shadow
Diocese de Dili > NOTÍCIAS > LETURA DIÁRIA > DOMINGO V DA PÁSCOA

DOMINGO V DA PÁSCOA

Primeira Leitura          Act. 6, 1-7

Iha loron hirak nebá, ema nebé tuir Jesus sai wa’in tan. Sira nebé mai housi lia Grego sira mumú hasouru ema nebé mai housi lia Aramaico; tan iha knar lor-loron, sira la tau matan ba sira nia feto faluk. Nune’e, Apóstolo na’in sanulu resin rua halibura escolante sira seluk hodi dehan ba sira: “Ita la bele husik hodi haklaken Maroamak futar lia, atu kaer fali knar bain-bain. Imi hili housi imi nia leet ema nain hitu ho moris di’ak; ema ne’e sei iha mos matenek no Espírito Santo nia kmanek atu bele kaer knar sira ne’e. ami sei buka kaer  de’it knar kona ba Maromak futar lia hodi halo oração liu tan.” Lia hirak ne’e, monu lós ba ema tomak nia laran; sira hili Estevão, ema fiar na’in, iha mos Espírito Santo nia kmanek wa’in; sira hili tan: Filipe, Prócoro, Nicanor, Tímon, Pármenas ho Nicolau, sarani foun housi Antoiquia. Sira hodi ema sira ne’e ba hatudu ba Apóstolo sira; Apóstolo sira harohan hodi tau liman ba sira. Maromak nia lia-fuan da’et ba nafatin: iha Jerusalém ema sarani wa’in liu tan; ema sacerdote wa’in mos halo tuir fiar.

Maromak Futar Lia.

 

Salmo Responsorial                                                                                               Sal. 32(33), 1-2. 4-5. 18-19

Refrão: Na’i, ami hein Ita nia laran luak. Repete-se

Ou       Aleluia. Repete-se

Ema santo haklaken Maromak,

tan sarani tomak sei hahí Nia.

Fo agradece ba Na’i,

hananu ho harpa no cítara. Refrão

 

Na’i nia lia-fua lós tebes,

housi lialós moris Nia sasán;

Na’i hadomi justiça no dalan lós;

Na’I nia domin naburas iha Na’i. Refrão

 

Na’i tau matan ba sarani sira,

ba sira nebé hein Nia,

atu hasai sira housi mate,

hodi fo moris iha susar laran. Refrão

 

Segunda Leitura                                                                                                                              1 Pe. 2, 4-9

Lia housi São Pedro nia surat

Doben sira: hakbesik-an ba Na’i. Nia, fatuk moris nebé ita hewai; maibe iha Maromak nia oin, fatuk kmook teb-tebes. Imi mos hanesan fatuk moris, imi sei nakfilak-an, hanesan uma santo ida nebé ema harí, ba na’ilulik santo, atu hasa’e sacrifício klamar nian nebé haksolok Maromak tan Jesus Cristo. Tan ne’e, lê iha Escritura: “Ha’u sei tauk fatuk inan ida iha Sião, di’ak duni, kmook tebes. Ida nebé fiar nia sei la hetan susar.” Rahun diak ba imi nebé fiar, “fatuk ida nebé badáen sira hewai, nakfilak tiha ba fatuk-inan, fatuk nebé ema sidi, fatuk nebé halo monu.” Sira sidi, tan la fiar Evangelho Nia lia-fuan nebé haklaken ba sira. Maybe, imi ema di’ak, na’ilulik liurai, nação santa, povo nebé Maromak hili ba Nia. Nune’e; imi sei haklaken Maromak nia kmanek; Maromak nebé bolu imi housi nakukun ba roman nabilan nia laran.

Maromak Futal Lia.

 

Aclamção                                                                                                                                         Jo. 14, 5 

Refrão : Aleluia! Repete-se

Na’i, ko’alia: “Ha’u ne’e dalan, lialós no moris hun;

ema ida la liu karik housi Ha’u, la bele ba Aman Maromak. Refrão

 

Evangelho                                                                                                                                             Jo. 14, 1-12

Nai Jesus Cristo nia Evangelho nu’udar São João haktuir

Iha tempo nebá, Jesus hateten ba Escolante sira: “Imi neon keta susar. Imi fiar Maromak, sei fiar mos Ha’u. Iha Ha’u Aman nia Uman, fatin wa’in. La hanesan ne’e karik, Ha’us sei la hateten ba imi, katak Ha’u ba hadia fatin ba imi. Wainhira Ha’u ba hadia fatin ba imi, Ha’u sei fila hikas mai, lori imi ba hamutuk ho Ha’u; nune’e iha nebé Ha’u hela ba, imi mos hela iha nebá. Tomé dehan ba Jesus: “Na’i, ami la hatene ita ba nebé, oinsa ami bele hatene dalan?” Jesus simu ba nia: “Ha’u mak dalan, lialós no moris hun. Ema ida la liu karik housi Ha’u, labele ba aman Maromak.” Imi hatene Ha’u karik, imi sei hatene mos Ha’u aman. Oras ne’e imi hatene ona, imi haré ona Nia.” Filipe dehan ba Jesus: “Na’i, hatudu Aman Maromak mai ami; ne’e de’it to’o ona.” Jesus simu ba nia: “Ha’u hela kleur ona ho imi, imi seidauk hatene Ha’u, Filipe? Ema nebé haré Ha’u, haré Ha’u Aman. Tansá ó dehan: Hatudu Aman Maromak mai ami? Ó la fiar katak Ha’u hela ho Aman Maromak; aman Maromak hela ho Ha’u? lia hirak nebé Ha’u dehan ba imi, Ha’u la dehan hodi Ha’u-An rasik; Ha’u Aman nebé hela ho Ha’u, Nia mak halo sasan hirak ne’e. Fiar Ha’u: Ha’u hela ho Aman Maromak, Aman Maromak hela ho Ha’u , buka fiar netik tan hahalok hirak ne’e. Tebes, Ha’u dehan lialós ba imi: ema nebé fiar Ha’u, sei halo mos buat hirak nebé Ha’u halo; nia sei halo boot liu tan hirak ne’e, tan Ha’u ba Aman Maromak.”

Lia Maksoyn.

Leave a Reply

Your email address will not be published. Required fields are marked *