shadow
Diocese de Dili > NOTÍCIAS > LETURA DIÁRIA > 6A SEMANA IHA PÁSCOA

6A SEMANA IHA PÁSCOA

ANO A

 

Primeira Leitura         Act. 17, 15, 20-18:-1

Lia housi livro Apóstolo sira nia hahalok

Iha loron hirak nebá, maun-alin sira be la’o hamutuk ho Paulo, housi Tessalónica, hodi ba to’o iha Atenas; hafoin, sira fila hi’as mai, lori lia menon ba Silas no Timóteo atu ba lalais hasouru Paulo.  Paulo hamrik iha Areópago nia klaran, hodi dehan nune’e:  “Ema Atenas sira, ha’u hare katak imi hotu hamta’uk Maromak. Basa wainhira ha’u la’o iha cidade laran hodi hare didi’ak imi nia fatin santo sira, ha’u hetan altar ida ho liafuan hirak ne’e:  ‘Ba Maromak nebe ema la hatene’. Ne’e duni, Ida nebe imi adora hodi la hatene, ha’u haklaken ba imi. Maromak nebe halo mundu no buat hotu nebe iha nia, Lalehan no rai nia Na’i, la horik iha kadunan nebe ema nia liman mak halo; Nia la kuran ema nia liman atu serbi Nia basa Nia la kuran buat ida.  Maibe Nia mak fo moris no iis no buat hotu, housi ema ida de’it, Nia halo ema ua’in atu horik iha mundo tomak,  no Nia mak tau tempo sira no ida-idak nia fatin, atu ema hotu bele buka Maromak, maski sira raba iha nakukun laran atu bele hetan Nia, maski lolos nia la dook housi ita ida-idak.  Basa ‘iha Nia ita moris, no book no hetan ita-an,’ nu’udar imi nia poeta balun dehan tiha, ‘Basa ita mos Nia oan sira’. Ne’e duni, tan ita Maromak nia oan, ita la bele hanoin katak Maromak ne’e hanesan ilas nebe ema nia liman no matenek halo ho osa mean ka osa mutin ka fatuk. Maromak taka matan ba tempo nebe ema sei beik, maibe ohin Nia hakarak hodi biit katak ema hot-hotu hakribi sala, basa Nia marka tiha loron nebe Nia sei tesi lia ba mundo ho justisa housi ema ida nebe Nia foti no Nia hametin ba ema hot-hotu uainhira Nia halo Nia moris hi’as housi mate sira leet”. Uainhira sira rona kona ba moris hi’as housi mate sira leet, balun hahu hasara nia, maibe sira seluk hateten: “Ami hakarak rona ó ko’alia kona ba buat ne’e dala seluk tan”. Nune’e Paulo husik sira. Maibé balun tuir nia, hodi sai fiar na’in: Sira ne’e mak Dionísio, Areopagita no mos feto ida naran Dâmaris, no seluk tan hamutuk ho sira. Ne’e hotu tiha, Paulo husik Atenas hodi la’o liu ba Corinto.

Maromak Futar Lia.

 

Salmo Responsorial                                                                         148, 1-2. 11-12b. 12c-14a. 14bcd

Refrão : Lalehan ho Rai haklaken Ita glória. Repete-se

  • Imi hahí Na’i, hahi Nia housi Lalehan aas ba, Nia Anjo sira hahí Nia. Refrão:
  • Liurai no povo hotu mundu nian, Liurai oan sira be ukun rai, mane klosan no fetora sira,  katuas no kiik oan sira. Refrão:
  • Imi hotu hahi Na’i Nia kamnek; Nia ukun aas liu Lalehan no rai, biit no beran be saran tiha ba Nia povo. Refrão:
  • Ksolok ba Nia sarani sira hotu, ba Israel oan sira hotu, povo be Nia hadomi liu. Refrão:

 

Aclamação

Refrão :           Aleluia, Aleluia. Repete-se

Ha’u sei harohan ba Aman no Nia sei fo ba imi

Espirito Santo atu hela nafatin ho imi. Refrão:

 

Evangelho :                                                                                                                Jo. 16, 12 -15

+ Na’i Jesus Cristo Nia Evangelho nu’udar S. João haktuir

Iha tempo nebá, Jesus lia tun ba escolante sira dehan :  “Ha’u sei iha buat barak atu dehan ba imi, maibé oras ne’e imi nia neon seidauk to’o atu hatene lolós. Uainhira  Espirito Lia lós nian mai, Nia sei hanourin lialós hotu ba imi. Basá Nia sei la ko’alia hodi Nia-An rasik, maibé Nia sei ko’alia kona ba buat hotu nebe Nia rona. Nia sei haklaken buat nebe aban bain rua sei mosu mai. Nia sei fo gloria ba Ha’u, tanba Nia sei simu Ha’u nia liafuan atu hanourin imi.  Buat hotu nebe Aman iha, Ha’u nian mos. Tan ne’e, mak Ha’u dehan: Nia sei simu Ha’u Nia liafuan atu haklaken ba imi”.

Lia Maksoyn

Leave a Reply

Your email address will not be published. Required fields are marked *