shadow
Diocese de Dili > NOTÍCIAS > LETURA DIÁRIA > Segunda Feira, XII DOMINGO IHA TEMPO COMUM

Segunda Feira, XII DOMINGO IHA TEMPO COMUM

ANO A

 

Primeira Leitura        Gn. 12, 1-9

Lia housi livro Génesis

Iha loron hirak neba,  Na’i lia tun ba Abraão:  “Husik tiha ó nia rain, ó nia parenti sira, ó nia aman sira nia uma, ba rai nebe ha’u sei hatudu ba ó. Ha’u sei halo ó sai nasaun boot ida. Ha’u sei fo bensa ba ó, Ha’u sei fo naran boot ida ba ó, ó rasik sei sai nu’udar bensa ba ema nebe fo bensa ba ó, Ha’u sei fo malisan ba ema nebe fo malisan ba ó. Tan ó, nasaun sira hotu rai nian, sei simu bensa”. Abraão ba, tuir Na’i haruka.  Lot ba ho nia, Abraão sai housi rai Haran ho tinan hitunulu resin lima. Ba hamutuk ho Abraão, nia féen Sara ho nia sobrinho Lot, nia emar sira ho nia sasan tomak nebe nia hetan iha rai Haran. Sira ba rai Canaã nebe Maromak hatudu ba sira.  Abraão la’o liu rai barak, to’o iha Siquém, hafoin liu housi carvalho sira Moré nian. Ema cananeu sira mak moris iha rai ne’e. Na’i mosu ba Abraão hodi dehan ba nia: “Ha’u sei fo nasaun ne’e ba ó nia oan sira”.  Abraão hari tiha altar ida, tan Na’i mosu ba nia iha neba. Housi neba, Nia liu ba foho iha loro-sa’e Betel nian, hafoin hari nia tenda, ho Betel iha loro-sa’e, no Ai iha loro-monu. Iha neba, nia hari tiha altar ida ba Na’i, hodi hamulak Nia naran. Hafoin, nia la’o nafatin ba oin to’o iha Négueb.

Maromak Futar Lia.

 

Salmo Responsorial                                                                                         Sal. 33, 12-13. 18-20. 22

RefrãoKsolok ba povo nebe Na’i hili ba Nia lima-rohan. Repete-se

  1. Rahun di’ak ba povo nebe hili Na’i ba nia Maromak, povo nebe Maromak hili ba Nia lima-rohan. Housi Lalehan Na’i hanoin, no Nia hamatan ba ema hot-hotu. Refrão
  2. Na’i hamatan ba sira nebe hamta’uk Nia, ba sira nebe hein iha Nia laran di’ak, atu hasai sira nia klamar housi mate, no haraik aihan ba sira iha tempo hamlaha. Refrão
  3. Ita klamar hein Maromak, Nia mak ita biit no ita mahein. Haraik mai ami Ita laran di’ak!tan ami hein iha Ita, Na’i. Refrão

 

Aclamação

Refrão : Aleluia, Aleluia. Repete-se

Maromak nia liafuan moris no book maka’as,

bele hatene borus ema nia hanoin no hakaran fuan nian. Refrão

 

Evangelho                                                                                                                               Mt.7:1-5

+  Na’i Jesus Cristo Nia Evangelho nu’udar São Mateus haktuir

Iha tempo nebá, Jesus hateten ba nia escolante sira: “Keta hanoin aat ema, atu ema la bele hanoin aat imi. Basa imi hanoin aat ema karik, ema mos sei hanoin aat imi: imi sukat nune’e, nune’e mos mak ema sei sukat imi. Tansa ó hare du’ut lahan iha ó nia maluk nia matan laran, maibe la hare aikabelak iha ó rasik nia matan laran? Oinsa ó bele dehan ba ó nia alin: ‘Husik ha’u hasai du’ut lahan housi ó nia matan laran,’ uainhira aikabelak sei hela iha ó rasik nia matan laran? Laran makerek, hasai uluk knana’in aikabelak housi ó nia matan laran, hafoin mak ó sei hare hodi hasai du’ut lahan housi ó nia maluk nia matan laran.

Lia Maksoyn.

Leave a Reply

Your email address will not be published. Required fields are marked *