shadow
Diocese de Dili > NOTÍCIAS > LETURA DIÁRIA > DOMINGO VI DA PÁSCOA (ANO A)

DOMINGO VI DA PÁSCOA (ANO A)

Primeira Leitura  (Act, 8, 5-8. 14-17)

Lia Housi Apóstolo sira nia hahalok

Iha loron hirak nebá, Filipe tun ba cidade Samaria nian ida, hodi haklaken kona ba Messias. Ema wa’in simu ho laran lia-fuan nebé Filipe haklaken; ema sira ne’e rona, hodi hanoin tuir doutrina ne’e; sira haré mos milagre nebé nia halo. Filipe hasai diabo housi ema wa’in nia laran. Molok sai, ema ne’e hakilar teb-tebes. Ema ain to’os wa’in hetan di’ak. Iha cidade laran, ema haksolok teb-tebes. Wainhira Apóstolo sira nebé iha Jerusalém rona tiha katak Samaria simu Maromak nia futar lia, sira haruka Pedro ho João ba iha nebá. Sira nain rua tun ba Samaria hodi reza ba ema samaria sira atu sira simu Espírito Santo. Tan Espírito Santo la dauk tun ba sira, sira simu de’it Baptismo hodi Na’i  Jesus nia naran. Nune’e halolo liman ba sira leten atu simu Espírito Santo.

Maromak Futar Lia.

 

Salmo Responsorial                                                                                          (Sal. 65 (66). 1-3ª 4-5. 6-7ª . 16-20)

Refrão: Rai-klaran hotu hana’i Maromak, Repete-se

Rai klaran hotu hana’i Maromak!

Hananu hahí Nia naran.

Hawelok ho ksolok, hana’i:

Maromak kmanek tebes! Refrão

 

Rai hotu hakru’uk adora,

hananu Na’i nia naran.

Mai hotu haksolok ho Maromak,

Maromak halo kmanek de’it ba ema. Refrão  

 

Halo tasi nakfilak ba rai isin,

Hamaran mota atu ema hakur liu.

Mai haksolok iha Maromak;

Nia, ita nia liurai, kbiit Na’in. Refrão

 

Maromak nia belun mai rona;

Ha’u haktuir buat nebé Na’i halo mai ha’u.

Kmanek ba Maromak, tan la hakribit ha’u nia hamulak,

la haluha haraik bensa mai ha’u. Refrão

 

Segunda Leitura :                                                                                                                                 1 Ped. 3, 15-18

 Lia husi S. Pedro nia surat

Doben sira: imi haksolok ba tan imi hetan terus hamutuk ho Cristo; atu iha loron nebé Nia glória mosu mai, imi bele hetan mos ksolok boot. Ema hateten aat imi karik tan Cristo nia naran, imi sei hetan rahun di’ak, basá, Espírito nia kbiit, Espírito nebé Maromak, hela ho imi. Imi ida sei la terus hanesan ema liman-mean, ema ahu-na’in eh ema aat eh ema dale lia-sumik. Maibé, imi terus karik nu’udar ema sarani, keta moe: Hahí Maromak, tan imi naran sarani.

Maromak Futar Lia

 

Aclamação                                                                                                                                         (Jo. 14, 23)

Refrão: Aleluia. Repete-se

Ema nebé hadomi Ha’u sei rai Ha’u nia lia-fuan;

Ha’u Aman sei hadomi nia, Ami sei hela ho nia. Refrão

 

( Como Evangelho poder ler-se Jo. 14, 15-21 ou Jo. 17, 1-11a)

 

Evangelho                                                                                                                                  (Jo. 14, 15-25)

Na’i Jesus Cristo nia Evangelho nu’udar São João haktuir :

Iha tempo nebá, Jesus hateten ba Nia Escolante sira: “Imi hadomi Ha’u karik, imi sei halo tuir Ha’u nia Ukun-Fuan. Ha’u sei husu ba Ha’u Aman, atu haraik Mahein seluk ida, hodi hela nafatin ho imi: Lialós nia Espírito, nebé mundo la bele simu, tan la haré no mos la hatene Nia. Imi sei simu Nia, tan hela ho imi, iha ona imi nia leet. Ha’u sei la husik hela imi oan-ki’ak, Ha’u sei fila fali mai hamutuk ho imi. La kleur, mundo la haré ona Ha’u, maibé, imi sei haré Ha’u, tan Ha’u moris ho imi, imi mos moris ho Ha’u. Iha loron ne’e, imi sei hatene katak Ha’u hela ho Ha’u Aman, imi hela ho Ha’u, Ha’u mos ho imi. Ema nebé moris tuir Ha’u nia Ukun-fuan hodi halo tuir, ema ne’e hadomi Ha’u. Ema nebé hadomi Ha’u, Ha’u Aman mos sei hadomi nia; Ha’u sei hadomi nia, Ha’u sei hatudu Ha’u-an ba nia.”

Lia Maksoyn. 

Leave a Reply

Your email address will not be published. Required fields are marked *