shadow
Diocese de Dili > NOTÍCIAS > LETURA DIÁRIA > 6A SEMANA IHA PÁSCOA

6A SEMANA IHA PÁSCOA

ANO A

 

Primeira Leitura             Act. 16, 22-34;

Lia housi livro Apóstolo sira nia hahalok

Iha loron hirak nebá, ema lubun boot iha Filipos futu lia hasouru Paulo ho Silas. Embo’ot sira haruka hasai tiha sira nia hatais, hafoin haruka baku sira. Baku tiha sira, hatama tiha sira iha kadeia hodi fo hatene ba guarda sira atu hein didiak. Simu tiha ordem, guarda tau sira iha klaran liu hodi kesi metin sira nia ain iha cepo. Iha kalan boot, Paulo ho Silas halo orasaun  hodi hananu ba Na’i no ema hotu nebe iha kadeia rona sira hananu. Teki-tekir, mosu rai nakdoko boot tebes ida nebe halo kadeia nia didin hun sira sai naksobu; odamatan sira sai nakloke tiha kedas, korenti sira iha dadur sira ain sai namkore tiha hotu. Ulun kadeia nian hader mai hare odamatan sira nakloke,  hakfodak, neon sala, buka katana atu oho-an, hodi hanoin katak dadur sira halai sai lakon hotu ona.  Nune’e Paulo hakilar ho lian makaas: “Keta halo aat hasoru ó-an basá ami mak ne’e hotu”.  Sunu tiha ahi-oan, guarda ne’e haksoit ba laran, ho nakdedar, monu iha Paulo ho Silas nia ain. Hafoin, lori sira mai iha liur hodi husu ba sira: “Na’i sira, ha’u sei halo sa lós atu soi ha’u- an?”  Sira hatan ba nia:  “Fiar iha Na’i Jesus, ó sei hetan maksoin, hamutuk ho ó nia familia tomak”. Tuir mai sira haklaken Na’i nia futar lia ba nia no mos ba nia emar sira hotu be iha nia uma laran. Ema guarda ne’e, iha kalan ne’e kedas, fase Apóstolo sira nia kanek hodi taka ai-moruk ba, hafoin, nia ho nia emar sira hotu simu kedas baptismo. Tuir mai, nia haruka sira sa’e ba nia uma hodi han hamutuk iha mesa. Nia ho nia familia tomak haksolok tan simu fiar iha Na’i Maromak.

Maromak Futar Lia.

 

Salmo Responsorial                                                                                     Sal. 138, 1-2a. 2bc-3. 7c-8

            Refrão:  Na’i, ho Ita liman lós, soi ha’u! Repete-se

Na’i, ha’u hahi Ita ho laran tomak, tan Ita rona liafuan sira housi ha’u ibun. Iha anjo sira oin, ha’u hawelok Ita, adora Ita ho ha’u oin fila ba Ita templo santo. Refrão

Ha’u hahi Ita naran santo, tan Ita laran luak no laran los.

Uainhira ha’u harohan, Ita rona ha’u, no haboot ha’u klamar nia biit. Refrão

 

Ita liman los soi ha’u, Na’i halo buat hotu mai ha’u. Na’i,

Ita domin rohan laek, la hakribi buat hotu nebe Ita futar liman halo. Refrão

 

 Aclamação

Refrão: Aleluia, Aleluia … Repete-se

Na’i lia tun:  “Ha’u sei haruka Espirito lialos nian mai;

Nia sei hanourin lialos hotu ba imi”. Repete-se

 

Evangelho :                                                                                                                     Jo. 16 : 5-11

+ Na’i Jesus Cristo Nia Evangelho nu’udar S.João haktuir

Iha tempo nebá, Jesus lia tun ba escolante sira, dehan: “Oras ne’e, Ha’u ba iha Ida nebe haruka Ha’u mai; imi ida sei la husu mai Ha’u : ‘Ita ba nebe?” Maibé, tan Ha’u dehan liafuan hirak ne’e ba imi, imi laran susar tiha.  Maibé, Ha’u hateten lós ba imi: Ba imi nia di’ak mak Ha’u ba. Ha’u la ba karik, Tulun-Na’in, sei la tun mai iha imi. Maibé, Ha’u ba karik, Ha’u sei haruka Nia mai. Uainhira Nia mai, sei hatudu katak, mundu ne’e maksalak no tan sala, sei halo justisa, sei tesi lia kona ba sala, tanba sira la fiar iha Ha’u; kona ba tesi lia, tanba Liurai-Oan mundu ne’e nian hetan ona kastigu”. 

Lia Maksoyn.

Leave a Reply

Your email address will not be published. Required fields are marked *