shadow
Diocese de Dili > NOTÍCIAS > LETURA DIÁRIA > Quarta Feira, XIV DOMINGO IHA TEMPO COMUM

Quarta Feira, XIV DOMINGO IHA TEMPO COMUM

ANO A

 

Primeira Leitura          Gn. 41. 55-57;  42, 5-7a, 17-24a

Lia housi livro Génesis  

Iha loron hirak neba, iha rai Egipto tomak hahu hamlaha, povo tomak hodi hakilar ba husu ai-han ba Faraó. Nune’e, Faraó fo hatene ba ema hotu-hotu housi Egipto, hodi dehan: “Imi ba hasoru José, hodi halo tuir buat nebe nia haruka.” Tan nasaun tomak hamlaha José haruka loke uma hotu be haloot trigu, hahu faan trigo ba ema Egipto sira. Maski hamlaha ne’e sai maka’as iha rai Egipto, ema housi rai selu-seluk mai iha Egipto atu sosa trigu iha José, basá, rai hotu-hotu hamlaha boot. Jacob mos haruka nia oan sira ba sosa trigu iha Egipto, hamutuk ho ema housi rai selu-seluk, basá, iha rai Canaã mos hamlaha. Rai Egipto nia ukun iha José nia liman; nia mak faan trigu ba ema hotu-hotu. Uainhira José nia maun sira to’o, sira tuku-tur hodi hakru’uk iha nia oin. José hatene kedas sira wainhira nia hare hetan sira, maibé, hakfudik hatudu-an hanesan ema leet, ko’alia maka’as ba sira hodi dadur tiha sira iha loron tolu nia laran. Liu tiha loron tolu José dehan ba sira: “Imi sei halo tuir buat nebe ha’u haruka, atu imi bele moris, basa, ha’u ema ida nebe hamta’uk Maromak. Imi ema laran los karik, imi ne’e ida sei hela nu’udar dadur iha fatin nebe imi hela daudaun ba. Imi sira seluk bele lori trigu ba atu imi nia familia sira keta hamlaha. Hafoin, imi lori imi nia alin ikun ne’e mai, nu’udar sasin ba imi nia liafuan.  Halo nune’e karik imi sei la mate.”  Sira halo tuir buat nebe José haruka, no sira hahu ko’alia ba malu: “Tebes duni, oras ne’e mak ita selu todan ba buat nebe uluk ita halo ba ita nia alin José. Ita hare nia laran susar, wainhira nia husu perdua ba ita, ita la kohi rona nia. Tan ne’e, malisan ne’e monu mai ita leten.” Rúben hatan ba sira: “Ha’u la dehan ba imi atu imi keta halo buat aat ba kiik-oan? Maibé, imi la kohi rona ha’u, oras ne’e husu ona konta mai ita kona ba nia mate.” Sira la hatene katak José hatene hela sira nia ko’alia, tan José ko’alia ho sira housi durubasa. José hadook-an tiha housi sira hahu tanis;  hafoin, fila fali mai hamutuk ho sira hodi ko’alia ho sira.

Maromak Futar Lia.

 

Salmo Resp.                                                                                Sal. 32(33), 2-3, 10-11, 18-19

Refrão : Na’i, haraik Ita laran luak mai ami, tan ami hein iha Ita. Repete-se

  • Hahi Na’i ho cítara, hananu ba Nia salmo ho harpa nia lian; hananu knananuk foun ida, hananu ho di’ak no ho klamar. Refrão
  • Na’i sobu fiar laek sira nia hanoin, halakon povo sira nia hakaran, Na’i nia plano hela ba nafatin no Nia fuan nia hanoin housi otas ba otas. Refrão
  • Na’i Nia matan fila ba sira be hamta’uk nia, ba sira nebe hein iha Nia laran di’ak, atu hasai sira klamar housi mate, no fo han ba sira iha tempo hamlaha. Refrão

 

Aclamação

Refrão : Aleluia, Aleluia. Repete-se

                  Maromak nia reino besik ona;

                 imi hakribi salan no fiar iha Evangelho. Refrão

 

Evangelho                                                                                                                             Mt.10,1-7

+  Na’i Jesus Cristo Nia Evangelho nu’udar S. Mateus haktuir

Iha tempo neba, Jesus bolu Nia escolante sira na’in sanulu resin rua, hodi fo biit ba sira atu duni sai espirito fo’er sira, no mos atu fo isin diak ba sira hotu nebe terus moras oi-oin. Apostolo sira nia naran mak ne’e: Ida uluk, Simão nebe hanaran Pedro, no nia alin André; Tiago Zebedeu nia oan, no nia alin João; Filipe ho Bartolomeu; Tomé ho Mateus, publicano; Tiago, Alfeu nia oan, ho Tadeu, Simão Cananeu ho Judas Iscariotes, nebe sei saran Nia. Jesus haruka sira na’in sanulu resin rua ne’e, la’o ba no hanourin hodi dehan: “Keta tuir gentio sira nia dalan, keta tama iha Samaritano sira nia cidade. Maibe buka uluk bibi sira nebe lakon housi Uma Israel nian. Tuir dalan, haklaken, ba katak Reino Lalehan besik ona.”  

Lia Maskoyn.

Leave a Reply

Your email address will not be published. Required fields are marked *