shadow
Diocese de Dili > NOTÍCIAS > LETURA DIÁRIA > DOMINGO PENTECOSTES

DOMINGO PENTECOSTES

Premeira Leitura          Gén.11, 1- 9

Lia housi Livro Génesis :

Iha loron hirak nebá, rai hotu iha lian ida de’it, ko’alia lia-fuan mesak hanesan de’it. Husik tiha loro sa’e, ema sira hetan fatin tetuk ida, iha rai Senaar; hafoin, sira horik iha fatin nebá. Nune’e, sira hateten ba malu: “ita ba halo tijolos tunu ba ahi”. Tijolos sira ne’e, atu tau iha iha fatuk sira fatin; betume sira sei tau hanesan argamassa. Ema sira ne’e sei hateten tan: “ita ba halo cidade ida, ho torre ida áas to’o lalehan. Halo ita nia naran boot atu nune’e ita labele la’o namkari iha rai-klaran”. Maibé, Nai Maromak hiit an mai, atu haré cidade ho torre, ema on sira ne’e harí daudaun. Nune’e, Na’i Maromak  hateten: “ema sira ne’e, halo povo ida de’it, sira hotu ko’alia lia-fuan ida de’it. Sira hahú ona nune’e, aban-bainrua sei la iha tan buat ida atu hakait netik, sira halo tuir sira nia hakaran rasik. Ita la’o ba ba kraik, halo sira lian sai barak, atu sira labele rona tan malu”. Nai Maromak halo sira sai housi nebá atu sira la’o namkari lemo rai. Hafoin, ema sira ne’e, la halo tan ona, sira nia cidade. tan ne’e, sira hanaran cidade ne’e Babél, basá housi nebá mos ma Na’i Maromak halo sira namkari  ba rai tomak.

Maromak Futar Lia.  

 

Salmo Responsorial                                                                          Sal. 104 (103), 1-2ª. 24. 35c 27-30

Refrão : Na’i, haruka Ita Nia Espírito mai hafoun híkas mundo. Repete-se

Ha’u klamar hananu:

Na’i ha’u nia Maromak di’ak tebes!

Hafutar-An ho kbiit Liurai,

Nia ukun nabilan nu’udar fitun! Refrão

 

Ita liman fatin kmanek tebes!

Ita haki’ak buat  hotu ho matenek:

Rai klaran nakonu ho Ita criatura sira!

Ha’u klamar hahí Na’i ba. Refrão

 

Ema hotu hein Ita Boot

Na’i haraik ai-han lor-loron nian.

Ita haraik ai-han, ami simu ho laran,

Ita liman nakloke, ami la susar. Refrão

 

Hasai Ita nia tulun, ema mate hotu,

nakfilak ba rai, sai rai-ten.

Tau liman ba ema, ema moris naruk,

halo mundo foun. Refrão

 

Segunda Leitura                                                                                                 Rom. 8, 22-27

Lia housi São Paulo nia surat ba sarani sira iha Roma :

Maun-alin sira: Ita hatene katak, to’o oras ne’e, criatura tomak halerik, tamba hetan terus, hanesan feto atu tur-áhi. Maibé, la katak criatura sira de’it: Ita rasik be simu ona Espírito, ita mos halerik iha ita nia laran, hodi titu, atu sai oan-haki’ak, hodi titu libertação ita nia isin nian. Tebes duni, ita hetan ona salvação, nebé ita sei hein hela. Maibé, buat nebé ita haré hela, ne’e ita la hein ona; basá, buat nebé ema ruma haré hela, ema ne’e sei hein tan sá ida? Maibé, ita hein karik buat nebé ita ladauk haré, ita sei titu buat ne’e, hodi terus witoan. Nune’e mos, mak Espírito Santo mai tulun ita iha susar laran, basá ita beik, la hatene atu husu sá lós, wainhira ita halo oração. Espírito Santo rasik, Nia mak harohan da’et mai ita, hodi halerik maka’as teb-tebes. Ema ida be haré hela ita nia laran, Nia hatene lolós Espírito Santo nia hakaran. Basá, Espírito Santo harohan ba sarani sira, tuir Na’i Maromak nia hanoin.

Maromak Futar Lia.

 

Aclamação

Refrão : Aleluia. Repete-se

         Mai, Santo Espírito,

         haraik di’ak ba Ita atan sira;

         hakonu ami neon ho Ita domin. Refrão

 

Evangelho                                                                                             Jo. 7, 37-39

@    Na’i Jesus Cristo nia Evangelho nu’udar São João haktuir:

Iha loron ikus festa Tabernáculos nian, loron festa boot liu hotu, Jesus hamriik hodi hateten ho lian maka’as: “Ema ruma hamrook karik, mai iha Ha’u atu hemu. Sé fiar Ha’u, nu’udar Escritura hateten, sei suli housi Nia laran, wé moris boot, mota ínan sira nian”. Jesus ko’alia hela kona ba Espírito Santo. Ema sira nebé sei fiar Jesus, sira mak sei simu Espírito ida ne’e. Basá, Espírito Santo la dauk tun mai, tan Jesus la dauk simu Naran boot.

Lia Maksoyn.

Leave a Reply

Your email address will not be published. Required fields are marked *