shadow
Diocese de Dili > NOTÍCIAS > LETURA DIÁRIA > 5A SEMANA IHA PÁSCOA

5A SEMANA IHA PÁSCOA

ANO A

Primeira Leitura          Act. 15, 7-21

Lia housi livro Apóstolo sira nia hahalok

Iha loron hirak neba, iha rungu-ranga boot iha maun-alin sira Jerusalém nia leet, kona ba bele eh la’e fo circuncisão ba sarani foun sira, hodi haruka sira atu tuir Moisés nia lei.  Nune’e, Pedro hamriik hodi dehan ba sira:  “Ha’u Maun-alin sira, houri loron uluk liu kedas, Maromak fihir ha’u iha imi nia leet, atu gentio sira rona housi ha’u ibun Lia-Foun hodi simu fiar. Maromak nebe hatene ema nia laran, fo sasin kona ba sira, uainhira haraik Espirito Santo ba sira nu’udar ba ita.  Ita ho sira, iha Maromak futar oin, hotu hanesan, basa Nia hamos ita tomak nia fuan housi fiar ida de’it. Tansa, oras ne’e, imi hakarak babeur Maromak hodi tau serbisu ida todan teb-tebes iha escolante sira kbas, nebe ami bei-ala sira no mos ami hirak ne’e daudaun la barani hasan. Oin seluk, hodi Na’i Jesus Cristo Nia tulun mak ita hetan fiar no maksoin hanesan mos sira be sarani foun”.  Ema tomak assembleia nian, hot-hotu nonok. Tuir mai, hahu rona Barnabé no Paulo nebe haktuir hahalok no milagre sira be Maromak hala’o iha gentio sira leet housi sira. Hotu tiha, Tiago hasa’e lia dehan:  “Maun-alin sira, imi rona mai! Simão haktuir, oinsa Maromak, houri uluk, haraik-An mai hodi hili iha gentio sira leet, povo ida ba Nia rasik. Hodi ne’e, tuir lolos ona profeta sira nia liafuan nebe hakerek nanis:  ‘Liu tiha ne’e, Ha’u sei fila fali mai, sei hari fali David nia uma nebe monu tiha ona. Ha’u sei hadi’a fali nia naksobu sira; Hau sei hari hikas fali nia, atu ema hotu nebe hela buka Na’i no nasaun sira fo-an tomak ba Ha’u naran’.  Nune’e mak Na’i lia tun houri uluk liu, hodi fo hatene buat oi-oin”. Ne’e duni, ha’u mos halo tuir hanoin nebe katak lalika fo circuncisão ba gentio sira nebe simu ona fiar housi Maromak. Hakerek ba sira atu sira keta han aihan no naan be hasa’e ba lulik, keta hemu ran, keta han naan mate no keta halo sala fo’er. Basa, housi kedas tempo uluk, Moisés tau nia haklaken-na’in sira Iha cidade ida-idak atu lê buat hirak nebe nia hakerek iha sinagoga sira iha loron sábado-sábado”.

Maromak Futar Lia.

 

Salmo Responsorial     96, 1-2a.2b-3. 10

Refrão : Haklaken ba povo hotu Na’i Nia kmanek. Repete-se

  • Hananu ba Na’i knananuk foun ida, hananu ba Na’i, rai-klaran tomak.

          Hananu ba Na’i, hawelok Nia naran. Refrão

  • Haklaken loron ba loron Nia maksoin; haklaken Nia gloria ba reino tomak,

          no ba povo hot-hotu, Ninia kmanek. Refrão

  • Haklaken ba povo hot-hotu: ‘Na’i mak Liurai’ Nia hari mundo metin,

           sei la nakdoko, Na’i ukun povo hotu ho justisa. Refrão

 

Aclamação

Ref : Aleluia, Aleluia

Na’i lia tun: “Ha’u Nia bibi sira rona Ha’u lian, Ha’u hatene sira, sira mai tuir Ha’u”.

 

Evangelho :                                                                                                                                        Jo. 15:9-11

+  Na’i Jesus Cristo Nia Evangelho nu’udar São João haktuir

Iha tempo neba, Jesus lia tun ba escolante sira, dehan:  “Nu’udar Ha’u Aman Maromak hadomi Ha’u, nune’e mos Ha’u hadomi imi. Imi hadomi nafatin Ha’u ba. Imi halo tuir Ha’u Nia ukunfuan sira mak imi bele hadomi nafatin Ha’u; Ha’u mos halo tuir Aman Maromak Nia ukunfuan, Ha’u hadomi Nia nafatin. Ha’u dehan sai ba imi lia hirak ne’e, atu imi bele haksolok ho Ha’u atu imi nia ksolok sai boot to’o rohan”.

Lia Maksoyn.

Leave a Reply

Your email address will not be published. Required fields are marked *