shadow
Diocese de Dili > NOTÍCIAS > REFLEXÃO > HANAI BA KNAAR, DIREITO NO LIBERDADE FETO

HANAI BA KNAAR, DIREITO NO LIBERDADE FETO

  • SITUAÇÃO SÓCIO-POLÍTICO-CULTURAL LADAUK FO FATIN LUAN BA KNAAR, DIREITO NO LIBERDADE FETO NIAN;
  • APOIO BÁSICO BA FETO NIA LUTA.

Husi : Domingos de Deus Maia

(+67077762489)

 

SITUAÇÃO SÓCIO-POLÍTICO-CULTURAL LADAUK FO FATIN LUAN BA

KNAAR, DIREITO NO LIBERDADE FETO NIAN

          Contexto reál sócio-político-cutlural housi rai-liur, nune’e mos, housi rai-laran, mak sai sasukat ida hodi tetu (determina), iha loron ruma,  wanhira contexto ne’e duni nakloke ona ba mundo, hodi reflecte sá maka prinsípio universál sira kona-ba luta atu defende knaar, direito no liberdade feto nian.

          Hatudu tiha ona iha História Salvação nian, katak Eva, feto nebé maka representa ona klibur feto sira nebé monu tiha iha situação hirak nebé difícil tebes; maibé ho Maria nu’udar feto-raan no inan ida, representa mos inan sira hotu nebé maka hamriik metin nafatin iha situação hatauk (ameassada) hodi hakat liu sistema oin-oin nebé mak hatodan, hanehan no  viola feto sira nebé luta daudaun hodi harí hikas dignidade feto nian hanesan ho mane nian, iha fatin nebé deit no iha cultura hotu-hotu.

          Ha’u nia predicção katak iha biban ba campañe prezidensial Ângela Freitas nian, maske la dúvida, katak nia sei hetan apoio housi klibur feto nian ida ka rua; no mane lubun ki’ik-oan ida mos sei tahan-an hamriik iha ambaun-okos/campo-laran hodi se tilun rona nia lian-sadik husi discurso político campañe nian. Maibé, ha’u sente mos katak ema nobun-boot, (tuir fenómeno sócio-político-cultural rai-laran nian), mak sei haliis liu ba apoia candidato (masculino) sira nebé mak iha/soi ona experênsia luan no iha tiha duni ona sira-nia sentido afetivo (moris-mate ho povo ba luta) maka sei hetan/iha liu comfiança boot housi povo ida ne’e, nia maioria, atu simu knaar ukun Nação foun ida ne’e.

          Ha’u-nia matan-fihir (la’os matan-dook) ne’e bajeia ba contexto sócio-político-cultural nebé, ha’u temi tiha ona, iha kotuk, katak tanesan ho kalohan-mutin tatérik, iha dadeer-saen, sei terik netik hela tatiar loro-matan nia roman-lakan nabilan ba ema hotu (matan-delek no matan-melek sira); tanba candidata independente Ângela Freitas, ho nia número sorteiu candidatura neen (6) ba eleição Presidensial nian ne’e makhoris-feto (feminino) ida, nebé brani hamosu-an iha contexto (sócio-político-cultural) local ida nebé ladauk nakloke hodi fó biban-leet nakonu ba feto sira atu hatudu kbiit, direito no liberdade tomak, nebé sei haksumik hela iha kalohan-mutin taterik ne’e nia kotuk ba. Exemplo balun atu justifica situação ida ne’e, ita bele foti housi rai-laran no mos housi rai-liur hanesan tuir mai ne’e :

  • Hahusuk ida: Nebé, fatór hirak nebé determinante hodi hamihis no hatuun tiha feto sira-nia knaar, direito no liberdade moris, iha contexto “sospolkul”, Timor-Leste nian, maka nebé deit?

          Maski ita fihir katak situação sócio-político-cultural (sospolkul) iha rai-laran sidauk nakloke nakonu hodi fó biban-luan ba expressão knaar, direito no liberdade feto nian; maibé, bainhira tanesan ho rain seluk-seluk nian, bele afirma, Timor-Leste la sai aat liu rain barbarak iha globu terrestre ne’e. Timor-Leste, nu’udar Nação foun ida, iha milénio 2001 ne’e, foin maka Ukun An de’it, iha tiha sanulu resin nia laran; maibé, nia apresentação kona-ba igualdade Género no emansipação feto boot dadaun ona iha campo sócio, político, cultural, inclui campo religioso (ex. Iha partido, PN, Governo no Creda); katak feto sira hola ona knaar no fatin 30% (trinta por cento) liu.

