shadow
Diocese de Dili > NOTÍCIAS > LETURA DIÁRIA > DOMINGO IV DA PÁSCOA

DOMINGO IV DA PÁSCOA

ANO A

Premeira Leitura,  Act. 2,14. 36-41

Lia Housi Livro Apóstolo sira nia hahalok

Iha loron hirak Pentecostes, Pedro hamrIik ho Apóstolo sanulu resin rua, foti lian hateten ba povo: “Israel nia uma laran tomak hatene lolós ne’e: Maromak halo Na’i Messias Jesus nebé imi hedi ba Cruz.” Rona tiha lia hirak ne’e, sira nia laran hakfodak hodi husu ba Pedro no ba Apóstolo sira seluk: “Maun sira, ami sei halo lós sá?” Pedro simu ba sira: “Hakribit imi nia salan; idak-idak simu baptismo hodi Jesus Cristo nia naran, atu bele hetan perdua ba imi nia salan. Hafoin, imi sei simu Espírito Santo nia kbiit. Cristo hameno kbiit ida ne’e ba imi, ba imi nia oan sira, no mos ba sira hotu nebé ita nia Maromak bolu housi dook.” Ho lia-fuan wain liu tan, Pedro hanourin sira hodi fó laran kman ba sira. Nia dehan teni: “Buka sai housi moris aat ida ne’e.” Sira simu Pedro nia lia-fuan sira, hodi simu baptismo. Iha loron ida ne’e, ema besik rihun tolu ba hamutuk ho Apóstolo sira hodi Simu baptismo.

Maromak Futar lia  

 

Salmo Resposorial                                                                                      (Sal: 22 (23), 1-3ª, 3b-4, 5, 6)

Refrão : Maromak ha’u nia maksoyn: Sá sei susar mai ha’u

 

Maromak ha’u nia maksoyn, ha’u la susar,

halo ha’u hakmá iha fatin kmook,

lori ha’u ba we-matan di’ak,

haraik kbiit mai ha’u isin. Refrão

 

Lori ha’u ba dalan di’ak

atu hahí Nia naran.

Liu housi nakukun, ha’u la ta’uk,

Maromak ho ha’u, tahan ha’u nafatin. Refrão

 

Iha ema aat sira oin

Na’i tau mesa nakonu.

Tau mina santo iha ha’u ulun,

ha’u kusin nakonu too suli. Refrão

 

Na’i nia laran luak tahan ha’u

iha ha’u nia moris tomak.

Ha’u sei hela iha nia kadunan

Iha ha’u nia moris tomak. Refrão

 

 

Segunda Leitura                                                                                                                (1 Pe. 2. 20b – 25)

Lia housi São Pedro nia surat

 Doben sira: Tan halo di’ak imi hetan terus, imi sei hetan di’ak iha Maromak futar oin. Ba ne’e mak bolu imi, hodi hanourin atu imi tuir nia ain fatin. Nia la sala ida, housi nia la sai lia aat ruma.Wainhira ema dehan aat nia, Nia la selu ho aat; Wainhira terus, la selu ho lia hatátan. Nia saran An ba Maromak nebé tesi lia lós deit, Iha Nia isin, Nia lori ita salan hodi terus iha cruz; atu nune’e, mate tiha ba sala ita bele moris hanesan ema santo. Tan Nia kanek, mak imi hetan di’ak. Imi, uluk, hanesan bibi la’o sala dalan, maibé, oras ne’e, imi fila fali ba Bibi-Atan, ba Ida be tau matan ba imi.

 

Maromak Futar Lia

 

Aclamção                                                                                                                                            (Jo. 10, 14)

Refrão : Aleluia, Repete-se

Ha’u bibi atan di’ak:

Ha’u hatene Ha’u nia bibi sira

Sira hatene ha’u. Refrão

 

Evangelho                                                                                                                                       (Jo. 10, 1-10)

Na’i Jesus Cristo nia Evangelho nu’udar São João haktuir:

Iha tempo nebá, Jesus hateten nune’e: “Tebes, Ha’u dehan tebes ba imi: Ida nebé la tama housi lutu-matan, maibé tama housi fatin seluk, ema ne’e, na’ok-ten ida. Maibé, ida nebé tama housi lutu-matan, Nia mak bibi-na’in. Nia bolu bibi sira hodi sira naran, hodi lori sira ba liur. Hafoin, hasai hotu tiha nia bibi sira, nia sei ba uluk, loke dalan; bibi sira sei tuir nia, tan hatene nia lian. Maibé, bibi sira sei la tuir ema leet ida; sei halai housi nia, tan sira la hatene ema leet nia lian.” Ne’e, lia nebé Jesus tanesan ba sira nebé rona; maibé, sira la hatene Jesus ko’alia kona ba sá. Jesus dehan tan ba sira: “Tebes, Ha’u dehan tebes ba imi: Ha’u ne’e bibi sira nia lutu-matan. Ema hotu nebé mai uluk liu Ha’u, sira mesak na’ok-ten no ahu-na’in; maibé, bibi sira la rona sira lian. Ha’u lutu-matan. Ida nebé liu housi Ha’u, sei hetan Maksoyn; nia sei tama, sei sai hodi hetan du’ut matak. Ema na’ok-ten mai atu na’ok, atu harahun de’it. Ha’u mai atu ema hetan moris, hodi moris di’ak liu tan.”

Lia Maksoyn.

Leave a Reply

Your email address will not be published. Required fields are marked *