shadow
Diocese de Dili > NOTÍCIAS > LETURA DIÁRIA > Segunda Feira, IX Tempo Comum

Segunda Feira, IX Tempo Comum

Primeira Leitura        (Tob. 1, 3. 2. 1b- 8)    

Lia housi livro Tobias nian

Ha’u, Tóbit,  moris tuir dalan lialos no justisa hodi halo hahalok di’ak sira iha ha’u nia moris tomak. Ha’u fo tiha esmola ua’in ba ha’u nia maun-alin sira no maluk sira, nebe hanesan ha’u, ema lori tiha ba Nínive iha rai Assíria.  Iha ami nia festa Pentecostes nian, festa Semana nian, sira hadi’a ona han festa nian ida mai ha’u; ha’u tur tiha atu han. Maibe, ha’u hare ba mesa ho hahan barak teb-tebes, ha’u dehan ba ha’u nia oan Tobias:  “Oan, ó ba hare to’ok, ó bele hetan karik kiak ruma housi ita maun-alin sira nebe dadur iha Nínive nia leet, nebe ho laran tomak hahi Na’i, ó lori nia mai iha ne’e atu bele han hamutuk ho ha’u. Ha’u hein ó, oan to’o ó fila hikas mai”. Tobias ba buka kiak ida iha ami maun-alin sira leet. Maibe, uainhira fila hikas mai, nia dehan mai ha’u: “Ha’u aman”. Ha’u hatan ba nia:  “Ha’u oan, ha’u mak ne’e”. Nia haktuir tan: “Ha’u aman, ema oho tiha ema ida ema ida housi ita maun-alin sira no soe hela mate isin iha praça pública no nia latan hela iha neba”.  Ha’u hamriik tiha kedas, husik hela hahan, ha’u la hanoin tan atu koko hahan ne’e. Ha’u ba kedas hasai isin mate ne’e, hodi tau iha quarto ida, hein to’o loraik, atu hakoi. Tuir mai, ha’u fila ba uma, fase tiha liman, ho neon sala, ha’u hahu han. Ha’u hanoin hikas fali profeta Amós nia liafuan sira be dehan hasouru Betel: “Imi nia festa sira sei nakfila ba tanis, imi nia knananuk sira ba halerik”. Hafoin, ha’u hahu tanis. Uainhira rai kalan ona, ha’u ke’e tiha rai ko’ak ida hodi hakoi mate ne’e. Ha’u nia maluk sira hare ha’u, hamóe ha’u hodi dehan: “Nia la ta’uk ona. Ema buka atu oho nia tanba hahalok sira hanesan ne’e; lolos, nia tenki halai subar-an tiha, maibe, nia sei iha ne’e, hakoi mate!”.

Maromak Futar Lia.

 

Salmo Responsoria                                                                                             (Sal. 112, 1-2. 3. 4. 5-6)

Refrão Rahun diak ba ema nebe hamta’uk Na’i. Repete-se

  • Rahun di’ak ba ema nebe hamta’uk Na’i, no haksolok iha Nia ukunfuan. Nia bei-oan sira sai maka’as iha rai, derasaan ema laran los nian hetan bensa ua’in. Refrão
  • Iha nia uma, iha aihan no riku ua’in, ema sei la haluha nia laran di’ak. Nia nabilan ba ema los sira nu’udar roman iha nakukun, nia laran mos, laran-luak no laran los. Refrão
  • Ksolok ba ema nebe laran luak no laran di’ak, no tau matan ba nia riku tuir justisa. Ema laran mos tuba rai metin, ema temi nafatin nia naran. Refrão

 

Aclamação

Refrão : Aleluia, Aleluia

Jesus Cristo, sasin nebé laran metin, Oan kaua’ik housi ema mate sira leet,

hadomi ita no hamos ita housi ita nia sala sira ho Nia ran. 

 

Evangelho                                                                                                                                  Mc. 12:1-12

 +  Na’i Jesus Cristo Nia Evangelho nu’udar  S. Marcos haktuir

 Iha tempo neba, Jesus hahu ko’alia ba sira ho aiknanoik dehan. “Ema ida halo to’os uvas nian, hale’u nia ho lutu, ke’e kuak atu hanehan uvas no hari torre ida. Tuir mai, nia saran to’os ne’e ba ema fila rai sira, no la’o ba rai seluk. wainhira tempo los to’o ona, nia haruka nia emar ida ba ema fila rai sira  atu husu aifuan sira nu’udar rai teen housi to’os. Maibé sira kaer ema ne’e, baku nia no haruka nia fila ho liman mamuk. Dala ida tan, nia haruka ema seluk ba sira. Nia mos sira baku no trata aat. Nia haruka tan ema seluk, maibé sira oho nia no mos ema barak seluk; balun sira baku, balun sira oho. Nia iha tan oan mane doben. Nia haruka nia ba sira hodi dehan: “Sira sei hamta’uk ha’u nia oan”. Maibé ema fila rai sira dehan ba malu, “Ida ne’e mak nia lima-rohan na’in! Mai, ita oho nia, nune’e nia lima-rohan sei monu mai ita,” Sira kaer no oho nia, hafoin soe nia ba liur. To’os na’in ne’e sei halo sa los? Nia sei mai no halo lakon ema fila rai sira ne’e hodi saran to’os uvas nian ba ema seluk. Imi seidauk lê lia Escritura ne’e: “Fatuk nebé badaen sira hewai nakfila ba fatuk inan; buat ida ne’e Na’i mak halo. Housi Nia mak buat kmanek liu ne’e mosu iha ita nia oin?” Sira buka atu kaer Nia; maibe sira ta’uk povo; sira hatene katak Nia haktuir aiknanoik ida ne’e ba sira. Sira ba hodi husik Nia.

Lia Maksoyn.

Leave a Reply

Your email address will not be published. Required fields are marked *