          Maibé, ita simu mos situação reál ida, katak dala barak ona acontece, maski iha cotação ba feto sira, iha concoréncia ba vagas-xefia hirak nebé aas iha Ministério no Instituição sira Governo nian (hanesan DG, DN); maibé husi feto sira, barak mak sidauk hatudu sira-nia mentál-brani atu simu knaar todan hirak ne’e. Ida ne’e sai desafio boot ida mai ita, no liu-liu, ba feto maluk sira, atu tau-matan ba formação liderança feto nian hodi hakat tuir banati liderança inan-feton sira seluk nebé, maski sira-nia história ladauk hakerek hotu, hahú husi tempo uluk bei-ala sira nian, mai to’o iha tempo resisténsia no Ukun Rasik An (Independéncia) nian, ohin loron. Maski nune’e, ho situação reál hirak ne’e reflete ona fatór-indicador ida nebé maka hatudu duni katak Timor-Leste sei sai di’ak liu fali Nação barak iha Mundo Oriente no iha Ásia ka Sudoeste Asiático nian.

  • Lala’ok Cultura Beiala sira Hanai Aas Dignidade Feto nian :

           Iha tempo uluk liu, iha ita-nia rain, mosu comunidade ulun sira nebé mak sei moris-nómaden no hourik deit iha foho-tutun no fatuk-kuak sira, hanai nanis ona feto sira nia dignidade no igualdade género. Exemplo, sira temi feto no mane sai paridade ida deit (naktabit): “Builelo-Maulelo; Buibere-Maubere….”; ka bolu-hasae ho naran oan-mane ka oan feto da-uIuk, ka sobrinho/a sira nebé mak sira hadomi liu. Ex : “Maubere-inan, Maubere-aman…”; “Dauber-ina-Dauber-ama…” (Daubere-nia inan, Daubere-nia aman).

          Iha Sistema Familiar-Patrilinear, nebé mak determina derasaan husi klibur feto-saan/mane-foun sira nian tenki hakruuk ba derasaan husi klibur uma-mane sira. Bainhira feto ida atu sai ba kaben ho mane ida housi nia liñagem-tuanangan, la temi ho liafuan (conceito) “hafolin” (Mambae: hin-helin); maibé, sira uja termo consetuál originál fahe-fini (hin-haen). Katak feto mak sai fini-nakbokar moris nian hodi fahe-tutan, halekar no hadaet ba derasaan foun hodi habarak tan ema nabutuk-naresin, la kotu, la nahas ba; tan ne’e, maka mosu lala’ok cultura hanai feto nu’udar “inan-maromak”. Katak feto mak makhoris ida nebé, iha Maromak futar oin, soi nia dignidade moris aas liu makhoris sira seluk no sasaan hirak mundo ne’e nian. Sasaan (dotes) nebé fó ba malu (husi sorin-rua), la’os sai buat folin ida; maibé sai nuudar símbolo-moris no relação-metin ba malu (hina tlo maena, maena tlo hina; beula be kdout, baea be tdaes) atu sira tane-malu nu’udar feton no naan, hodi sai maluk ba nafatin, belun ba nafatin, la kotu, la nahas.

          Iha fali moris haktuir Sistema Matrilinear nian, nebé existe iha suco balun (ez. Bunak no Tetun) maka entre lidun uma-kain sira, hatuur sira-nia posição hanesan. Iha prática culto-Kaben nian, sira temi ho naran (conceito) rua ka tolu: Kaben-sai, kaben-tama no kaben sai-tama, katak hanesan deit, bele bele tetu hili tuir situasaun. Maibé, ha’u ladauk soi atu esplica tuir sira-nia conceito loloos kona-ba feto.

          Feto no inan sira mos sai funu-nain, lia-nain no ukun-nain (maski la hakerek iha história). Maski, iha tempu uluk, sira-nia fatin-bok no competénsia atu tetu-lia no hala’o ukun sei klot (limitado) hela deit ba sira-nia suku rasik; maibé dala ruma, bele hakat sai liu ba klan balun besik. Exemplo, iha área Ramelau-Huun nebá, sei bele temi, tuir memória, naran lia-nain feto balun hanesan: Talimeta no Bihoda, lia-nain fetonain ruan, bin-alin husi Knua-Lulik Liurai-Talihualala; ha’u-nia abó-feto rasik, naran Biluma, mos sai lia-nain feto ida no soi kbiit atu tetu-lia moris-lia mate nian; iha Área Maubisse no Aileu, Suku-Liurai Bandeira-Huun (1997), ha’u sei toman lia-nain no ukun-nain feto balun, (karik mate ona?), iha tempu okupasaun. Nune’e, fó fiar ba ha’u katak iha fatin seluk, iha Timor-Leste laran, mos eziste tiha ona lia-nain no ukun-nain feto sira; maske ema ladauk hakerek sira-nia história.

