shadow
Diocese de Dili > NOTÍCIAS > LETURA DIÁRIA > DOMINGO III DA PÁSCOA

DOMINGO III DA PÁSCOA

– ANO A –

 

 

Primeira Leitura                                                                                                                               (Act.  2, 14, 22-28)

Lia housi livro Apóstolo sira nia hahalok

Iha loron Pentecostes, Pedro hamriik ho Apóstolo sanulu resin ida, foti lian, hateten ba povo: “Ema Israel sira, rona lia hirak ne’e: Maromak tau Jesus Nazaré, iha imi nia leet, hodi halo kmanek no ksolok oi-oin, kmanek nebé hodi Nia, Maromak halo ba imi, nu’udar imi hatene. Saran tiha ba mate, tuir lia hakerek nanis no Maromak Nia hakarak, imi oho Nia; ema aat sira hedi Nia ba Cruz. Maromak halo Nia moris hias, hasai Nia housi susar mate-bian sira; tan mate labele ukun Nia. Nune’e, David dehan kona ba Nia: “Ha’u haré nafatin Maromak iha ha’u nia kwanan, atu ha’u keta hetan susar. Tan ne’e, ha’u klamar haksolok, ha’u ibun hananu ho ksolok, ha’u isin hein ho laran metin. Keta husik ha’u hela iha mate-bian sira fatin; Keta halo ita nia santo hetan aat ba isin. Ita hanourin dalan moris mai ha’u ita sei halo ha’u haksolok nafatin iha ita nia futar oin.

Maromak Futar Lia.

 

Salmo Responsorial :                                                                                               Sal, 15 (16), 1-2ª 5, 7-8, 9-10, 11

Refrão : Na’i hatudu mai ha’u, dalan maksoyn. Repete-se

 

Maromak, ha’u nia soyn, tahan ha’u.

Ha’u dehan ba na’i : Ita  ha’u nia di’ak.

Na’i, Ita ha’u nia liman rohan,

ha’u nia moris iha Ita liman. Refrão

Na’I, ha’u nia dalan, ha’u hahí Ita;

kalan loron, ha’u klamar hahí.

Na’i iha nafatin ha’u oin,

ho Na’i ha’u la hetan susar. Refrão

Ha’u klamar haksolok hananu,

ha’u isin hein ho laran metin.

Na’i la husik ha’u mate leet,

la husik Nia atan hetan aat ba isin. Refrão

Na’i hatudu dalan maksoyn;

sei moris ho ksolok iha Na’i Nia sorin,

rahun di’ak nafatin iha Na’i Nia sorin. Refrão

 

Segunda Leitura                                                                                                                                       (1 Pe. 1, 17-21)

Lia housi São Pedro nia surat :

Doben sira: Imi harohan hanesan Aman, Ida nebé la fihir ba ema nia di’ak, halo Justiça tuir ida idak nia hahalok. Buka moris ho tauk, iha tempo nebé imi sei moris iha rai. Imi hatene lolós: Laós ho buat nebé bele lakon – osan mean no mutin – hodi hasai imi housi moris aat nebé imi nia aman sira fo ba imi; maibé, ho Cristo Nia Ran kmanek, Bibi Oan mós, sala laek. Hatene tiha ona Nia, molok mundo ne’e mosu; mosu mai tan imi, iha loron ikus ne’e. Tan Nia, imi fiar Maromak, nebé halo Nia moris hias housi mate hodi haraik  kbiit ba Nia. Nune’e, imi nia fiar, imi nia laran metin sei hela nafatin ho Maromak.

Maromak Futar Lia.

 

 

Aclamação                                                                                                                                                      (Lc. 24, 23)

Refrão: Aleluia.  Repete-se

 

Na’i Jesus, loke mai Escritura sira;

ko’alia mai ami no hamanas ami nia fuan. Refrão

 

Evangelho                                                                                                                                                  (Lc. 24.13-35)

Na’i Jesus Cristo nia Evangelho

nu’udar São Lucas haktuir :

Iha tempo nebá, Jesus nia Escolante Na’in rua la’o ba knuan ida naran Emaús, besik kilómetro sanulu resin rua housi Jerusalém. Sira hateten hela kona ba buat hirak nebé mosu ona. Sei hateten hodi haksesuk hela, Jesus rasik besik ba hodi la’o ho sira. Maibé, sira matan ladauk mos atu hatene Jesus. Nia husu ba sira: “Imi hateten lós sá ida ba malu, wainhira imi la’o? “Sira hamriik hodi hakfodak tiha. Sira ida naran Cléofas, simu dehan: “Ó, Jerusálem nia emar mesak de’it mak lahatene buat hirak nebé mosu iha loron hirak ne’e! Jesus simu ba sira: “sá mak mosu?” sira simu teni: “Buat sira nebé kona ba Jesus Nazaré; Nia Profeta ida beran boot iha lian no hahalok, iha Maromak no povo sira oin: sacerdote no na’i ulun sira saran Nia atu oho hodi hedi Nia ba Cruz. Ami hein katak Nia atu mai soy Israel. Maibé, liu ona loron tolu mak buat hirak ne’e mosu. Feto balu, housi ami, mai halo hakfodak ami: dader san de’it, sira ba rate, sira la hetan Jesus nia isin; sira mai dehan mos katak haré Anjo balu, nebé dehan katak Jesus moris. Ami nia maluk balu mos ba to’o rate hodi hetan buat hotu hanesan feto sira haktuir. Maibé, ami la haré Nia. Jesus dehan ba sira: “Imi ne’e, ema beik no neon badak atu fiar lia nebé Profeta sira hanourin. Messias sei la terus buat hirak ne’e hotu atu tama iha Nia glória?” Hafoin hahú ko’alia kona ba Moisés no ba Profeta sira seluk, hodi hanourin lia nebé Escritura haktuir kona ba Nia. Besik ona knuan nebé sira ba, Jesus halo fodik la’o liu de’it. Maibé, sira husu, hodi dehan ba Nia: “Hela ona ho ami, basá loron monu ona, rai mos nakaran daudaun.” Jesus tama atu hela ho sira. Hola tiha fatin iha messa ho sira, Jesus kaer pão, fo tiha bensa, hafoin, silu fahe ba sira. Iha oras ne’e, sira matan nakloke hodi hatene Jesus. Maibé, Jesus lakon tiha iha sira oin. Sira dehan ba malu: “Ita laran la manas, wainhira Nia ko’alia tuir dalan hodi hanourin Escritura?” Sira hamriik kedas, atu fila ba Jerusalém. Sira hetan sira na’in sanulu resin ida hamutuk hela ho maluk seluk, hodi dehan ba sira: “Tebes, Na’i moris hias duni no mosu ona ba Simão.” Sira hahú haktuir buat hirak nebé mosu iha dalan; hodi dehan mos oin sá Jesus loke sira matan wainhira fahe Pão.

Lia Maksoyn

Leave a Reply

Your email address will not be published. Required fields are marked *