias husi mate. Espírito Maromak nian iha nia mak makas liu. expressão oi-oin iha Sagrada Escritura Aman mak halo nia moris hias, Espírito Maromak nian maka foti  Nia moris hias hodi Nia kbiit rasik. Ne’e hotu atu dehan deit katak Jesus moris hias husi mate tan Nia Maromak duni; Segundo atu salva la too atu confessa ou professa katak Jesus moris fali ona husi mate. Ita tenki moris fali ho Nia husi mate sala ninian no moris iha Cristo.

Ikus Liu Bispo Residencial nee taka ninia reflexão hodi dehan : Celebração Domingo nian mak momento especial ida nebé Cristo hatudu nia An ba comunidade Cristã. Jesus ansi atu comunica Nia moris, ansi atu comunica paz, ansi atu comunica Nia ksolok, maibé ita ida-idak tenki ajuda mos atu loke ita nia fuan;  atu ksolok ne’e bele hetan fatin iha ita. Jesus mak força;  buat ida nebé Nia labele halo mak obriga Nia hakarak ne’e no obriga atu tama iha ita nia fuan; Terceiro, cada encontro ho Jesus nebé moris hias, prepara mos ita ba iha revelação ikus nian iha ita nia moris wainhira Nia sei partilha Nia moris iha paz no ksolok, wainhira ita nia fuan sei bele simu, sei bele lao ba oin. Ponto ida ikus kona ba, ita nia fiar sarani hari iha Jesus nia ressureição, hari iha Jesus nia moris hias. Ita nia fiar sei la iha paz;  se Jesus la moris hias hikas. Tan ne’e, São Paulo expressa ida ne’e furak los iha ninia surat ba Corinto. Hau kaer passagem ida ne’e atu sarani sira mos bele rona no hanoin Jesus Nia moris hias ida ne’e atu ita reflecte oituan. São Paulo dehan; Oras ne’e hau halo imi hanoin fali maun alin sira; evangelho nebé hau haklaken ona ba imi. Imi simu tiha ona no imi hamriik metin, husi Nia, imi hetan Maksoyn, imi laran metin deit katak lia fuan nebé hau haklaken tiha ona ba imi ka imi fiar leet deit karik, ba hau saran ba imi nudar buat nebé folin boot liu buat hotu-hotu, hau mos sei dehan Cristo mate tan ita nia sala tuir Escritura ema hakoi Nia liu tiha loron tolu Nia moris hias katak Nia moris mosu ba Keifas, tuir mai mosu ba sira sanulu resin rua, ne’e hotu tiha Nia mosu ba maun alin nain atus lima resin iha tempo ida deit no sira barak sei moris dadaun, maske balu toba tiha ona, tuir mai Nia mosu ba Tiago hafoin ba Apóstolo sira hotu, ikus mai mak hanesan ba ema nebé mak moris mai iha tempo loloos Nia mosu ba Paulo, basá iha Apóstolo sira leet ha’u mak kiik liu no la soi atu hanaran an apóstolo basá hau fo terus ba Maromak Nia Kreda, maibé tamba Maromak nia graça, hau sai buat ne’ebe hau hakarak no Nai nia graça iha hau la leet deit. Ne’e duni hau serviço  makas liu fali sira hotu, lolos laos hau, maibé Maromak nia graça iha hau laran. Ne’e duni biar hau nune’e karik ba; ami haklaken ho fiar ba imi Jesus moris hias duni ona. Ida ne’e hau hanoin boa nova ida ba ita hotu ohin Celebra ita nia loron boot loron Páscoa basá Festa Páscoa Festa ida nebé boot liu hotu ba ita sarani sira.

Leave a Reply

Your email address will not be published. Required fields are marked *