  • Hahusuk seluk : Sê nune’e, hatudu tok fatór concreto hirak nebé hanehan no hatuun feto nia knaar, direito no liberdade, husi/iha rai-laran?

          Hatan lalais deit katak iha duni. Iha situação funu; sistema ukun liuraismu, sistema faxismo no sistema cultura nian, iha tempo passado, mak hamiis no hatuun tiha knaar, direito no liberdade feto nian. Exemplo  barak bele foti: (i) Liurai sira (la’os hotu-hotu), iha tempu ukun koloniál nian, hodi sira-nia kbiit-ukun liurai mian mak domina; sira hola feto barak hodi satisfaz deit sira-niagostu egoístiku no, ikus mai, soe hela feto sira ne’e balun ho oan sira, la tau-matan tan ba (habis manis, sepah dibuang); (ii) iha funu, mane sira mak bele ba halo funu, ne’e, bele simu; maibé, feto sira sira sai vítima nafatin iha uma ba violasaun (kekerasan) husi mane ho kbiit ukun no forsa militar. Fatus balun bele prova ida ne’e: (iii) Feto sira, mesmu inan mos, sai xumasu eh manta-boot ba ukun-nain (administradór balun) bainhira sira halo vizita ba haree povu lian-laek sira; (iv) iha funu, mane-militar sira dadur no oho feto sira ho violensia seksuál-masál (iha tempu okupasaun Indonésia) nu’udar selu-tusan ba sira-nia funu-baluk; (v) halibur feto-raan sira, sulan metin iha fatin-kortél (hodi sai atan serbí seks ba tropa japonés sira); (vi) ohin loron, liuhusi media sira, ita sei asiste hela nafatin drama violénsia boot hasoru feto sira, iha funu sira hanesan ISIS ho Nasaun sira iha Médio Oriente no África; hafoin, Nasaun “monstros” (raksasa) sira, América no Russia mak halimar dudu sira husi kotuk. Tan fatus hirak ne’e hotu nsst, maka feto tenke iha komitementu boot no aten-brani atu luta nafatin ba sira-nia knaar, direitu no liberdade; hamriik metin hasoru hahalok violénsia oin-oin husi mane kbiit-nai sira no sistema-hanehan hirak patriarkál liu nebé taka netik dalan liberdade no hatuun dignidade feto.

  • Feto sira sai “númeruda-II” iha Cultura Judaismu nian :

          Iha Jesus nia tempu, satán molok Jesus moris, feto sira sai makhoris (criatura) “Númeru II”; sira sai “sola-sapatu deit” ba mane sira, iha estratu sosiál judaismu (Israel) nian; mesmu iha tradisaun Médio Oriente, Índia, Ásia nsst mos, oras ne’e, feto sira sei hakruk hela deit ba mane no inan-aman sira tan deit kultura ho nia sistema sira; iha kontestu kulturál ida ne’e, feto sira la soi kbiit rasik atu sai sasin iha tribunál no tetu rasik sira-nia moris; hafoin, bainhira mosu tan kbiit (poder/militarismo romano) iha mane sira nia liman, iha tempu ukun-romanu nian, feto sira mak sai atan (escravas) ba hahalok violentu oin-oin husi mane no husi sistema sosiál, polítika, kulturál, inklui relijiozu sira, nebé hanehan no viola feto sira-nia direitu no liberdade.

         Iha situação hirak nebé todan no hatauk tebes hanesan ne’e, maka mosu tiha ona Feto-Raan ida nebé hanaran Maria Virgem, husi trata sosialidade kraik liu, molok harí organização boot sira mundo nian hodi defende direito feto nian, ohin loron. Nia (Maria) sai feto-raan eh inan modelu luta-nain ida nebé mak hetan duni kbiit hodi hatuun kbiit boot sira rai nian hodi foti-sae hikas direito no dignidade feto-fraco sira nia dignidade no, ikus mai, hetan tula-Kaibauk (Coroa Gloria) ba Nia ulun, foti Nia sai nu’udar modelo Liurai-Feto Lalehan no rai nian (haree Bíblia: Knananuk Maria, (“Magnificat”).

