shadow
Diocese de Dili > NOTÍCIAS > LETURA DIÁRIA > Quinta Feira, IX Tempo Comum

Quinta Feira, IX Tempo Comum

Primeira Leitura        (Tob. 6, 10-11;7, 1. 9-14;8. 4-9)

Lia housi Livro Tobit nian:

Iha loron hirak nebá, Anjo Rafael dehan ba klosan Tobias: “kalan ida ne’e ita sei ba hela hanesan bainaka iha Raguel nia uman: ema ne’e ó nia parenti, nia iha oan feto ida naran Sara.” Wainhira to’o iha cidade Ecbatana, Tobias hateten ba Anjo: “Maun Azarias, lori ha’u ba los ita maun Raguel nia uman.” Anjo lori nia ba Raguel nia uman. Sira hetan nia tur hela iha odamatan, sira hahu cumprimenta nia. Raguel hatan ba sira: “Maun-alin sira, ha’u nia ksolok tomak ba imi. Diak tebes imi to’o ho isin diak no moris.” Nia lori sira ba nia uman. Sira haris no fase tiha hotu, hahu tur atu han. Tuir mai, Tobias hateten ba Rafael: “Maun Azarias, dehan ba Raguel atu fo nia oan Sara nia liman mai ha’u.” Raguel rona tiha liafuan hirak ne’e, dehan ba klosan: “Haksolok han no hemu ba, basá la iha ema seluk nebe hakarak ha’u oan feto Sara nia liman, seláe ó, ha’u maun. Ha’u la iha direito atu fo ba ema seluk, seláe ba ó, basá, ita parenti. Maibé, ha’u oan ha’u hakarak fo hatene lolos ba ó. Ha’u fo ona nia ba parenti na’in hitu, maibé, sira hotu mate iha kalan, wainhira hakbesik an ba nia. Maibé, ha’u oan, oras ne’e haksolok han no hemu ba, basá Na’i sei tulun imi.” Maibé, Tobias hatan ba nia: “Ha’u sei la han no la hemu buat ida, wainhira lia nebe kona ba ha’u seidauk los.” Raguel hatan ba nia: “Ne’e mak ha’u sei ba halo: Tuir Lei Moisés nian, ha’u sei saran nia ba ó, tan ó nia maun no nia pertence ba ó, housi lalehan hakotu ona lia atu entrega nia ba ó. Nune’e, simu ó nia tua-nanga ba hodi lori ba ó nia uman. Houri ohin ba oin, ó, nia maun, no nia, ó nia feton. Houri ohin no ba nafatin saran ona ba ó. Ha’u oan, Na’i lalehan nian, iha kalan ne’e bele haraik tulun ba imi, hodi fo laran luak no hakmatek ba imi.” Raguel bolu nia oan feto Sara, nebe mai hasoru nia, kaer tiha nia liman hodi saran ba Tobias, dehan: “Tuir Lei no tuir buat nebe hakerek nanis iha Moisés nia Livro, simu nia ba nu’udar ó nia káben. Simu nia ba hodi lori nia ho isin diak no ksolok ba ó aman nia uman. Na’i Lalehan nian haraik tulun ba imi tuir dalan ho Nia hakmatek.”  Hafoin, bolu tiha Sara nia inan, hodi dehan ba nia atu lori surat ida mai. Hakerek tiha kontrato káben nian iha surat ne’e, nebe Raguel hakotu atu saran Sara ba Tobias nu’udar nia káben, tuir Moisés nia Lei. Tuir mai sira hahu han no hemu. Wainhira han no hemu hotu tiha, sira lori Tobias ba Sara nia kuartu; hafoin, sira sai hodi taka odamatan kuartu nian. Nune’e, Tobias hamriik housi toba fatin hodi dehan ba Sara: “Ha’u feton, hamriik ba, ita ba harohan! Ita husu ba Na’i, atu haraik Nia laran luak no maskoin mai ita.” Sara hamriik, sira rua hahu harohan hodi husu ba Na’i atu haraik tulun ba sira. Tobias hahu harohan nune’e:  “Rahun diak ba Ita, ami aman sira nia Maromak! Rahun diak ba Ita Nia naran housi otas ba otas no ba nafatin. Lalehan no Criatura tomak hahi no hana’i Ita Boot iha tempo hotu no ba nafatin. Ita Boot mak hakiak Adão hodi fo ba nia Eva, nu’udar nia káben, atu tulun nia, housi sira mak moris ema criatura hotu-hotu. Ita Boot lia tun, dehan: ‘La dun diak, mane hela mesak; Ita ba hakiak nia tulun-maluk ida nebe hanesan nia.’ Oras ne’e, laos tamba isin nia hakaran mak ha’u simu ha’u nia feton ne’e, maibé, uluk knana’in ha’u simu nia, atu halo tuir Ita Futar liafuan. Haraik tulun mai ami no halo ami hamutuk to’o tinan ferik-katuas.”

Maromak Futar Lia.

 

Salmo Responsorial.                                                                                                             (Sal. 128, 1-2. 3. 4-5)

RefrãoNa’i sadia ita iha ita nia moris tomak. Repete-se

  • Rahun diak ba ida nebe hamta’uk Na’i, hodi la’o tuir Nia dalan. Sei han ho nia kosar wen, buat kmanek tomak sei la’o ho nia. Refrão
  • Nia káben sei sai hanesan ai-horis nebe hafuan iha nia uma laran; nia oan sira hanesan ai oliveira nia delun hale’u nia mesa. Refrão
  • Ne’e bensa ba ema nebe hamta’uk Na’i, housi Sião Na’i sei haraik bensa ba nia; ó bele hare Jerusalém nia kmanek iha ó nia moris tomak. Refrão

Aclamação

Refrão             Aleluia, aleluia

Jesus Cristo, ita nia Maksoi halakon mate;

Nia halo moris nabilan housi Evangelho.

 

Evangelho                                                                                                                                      (Mc. 12:28b-34)

+ Na’i Jesus Cristo Nia Evangelho nu’udar S. Marcos haktuir

Iha tempo nebá, ema escriba ida mai hakbesik  Nia hodi husu, “Ukunfuan uluk liu hotu mak ida nebe los?” Jesus hatan , “Ida nebe uluk liu mak: “Rona ba Israel, Na’i, Ita Nia Maromak,  mak Na’i ida mesak.  Ó sei hadomi Na’i, ó nia Maromak, ho ó nia fuan tomak,  ho ó nia klamar tomak, ho hanoin tomak no ho ó nia biit tomak’. Ida tuir nia mak ne’e: ‘Ó sei hadomi ó nia maluk nu’udar ó an rasik.’ La iha tan ukunfuan nebe boot liu sira ne’e.”  Escriba ne’e dehan ba Nia:  “Di’ak, Mestre.  Ho lialos, Ita dehan katak  Maromak ida de’it; la iha tan Maromak ida seluk, Nia mesak de’it. Hadomi Nia ho fuan tomak, no ho hanoin tomak, no biit tomak, no hadomi maluk hanesan ó an rasik, mak boot liu buat karan  sunu no sacrificio hotu.”  Jesus,  hare katak nia ko’alia ho matenek, dehan ba nia:  “Ó la dook housi Maromak nia Reino!” La iha tan ema ida nebe barani atu husu buat ruma ba Nia. 

Lia Maksoyn.

Leave a Reply

Your email address will not be published. Required fields are marked *