shadow
Diocese de Dili > NOTÍCIAS > LETURA DIÁRIA > Quarta Feira, IX Tempo Comum

Quarta Feira, IX Tempo Comum

Primeira Leitura        (Tob. 3, 1-11a, 16-17a)

Lia housi livro Tobias

Iha loron hirak nebá, ha’u Tobit, ho klamar neon sala, tanis hodi hahu harohan nune’e: “Na’i, Ita Boot ema los, nune’e mos Ita Nia hahalok tomak mesak los. Ita Nia dalan sira, mesak dalan sadia no dalan domin nian. Ita mak sei tesi lia ba mundo. Oras ne’e, Na’i, hanoin no tau matan mai ha’u ba.  Keta fo todan mai ha’u, tan ha’u salan sira, tan ha’u baruk-téen, no tan ha’u nia bein sira nia salan. Sira halo sala hasouru Ita, la halo tuir Ita Nia Ukunfuan; tan ne’e, Ita Boot saran ami ba mate, ba kadeia, halo ema hewai ami, dehan aat ami, duni sai ami housi sira nia leet. Oras ne’e, Ita ba tesi lia wa’in hasoru ha’u, tan ha’u nia salan no salan ha’u bein sira nian. Basá, ami la halo tuir Ita Nia Ukunfuan sira no la moris tuir Ita hakaran.  Maibé, oras ne’e, bele halo mai ami tuir Ita hakaran. Ita bele hasai ha’u nia moris, atu ha’u bele lakon housi Mundo ne’e, hodi fila hikas ba rai. Diak liu ha’u mate, basá, ha’u moris la tahan ona ema seluk nia lia aat todan oi-oin, neb halo ha’u laran susar teb-tebes. Na’i, soi ha’u housi terus ne’e, tulun hodi lori ona ha’u ba moris rohan laek.  Na’i, keta hadook Ita Futar oin housi ha’u. Tebes, diak liu ha’u mate, atu la hare tan terus todan ne’e; nune’e, ha’u sei la rona tan lia aat todan. Iha loron ne’e duni, Sara, Raguel nia oan feto, nebe hela iha Ecbatana Média nian, nia mos simu lia todan housi nia aman nia atan feto. Basá, nia káben dala hitu, maibé, Asmodeu, demónio fóer, óho hotu nia la’en sira ida-ida, wainhira sira seidauk moris ho nia, tuir lei kaben-na’in nian. Feto atan ne’e dehan ba nia: “Ó mak oho ó nia la’en sira. Ó káben ona ho mane na’in hitu, maibé, ó la lori sira nia naran. Tan sa, ó hare aat ami tan sira nia mate? Ó ba ona ho sira, basá, ami la hare tan ó nia oan mane eh feto ida!” Iha loron ne’e, Sara sinti neon sala teb-tebes hodi hahu tanis. Nia sa’e ba iha sala ida iha aas, iha nia aman nia uman, hakarak tara an mate. Maibé, tuir mai, nia hanoin didiak tiha iha nia laran, hodi dehan ba nia an: “Karik sira hateten aat ha’u nia aman, hodi dehan ba nia: ‘Ó iha oan feto doben ida mesak, nia tara an mate, tan nia sorti aat.” Ha’u halo ha’u aman tun ba mate sira nia fatin, ho neon sala iha nia moris katuas. Diak liu ha’u la bele tara an mate, maibé, husu ba Na’i, atu hasai ha’u nia moris atu ha’u la bele rona tan lia aat todan iha ha’u nia moris.” Iha oras ne’e duni nia tane nia liman ba janela hodi hahu hamulak. Iha oras ne’e, Na’i Maromak gloria nian rona sira rua nia harohan hodi haruka Anjo Rafael mai atu fo ai-moruk ba Tobit no Sara.

Maromak Futar Lia.

 

Salmo Responsorial.                                                                                                (Sal. 25, 2-3. 4-5ab. 6-7bc. 8-9)

Refrão :   Na’i, ha’u laran metin iha Ita Boot. Repete-se

  • Na’i, ha’u laran metin iha Ita Boot, keta bosok ha’u; halo ha’u hatene Ita dalan, atu ha’u funu baluk sira keta hananu hasoru ha’u tan sira manan. Refrão
  • Hatudu Ita Nia hakaran mai ha’u, hatudu Ita dalan mai ha’u atu ha’u tuir dalan los no diak; Ita mak ha’u Maromak no ha’u Maksoin. Refrão
  • Na’i, hanoin Ita laran luak no Ita laran diak nebe rohan laek. Ho laran luak Ita hanorin ha’u, basá, Ita Boot diak tebes. Refrão
  • Na’i mak diak, halo justisa los, lori fali maksalak sira ba dalan, dada dalan ba kiik sira iha justisa laran, hatudu dalan ba kiak sira Refrão.

 

Aclamação

Refrão : Aleluia, Aleluia

            Jesus dehan: “Ha’u ne’e moris hi’as no moris.

            Ema nebe fiar Ha’u, maski mate ona, nia sei moris.

 

Evangelho.                                                                                                                                                (Mc. 12:18-27)

+ Na’i Jesus Cristo Nia Evangelho nu’udar S. Marcos haktuir

Iha tempo nebá, ema sadeceu balun nebe fiar katak la iha moris hi’as, hakbesik ba Jesus hodi husu ba Nia: “Mestre, Moisés hakerek ba ami katak wainhira mane ida nia maun mate hodi husik hela nia káben no la husik oan, mane ne’e sei hola feto faluk ne’e atu fo oan ba nia maun. Iha maun alin na’in hitu. Ida boot liu hola feto, hafoin nia mate, la hetan oan ida. Ida nebe tuir nia hola feto faluk ne’e, maibe nia mos mate, la hetan oan. Nune’e mos ida nebe tuir nia sira na’in hitu ne’e la hetan oan ida. Ikus mai feto ne’e mos mate. Iha moris hi’as, uainhira sira hotu sei moris fali, feto ne’e se los nia kaben, basa sira hotu hola nia?” Jesus hatan ba sira, “Imi hanoin sala tebe-tebes! Imi la comprende Escritura sira no Maromak nia biit. Basá wainhira sira moris hi’as housi mate, sira la hola malu tan; sira sei sai hanesan anjo sira iha lalehan. Kona ba matebian sira moris hi’as fali, imi la lê iha Moisés nia livro, iha ai nebe lakan, oinsa Na’i Maromak ko’alia ba nia dehan: “Ha’u Abraão nia Maromak, Isaac nia Maromak, no Jacob nia Maromak”. Nia la’os ema mate nia Maromak maibé ema moris nian. Imi hanoin sala teb-tebes!”

Lia Maksoyn.

Leave a Reply

Your email address will not be published. Required fields are marked *