 

APOIO BÁSICO BA FETO SIRA-NIA LUTA

          Luta feto nian, la’os ideoligia temporário ida; maibé iha nia báze apoio metin iha Lei Morál Bíblico no Lei Formál sira. Maromak hakiak ema, feto no mane ho sira-nia knaar, direito no liberdade hanesan deit, iha Na’i (Criador) nia Futar-oin. Adão signifika ema (la’os mane). Bainhira Maromak hamoris Eva (feto) husi Adão nia ruin-knosek maka foin hatudu-saiketan (distinção) carácter ba knaar género (feto & mane) nian hodi hakunu (completa)-malu. Haketak knaar género feton no mane nian, la significa haketak sira nain rua-nia dignidade, direito no liberdade nu’udar feto no mane (sexo). Adão no Eva sai makhoris ida deit, illas lolos husi Maromak Ida deit – unidade horizontal (feto & mane, ema & ema) e vertical (ema & Maromak).

          Unidade ida isin-lolos, so bele acontece lolos, bainhira iha mundo eh carácter rua diferente (la hanesan). Exemplo concreto: Lalehan & rai; Maromak & ema, feto & mane. Nune’e, maka bainhira Maromak hamosu tiha Eva, feto-maluk ida, ba Adão; “Adão dehan: Ida ne’e (feto’Eva ne’e), loos ona, nia mak ruin ha’u-nia ruin no isin husi ha’u-nia isin (unidade, ida deit). Adão bolu Eva feto tanba hasai husi mane” (Jen 2: 23). Feto la’os mane-nia atan-servidora; Eva (feto)-nia ruin no isin hanesan ho Adão (mane) nian (igualdade do género). Tanba ida ne’e, maka tenki hadook tiha forma lala’ok no hahalok diskriminação oin-oin nebé ba hasoru no haketak carácter unidade no igualdade “feto-Maromak oan” ho mane; sistema sira sosio-político-cultural no religioso oinsa deit, nebé maka haliis ba hanehan no hatuun dignidade feto nian, iha mundo ne’e, tenki halakon tiha; atu nunee, feto sira bele soi hikas sira-nia knaar, direito no liberdade tuir loloos Maromak nia hakaran.

          Ida ne’e,feto-maluk sira, la’os campaha mamuk ida; maibé lialoos isin nanis kedas! Keta tauk mate, feto sira! Tauk maksalan! Keta hakfodak ho violéncia sira husi liur! Keta hakiduk hakat ida mos, inan-feton sira! Se ne’e lia-loos ida duni, Lei morál no Lei formál sira, liu husi organização no instituição boot sira, iha mundo tomak, sei tane metin no hamahan nafatin feto nia luta ba dignidade-moris feto nian hodi ba hasoru kbiit babeur no hahalok aat sira ne’e hotu.

          Ita hein katak Maria, luta-nain feto ida, mate; sei mosu hikas Maria seluk barak liután; no Ângela nu’udar feto modelu lideransa ida, karik lakon iha eleição tuir mai; maibé, feto sira-nia luta sei la kotu/remata leet deit iha nebá deit;luta-naruk no todan sei hatutan ba nafatin. Situação hirak nebé difícil no todan tebes sei mosu hodi koko tenik feto sira-nia kbiit ba luta. Maibé, imi, feto sira, hahisi ba imi-nia isin no klamar kbiit espírito-luta maka’as nian no ho aten-brani, halibur hamutuk wa’in liutan feto-maluk sira seluk; hodi tane-malu, tonka-malu ba, tuba-sae foho-lolon Calvário atu harii hikas Cruz-dignidade moris feto nian, iha foho Calvário-tutun aas, nu’udar baluk-moris Adão (mane) nian no mos nu’udar illas loloos Maromak nian. Zero toleránsia ba violénsia hasoru feto! campaha independente feto nian sei la tolera independésia ba hahalok no sistema violento sira!

          Sugere atu, nu’udar sidadania, tenki lee Constituição RDTL, artigo sira : 17o (igualdade entre mulheres e homens); 30o (direito à liberdade, segurança e integridade pessoal); 40o (liberdade de expressão); 46o (Direito de participação política).

Leave a Reply

Your email address will not be published. Required fields are marked *