shadow
Diocese de Dili > NOTÍCIAS > LETURA DIÁRIA > Terça Feira, IX Tempo Comum

Terça Feira, IX Tempo Comum

Primeira Leitura        (Tob. 2, 9-14)     

Lia housi livro Tobias nian

Iha loron hirak nebá, Ana, Tobit  nia káben, tur hela iha odamatan hodi hateke ba dalan nebe nia oan Tobias sei tuir hodi fila mai uma. Wainhira hare ba katak nia oan mai daudaun, dehan ba nia aman: “Ó nia oan mai daudaun neba ho ema ida nebe uluk ba hamutuk ho nia.” Anjo Rafael dehan ba Tobias wainhira atu hakbesik-an ba nia aman: “Ha’u hatene lolos katak ó nia aman nia matan sei nakloke. Ó kose ikan nia mina ba nia matan. Ai-moruk ne’e sei halo rahun buat kafuak mutin sira hodi halo monu tiha housi nia matan. Ó nia aman nia matan sei sai diak fali, nia sei hateke naroman.”  Ana halai hasouru nia oan, hakoak tiha hodi dehan ba nia, “Ha’u hare ona ó, ha’u oan. Oras ne’e ha’u bele mate.” Nia hahu tanis. Tobit mos hamriik tiha hahu la’o sidi-sidi hela nia ain, maibé, hodi biit sai housi odamatan oin. Tobias ba los iha nia aman ho ikan nia mina iha liman, huu ba nia aman nia matan hodi dehan.  “Barani ba, ha’u aman!” Hafoin, nia tau ai-moruk ne’e ba nia aman matan. Ho liman rua, nia dada sai housi nia matan buat hanesan ikan nia kulit. Tobit hakoak tiha nia oan, tanis, hodi dehan; “Ha’u hare ona ó, ha’u oan, naroman ha’u matan nian.” Hafoin, hateten tan:  “Rahun diak ba Maromak, rahun diak ba Na’i Nia naran boot. Rahun diak mos ba Nia santo Anjo sira. Rahun di’ak ba Nia naran boot ba nafatin! Basá, Na’i fo terus mai ha’u, maibé, oras ne’e sadia ha’u, oras ne’e ha’u hare fali ona ha’u oan Tobias.” Nune’e Tobit haksolok tebes hodi hahi Maromak ho lian maka’as. Tobias haktuir ba nia kona ba nia viagem be la’o di’ak, osan nebe nia lori mai, kona ba nia casamento ho Sara, Raguel nia oan feto, nebe mai daudaun to’o ona iha odamatan cidade Nínive nian. Tobit ho ksolok no hodi hahi Maromak, sai housi uma, ba atu simu nia feto foun iha odamatan cidade Nínive nian. Ema sira housi cidade Nínive hakfodak hare Tobit la’o mesak lalais no ema la tulun nia atu la’o. Iha sira hotu nia oin, Tobit haklaken katak Maromak sadi’a ona nia hodi haraik ba nia hare mos. wainhira nia hare Sara, nia oan Tobias nia féen, nia haraik bensa ba nia hodi dehan:  “Tama mai, ha’u oan feto! Rahun di’ak ba ó nia Maromak be lori ó mai to’o ami. Rahun diak ba ó nia inan no aman. Rahun diak ba Tobias, ha’u nia oan mane. Rahun diak ba ó, ha’u oan feto. Tama mai iha ó nia uma ho laran no neon ksolok. Tama mai, ha’u oan feto. Iha loron neba, ema judeu sira hotu iha cidade Nínive haksolok tebes.

Maromak Futar Lia.

 

Salmo Responsorial.                                                                                                      (Sal. 112, 1,-2, 4; 7, 8-9ab)

Refrão : Ha’u klamar hahi ba Na’i.

  • Ha’u klamar, hahi ba Na’i! Hahi ba Na’i iha ha’u nia moris tomak, ha’u sei hananu ba ha’u Maromak, uainhira ha’u sei moris. Refrão
  • Na’i tulun ema sira be fo terus, haraik aihan ba ema sira hamlaha, fo liberdade ba sira be iha dadur. Refrão
  • Na’i fo roman ba sira be matan delek, ho Nia biit, tahan ema biit laek, Nia hadomi ema sira be laran los. Refrão
  • Na’i tahan ema sira be la’o rai, tau matan ba oan kiak no feto faluk; maibe taka dalan ba ema aat sira. Refrão
  • Na’i ukun tinan-ba-tinan; Sião, ó nia Maromak mak Liurai housi otas ba otas. Refrão

 

Aclamação

Refrãon :            Aleluia, Aleluia

Na’i dehan: Ema nebe hadomi Ha’u, sei halo tuir Ha’u nia liafuan;

Ha’u Aman sei hadomi nia, Ami sei mai hela ho nia.

 

Evangelho                                                                                                                                                     (Mc. 12:35-37)

+  Na’i Jesus Cristo Nia Evangelho nu’udar S. Marcos haktuir

Iha tempo nebá, wainhira Jesus hatan tiha, Nia hanourin iha templo dehan: “Tan sa escriba sira dehan katak Cristo ne’e David nia Oan? Basá, David rasik ho Espirito Santo nia naroman, dehan: ‘Na’i dehan ba Ha’u nia Na’i: tur iha Ha’u Nia sorin kuana to’o tempo nebe Ha’u tau Ó nia funu-baluk sira iha Ó ain okos.’ David rasik dehan Nia ‘ Na’i;  ne’e duni, oin sa mak Nia ninia oan fali?” Ema barak rona Nia ho ksolok.

Lia Maksoyn.

Leave a Reply

Your email address will not be published. Required fields are marked *