shadow
Diocese de Dili > NOTÍCIAS > LETURA DIÁRIA > Quinta Feira, XIV DOMINGO IHA TEMPO COMUM

Quinta Feira, XIV DOMINGO IHA TEMPO COMUM

ANO A

 

Primeira Leitura              Gn.44,18-21,23b-29;45,1-5

Lia housi livro Génesis  

Iha loron hirak neba, Judá hakbesik ba José hodi dehan ba nia: “Ha’u Na’i, ha’u husu ba ita, atu rona ata-oan nia lia nebe hasa’e ba ita. Ita nia hirus keta mai hasoru ha’u, basá, ita boot hanesan Faraó. Na’i, ita husu ona ba atan oan sira nune’e: ‘Imi iha aman no iha tan alin ruma?’ Na’i, ami hatan ba ita nune’e:  ‘Ami iha aman ida, katuas liu ona, no alin ida sei kiik, nebe moris, wainhira nia aman katuas ona. Ida kiik ne’e nia maun housi inan ida ne’e, mate tiha ona; sei hela nia mesak deit.  Tan ne’e, nia aman hadomi teb- tebes nia.’ Maibé, ita hateten ba ita atan sira ne’e: ‘Imi lori nia mai iha ne’e, atu ha’u hare ho ha’u  nia matan rasik. Imi nia alin kiik la mai karik ho imi, imi sei la mosu hi’as fali iha ha’u nia oin.’ Nune’e, wainhira ami fila hi’as ba ami aman, be ita atan, ami sei haktuir ita nia lia fuan ba nia. Wainhira ami aman dehan mai ami; ‘Imi fila ba atu sosa ai-han ruma mai ita’, ami sei hatan ba nia: ‘Ami sei la ba iha neba. Ami sei bele ba, ami nia alin kiik ba karik hamutuk ho ami. Basá, ami la bele fila ba ema ne’e nia oin, wainhira ami la lori nia.’ Ami nia aman, be ita atan, dehan mai ami nune’e: ‘Imi hatene katak ha’u nia kaben ko’us oan rua mai ha’u. Ida lakon tiha no ha’u dehan ba ha’u an rasik: Tebes duni, balada fuik sira les han tiha ona nia! To’o ohin loron ha’u ladauk hare tan ona nia. Imi hakarak lori tan ida ne’e, ba dook housi ha’u, no nia hetan susar ruma karik, imi sei halo ha’u tun ba matebian sira nia horik fatin hodi ha’u ulun ho fuuk mutin hakruuk ho neon sala”. José la tahan tan nia mata wén iha ema barak nia oin, tan ne’e nia hakilar hodi dehan: “Haruka ema barak ne’e hotu sai housi ha’u nia oin.” Nune’e, José hela mesak, wainhira nia fo hatene sai nia an ba nia maun-alin sira. Nia hahu tanis maka’as, nebe halo ema Egipto sira hotu rona, no uma laran Faraó nian mos rona. Hafoin, nia hateten ba nia maun sira: “Ha’u mak José! Ha’u nia aman sei moris hela ka?”  Nia maun sira la bele hatan buat ida ba nia, tan sira tauk hela iha nia oin. José dehan tan ba nia maun sira: “Imi hakbesik mai ha’u.” Sira hakbesik ba nia. José dehan teni: “Ha’u mak José, imi nia alin, nebe imi faan ba ema Egipto. Maibé, oras ne’e, imi keta tauk no keta laran susar tan imi faan ha’u mak ha’u bele mai iha ne’e, basá, atu soi imi nia moris mak Maromak haruka ha’u mai uluk liu ba imi.” 

Maromak Futar Lia.

 

Salmo Responsorial.                                                                                                 Sal.104(105),16-17,18-19,20-21

Refrão : Hanoin hikas fali ba, kmanek be Na’i halo. Repete-se

  • Maromak bolu hamlaha mai rai, hasai tiha housi sira ai-han be sira han. Haruka ema ida ba uluk iha sira oin, José, ema faan nu’udar atan. Refrão
  • Sira futu nia ain ho henu, kesi nia kakorok ho korenti besi nian, to’o halo tuir profeta nia lia, no Na’i Nia lia fuan hatudu nia sala laek. Refrão
  • Liurai haruka atu husik sai tiha nia, povo nia liurai haraik liberdade ba nia. No foti nia atu ukun nia uma, sai emboot ba nia sasan tomak. Refrão

 

Aclamação

Refrão : Aleluia, Aleluia.  Repete-se

                  Maromak Nia reino besik ona;

                  imi hakribi imi nia salan no fiar iha Evangelho. Refrão

 

Evangelho                                                                                                                                                          Mt.10,7-15

+  Na’i Jesus Cristo Nia Evangelho nu’udar S. Mateus haktuir

Iha tempo neba, Jesus haruka nia Apostolo sira dehan: “Tuir dalan, haklaken ba katak reino lalehan besik ona. Halo moras sira hetan isin di’ak ba, halo mate sira moris hi’as fali ba, halo moras leper sira sai mos, duni sai diabo sira.  Imi simu hodi la selu, fo mos hodi la hein ema selu imi. Keta lori osa mean, osa mutin eh osan riti iha imi nia futukabun. La bele lori kohe tuir dalan, hatais tahan rua, sandalias, eh aitonka; basa serbisu na’in soi atu simu nia kolen. Uainhira imi tama iha cidade ka knua ruma, husu lai ema se mak di’ak, hodi hela iha neba to’o imi sai. Uainhira imi tama iha uma ida, cumprimenta nia ba, Uma ne’e soi karik, imi nia dame sei tun ba sira; nia la soi karik, imi nia dame sei fila ba imi. Ema la simu imi karik eh rona imi nia liafuan, liki rai rahun housi imi nia ain uainhira imi sai housi uma ka cidade ne’e. Tebes, Ha’u dehan ba imi katak iha loron justisa nian, rai Sodoma no Gomorra sira nia castigo sei la dun todan hanesan cidade ne’e nian”.

Lia Maksoyn.

Leave a Reply

Your email address will not be published. Required fields are marked *