shadow
Diocese de Dili > NOTÍCIAS > LETURA DIÁRIA > Quinta Feira, XI SEMANA TEMPO COMUM

Quinta Feira, XI SEMANA TEMPO COMUM

ANO A

 

Primeira Leitura (2Cor. 11, 1-11)

Lia housi São Paulo nia surat ba sarani sira iha Corinto

Maun-alin  sira: Imi bele de’it tahan ha’u nia beik uitoan! Favor, tahan ha’u ba! Basa ha’u iha laran moras santo kona ba imi, basa ha’u saran tiha imi ba Cristo nu’udar fetoran momos ida ba nia la’en. Maibe ha’u ta’uk katak, nu’udar samea lohi Eva ho nia laran makerek, imi sei la hanoin tan atu saran imi an ba Cristo ho laran mos laran los. Basa ema ruma karik mosu ba imi no haklaken Jesus nebe oin seluk housi Ida nebe ami haklaken tiha, ka imi simu karik espirito nebe oin seluk housi ida nebe imi simu tiha, ka Evangelho nebe oin seluk housi ida nebe imi simu tiha ona, imi halo tuir nia lalais de’it. Ha’u hanoin katak ha’u la kiik liu “apóstolo boot sira”  iha buat hotu. Maski ha’u la matenek atu ko’alia, ne’e la dehan katak ha’u kuran matenek; iha buat hotu ami hatudu momos tiha buat ne’e ba imi. Ha’u sala ka uainhira ha’u haraik an atu imi bele foti an, basa ha’u haklaken Evangelho hodi la husu imi atu selu osan? Ha’u husu kreda sira seluk hodi simu tulun housi sira atu ha’u bele serbi imi. No uainhira ha’u iha imi leet no kuran sasan sira, ha’u la hatodan imi, basa maun alin sira housi Macedónia fo buat nebe ha’u kuran. Nune’e ha’u la hatodan no sei la hatodan imi iha buat hotu. Hodi Cristo nia lialos nebe ha’u iha, ema Acaia sira sei la bele hola ha’u nonok, maibe ha’u sei foti an. No tan sa?  Tan ha’u la hadomi imi?  Maromak hatene katak ha’u hadomi imi!

Maromak Futar Lia.

 

Salmo Responsorial.                                                                                                          (111, 1-4. 7-8)

Refrão :   Na’i, Ita hahalok mak los no di’ak. Repete-se

  • Ho laran tomak ha’u hahi Na’i, iha libur hamutuk ema los nian no iha assembleia. Na’i Nia hahalok kmanek boot tebes, halo nia emar sira hanoin ba nafatin. Refrão
  • Boot no kmanek tebes Nia hahalok sira, Nia laran luak no neon mos hela ba nafatin. Na’i Nia hahalok ema sei la haluha, Na’i laran diak no laran maus. Refrão
  • Na’i Nia liman nia hahalok mesak mos no los, Nia lei sira sei la muda, sei metin tinan ba tinan, hari metin iha lia los no justisa. Refrão

 

Aclamação.

Refrão : Aleluia, Aleluia. Repete-se

                  Imi simu Espirito ida nebe halo imi sai oan fudin,

                  nebe lori ita bolu: “Abba! Aman”. Refrão

 

Evangelho                                                                                                                               (Mt. 6:7-15)

+ Na’i Jesus Cristo Nia Evangelho nu’udar S. Mateus haktuir

Iha tempo neba, Jesus hateten ba escolante sira:  “Uainhira imi reza, keta ko’alia barak hanesan gentio sira; sira hanoin katak ho sira nia liafuan bar-barak, Na’i sei rona sira. Keta halo hanesan sira basa imi nia Aman hatene buat nebe imi kuran molok imi husu ba Na’i. Ne’e duni, harohan nune’e ba:  ‘Ami Aman iha Lalehan, halo Ita naran sai santo. Halo Ita nia reino to’o mai ami; halo tuir Ita nia hakarak ba iha rai nu’udar iha Lalehan. Haraik aihan loron loron nian mai ami. Haraik perdua mai ami nia tusan, nu’udar ami perdua sira nebe iha tusan ho ami. Keta husik ami monu ba tentasaun, maibe hasai ami housi buat aat. Basa imi perdua  karik ema sira nia sala, imi Aman iha Lalehan mos sei perdua imi nia sala sira. Maibe imi la perdua karik ema seluk, imi nia Aman mos sei la perdua imi nia sala sira”.

Lia Maksoyn

Leave a Reply

Your email address will not be published. Required fields are marked *