shadow
Diocese de Dili > NOTÍCIAS > LETURA DIÁRIA > Terça Feira, XII DOMINGO IHA TEMPO COMUM

Terça Feira, XII DOMINGO IHA TEMPO COMUM

ANO A

 

Primeira Leitura         13, 2. 5-18;

Lia housi Livro Génesis

Iha loron hirak neba, Abraão riku teb-tebes iha bibi luhan boot, osan mutin no osan mean. Lot, nebe la’o hamutuk ho Abraão, iha mos bibi, kuda, karau no tenda barak.  Maibe, fatin neba la to’o atu sira atu sira moris hamutuk. Sira nia riku-soi barak teb-tebes, tan ne’e, la fo fatin atu sira rua moris hamutuk. Sira nia bibi-atan no karau-atan sira hare malu la di’ak; hahu hirus malu no baku malu. Iha tempo neba, cananeu no ferezeu sira mak horik iha fatin neba. Nune’e, Abraão dehan ba Lot: “Ha’u husu ba ó atu ita na’in rua labele iha lia ba malu, no mos ita nia bibi-atan sira la bele iha lia ba malu, basa, ita parenti. Iha ó nia oin ó la hare rai boot teb-tebes? Ita rua haketak malu: ó la’o karik ba sorin ba sorin karuk, ha’u ba kuanan; ó ba karik kuanan, ha’u ba karuk. Lot foti matan, hare rai tetuk boot Jordão nebe nia luan to’o iha Soar, nebe ué tama hela housi mota Jordão. Uainhira Na’i seidauk sobu hodi harahun Sodoma no Gomorro, fatin ne’e hanesan Na’i nia jardim, hanesan rai Egipto nian. Lot fihir hodi hili tiha rai tetuk tomak Jordão nian, hodi la’o ba Loro Sa’e. Nune’e mak sira rua haketak malu hodi moris keta-ketak. Abraão moris iha rai Canaã nian; Lot ba moris iha cidade sra housi rai tetuk, iha nebe nia halo tenda to’o Sodoma. Ema sira housi Sodoma mesak ema maksalak hodi halo sala oi-oin hasouru Maromak. Uainhira Lot haketak-an ona housi Abraão, Na’i lia tun ba Abraão, dehan:  “Foti matan housi fatin nebe ó hela ba, hodi hare ba Tasi Feto no Tasi Mane, ba Loro Sa’e no ba Loro Monu. Rai hotu nebe ó hare daudaun, Ha’u sei saran ba ó no ba ó nia bei-oan sira ba nafatin. Ha’u sei halo ó nia bei-oan sira sai ua’in hanesan rai rahun iha rai.  Uainhira ema ruma bele sura rai rahun iha rai, bele mos sura ó nia bei-oan sira. Ó hamriik ba hodi la’o tuir rai sira nebe Ha’u hatudu ona ba ó, basa, rai sira ne’e hotu Ha’u sei saran ba ó”. Abraão foti no lori nia tenda sira ba hari iha Carvalho Mambre nian iha Hebron. Iha neba, nia hari altar ida ba Na’i.

Maromak Futar Lia.

 

Salmo Responsorial                                                                                            15, 2-3ab. 3cd-4ab. 5

RefrãoNa’i sé mak bele horik iha Ita kadunan! Repete-se

  1. Ema nebe moris hodi la halo salan, moris tuir justisa no ko’alia lialos ho laran tomak. Ema nebe la foti lia bosok hodi du’u matak. Refrão
  2. Ema nebe la halo aat ba ema seluk, la hakribi nia maluk. Ema nebe hewai ema aat, hahi ema nebe hamta’uk Maromak. Refrão
  3. Ema nebe halo tuir nia juramento maski hetan susar, la empresta nia osan hodi husu funan, lakohi hatatan ema laran maus; ema hanesan ne’e sei la monu. Refrão

 

Aclamação

Refrão : Aleluia, Aleluia. Repete-se

Na’i dehan: “Ha’u mundo nia roman;

ema se tuir Ha’u, sei hetan roman moris nian. Refrão

 

Evangelho                                                                                                                      Mt. 7:6, 12-14

+ Na’i Jesus Cristo Nia Evangelho nu’udar S. Mateus haktuir

Iha tempo neba, Jesus hateten ba escolante sira: “Keta fo buat nebe santo ba asu sira. Keta soe imi nia fatuk murak ba fahi sira; lae karik, sira ne’e sei sama imi nia fatuk murak, hafoin fila hasouru imi hodi tata les imi.” “Ne’e duni, buat hotu nebe imi hakarak ema halo ba imi, imi mos halo ba sira; basa ne’e mak ukunfuan no Profeta sira.” “Tama housi odamatan kloot ba; basa odamatan boot no dalan luan mak lori ema atu lakon an, no ema barak liu housi nia. Maibe odamatan kloot tebes no dalan kiik duni mak lori ema ba moris, no ema uitoan de’it mak hetan nia.”

Lia Maksoyn.

Leave a Reply

Your email address will not be published. Required fields are marked *