shadow
Diocese de Dili > NOTÍCIAS > LETURA DIÁRIA > Sexta Feira, VII DOMINGO IHA PÁSCOA

Sexta Feira, VII DOMINGO IHA PÁSCOA

Primeira Leitura        25, 13-21

Lia housi livro Apóstolo sira nia hahalok

Iha loron hirak nebá, liurai Agripa ho Berenice ba to’o iha Cesareia hodi hato’o cumprimentos  ba embo’ot Festo. Tan sira hela loron barak iha neba, Festo haktuir ba liurai lia bobar be hasouru Paulo nia hahalok:  “Iha ne’e iha ema mane ida nebe embo’ot Félix castigo hela. Uainhira ha’u sei iha Jerusalém, na’i-lulik boot ho katuas sira Judeu nian foti lia bobar hasouru nia hodi husu atu fo kastigu ba nia. Maibé ha’u hatan ba sira katak Romano sira la iha lisan ida atu saran ema ida ba kadeia, uainhira sira be bobar lia la mosu mai iha nia oin, atu nia bele hateten buat ruma hodi soi nia-an. Tan ne’e, sira mai hamutuk ho ha’u to’o iha ne’e.  Iha loron tuir mai, lalais kedas ha’u hola fatin iha tribunal hodi haruka atu bele lori ema ne’e mai. Sira be bobar lia mai, maibé sira la hatudu sala ida hasouru nia  nebe ha’u hakarak hatene. Sira foti lia hasouru nia tan de’it nia religião no tan ema ida naran Jesus nebe mate tiha ona, maibé Paulo hateten lolós katak Nia moris hela. Tan ha’u la brani atu tesi lia hirak ne’e, ha’u husu ba ema ne’e, nia hakarak karik ba Jerusalém, atu iha neba, sira bele tesi lia ba nia. Nune’e Paulo halo tuir, atu sira hein oinsa imperador nia hanoin, ha’u tahan hela nia iha kadeia to’o loron nebe atu haruka nia ba César”.

Maromak Futar lia.

 

Salmo Responsorial.                                                                           102 (103), 1-2. 11-12. 19-20ab

Refrão : Na’i hari Nia trono glória nian iha Lalehan. Repete-se

  • Ha’u klamar hahi Na’i, ha’u neon no laran tomak hawelok Nia naran santo. Ha’u klamar hahi Na’i, la haluha Nia kmanek sira. Refrão
  • Dook tebes housi rai ba Lalehan, nune’e mos Na’i Nia laran luak boot tebes, ba sira nebe hadomi Nia. Nu’udar Loro-sa’e dook housi loro-monu, nune’e, Nia hadook ita housi ita salan hotu. Refrão
  • Na’i hatur metin Nia trono iha Lalehan; Nia biit ukun rai-klaran. Anjo sira hotu hahi Na’i, sira laran metin iha Nia liafuan. Refrão

 

Aclamação

Refrão : Aleluia, Aleluia. repete-se

Na’i lia tun:  “Ha’u sei haruka Espirito lialos nian mai.

Nia sei hanourin lialos hotu ba imi”.

 

Evangelho                                                                                                                 Jo. 21:15-19

+ Na’i Jesus Cristo Nia Evangelho nu’udar S.João haktuir

Iha tempo nebá, uainhira sira han hotu tiha, Jesus husu ba Simão Pedro: “Simão, João nia oan, ó hadomi Ha’u liu sira ne’e hotu?” Simão hatan: “Tebes duni, Na’i, Ita hatene katak ha’u hadomi Ita”. Jesus dehan ba nia: “Ó tau matan ba Ha’u nia bibi oan sira”. Jesus husu tan: “Simão, João nia oin, ó hadomi Ha’u?” Simão hatan: “Tebes duni, Na’i, Ita hatene katak ha’u hadomi Ita”. Jesus dehan ba nia: “Ó tau matan ba Ha’u Nia bibi sira”. Dala ida tan Jesus husu ba Pedro: “Simão, João nia oan, ó hadomi Ha’u?” Pedro neon sala, tan Jesus husu dala tolu ona ba nia “Ó hadomi Ha’u?” Hafoin Pedro hatan: “Na’i, Ita hatene hotu, Ita hatene katak ha’u hadomi Ita”. Jesus dehan ba nia: “Ó tau matan ba Ha’u Nia bibi sira. Tebes, Ha’u hateten lós ba ó: uainhira ó sei klosan, ó rasik hatais, ó la’o ba fatin nebe ó hakarak. Maibé, wainhira ó katuas tiha, ó sei foti liman atu ema seluk hatais ó, nia sei lori ó ba fatin nebé ó la kohi”. Jesus hateten nune’e, atu fo hatene sai oinsa Pedro sei fo glória ba Na’i Maromak. Ne’e hotu, Jesus dehan tan: “Ó tuir Ha’u mai”.

Lia Maksoyn.

Leave a Reply

Your email address will not be published. Required fields are marked *