shadow
Diocese de Dili > NOTÍCIAS > Notícias > Beiala Sira Nia Fiar Klean Tebes

Beiala Sira Nia Fiar Klean Tebes

DCDD Dom Virgilio hateten; Los duni uluk ita nia avo sira nee la fiar karik ita mos labele sai sarani. Ita sai sarani tamba sira fiar iha Maromak soque Maromak ida nebe ikus mai Jesus mai revela nia-an hodi terus no mate iha ita nia leet, ikus mai ita hatene katak Maromak los mak ida nee. Lia hirak nee mahein Diocese Dili Dom Virgilio do Carmo da Silva hatoo wainhira halao nia visita ba iha foho Darlau Estação Nossa Senhora de Fátima Leimea, Paróquia São José Atsabe Sábado foin lalais nee (29/04/2017)

Iha biban nee Dom Virgilio hateten: Naroman ida nee mak ita hakarak, katak liu housi ita nia uma lisan sira, liu housi fatin nebe ita halibur hamutuk, maibe lori ita ba iha Maromak ida deit. Ita nia beiala sira mos considera foho ne’e fatin lulik no santo, tamba liu housi foho ita sente besik liu ba Maromak, atu hahi Maromak, atu sente Maromak nia presença iha ita nia leet.

Bispo reforsa tan katak: Agradece ba amo Pároco, ba lianain sira, katuas no família sira hotu nebe hamutuk decide atu halo fatin nee no entrega fatin ida nee ho símbolo lubuk ida nebe hahu ho loke odamatan no entrega mai hau Rota ida nebe dehan; ho Rota ida nee loke fila fali odamatan hodi husik buat nebe nakukun nian ita tama ba naroman nian. Além nee hisik mos Águabenta ba iha animal hodi husik buat nebe uluk nian agora ita hakarak atu foti buat nebe foun nian tamba se ita hanoin didiak fiar nee laos ita mak hahu ita nia beiala sira uluk fiar tiha ona. Uluk ita nia beiala sira nee iha fiar maibe Maromak nia naran sira la hatene, sira adora hodi temi Maromak ida iha neba ba iha fatuk, ba iha foho, maibe too deit iha neba.

Sorin seluk, Pároco São José Atsabe Pe. Arnaldo Frederico de Deus haktuir mos katak: Bispo nia visita mai iha foho Darlau hodi celebra eucaristia iha foho ida nee ho Intensão atu loke odamatan nakukun nian ba naroman no tau fatuk ain ba Cruz Darlau. Cruz ida nee sei acompanha ho estátua Sagrada Família da Viagém nebe ho reflexão katak Nain Feto ho nia kaben São José lori Jesus iha Bíblia nebe dehan lori Jesus halai ba Egipto, maibe iha ita nia reflexão iha foho Darlau ida ne’e atu hametin sarani sira nia fiar liu tan katak Nain Feto ho são José lori Jesus halai ba too Cruz, cruz ida nebe husi nia Jesus fakar nia ran atu kasu ita nia salan, salva ita no halibur fila fali ema nebe hosi otas ba otas fahe malu no haketak malu, Cruz ida nebe housi Nia liga rai ho Lalehan nebé iha tempo naruk kotu tamba ita monu ba sala tamba ita hakarak tamba ita nia beiala sira hakara hatene buat hotu hodi hadookan housi Nai Maromak.

Pe. Arnaldo haktuir tan katak: Iha reflexão foho ida nee nian tuir cultura cruz mak liga fali ita ho Nai Maromak wainhira ho reflexão Cultura dehan Kalik talin kotu. Nee duni ita mai iha Eucaristia nebe ita celebra tiha ona nee atu ho cruz bele hatutan fila fali. Liu husi cruz hanesan escada, ita atu hakat ba too leten. Tan nee ho reflexão ida nee halo ita reflecte hamutuk ho beiala sira nebe housi otas ba otas. Hau fiar katak beiala sira nee mak hatan no simu ita mak ita mai too iha fatin ida nee. Ita sei fiar no laran metin liu tan katak ho cruz nebe hari iha foho Darlau nee, ita sei forte liu tan iha ita nia fiar, ita sei la hetan susar wainhira lao iha dalan hotu-hotu nebe ita lao ba ikus liu. (C/Q)

Leave a Reply

Your email address will not be published. Required fields are marked *