shadow
Diocese de Dili > NOTÍCIAS > LETURA DIÁRIA > Sexta Feira, XIV DOMINGO IHA TEMPO COMUM

Sexta Feira, XIV DOMINGO IHA TEMPO COMUM

ANO A

 

Primeira Leitura       Gn.46,1-7,28-30

Lia housi livro Génesis    

Iha loron hirak neba, Jacob hahu la’o ho nia riku-soin tomak, no wainhira to’o iha Bersabé, nia hasa’e sacrificio ba nia aman Isaac nia Maromak. Iha kalan, Maromak ko’alia ho nia housi mehi: “Jacob, Jacob!”  Nia hatan: “Ha’u mak ne’e.”  Maromak hateten teni: “Ha’u mak Na’i, Maromak ó nia aman nian. Ó keta tauk tun ba Egipto, basá, iha neba mak Ha’u sei halo housi ó sai povo boot ida. Ha’u rasik sei ba hamutuk ho ó ba Egipto, Ha’u  rasik mos mak sei halo ó fila hi’as fali housi Egipto. José nia liman mak sei taka ó nia matan.” Jacob sai housi Bersabé. Israel nia oan sira fo tulun ba Jacob, nia aman, mos ba nia oan sira no nia feen sira, hodi sa’e ba kareta sira nebe Faraó haruka mai atu tula sira ba. Sira lori mos sira nia bibi luhan ba luhan, no riku-soin selu-seluk tan nebe sira hetan iha rai Canaã. Jacob ho nia parenti tomak tun ba Egipto:  nia oan mane sira, ho nia oan mane sira nia oan, nia oan feto sira, ho sira nia oan. Nia lori nia oan no nia bei-oan sira hotu ba Egipto. Jacob haruka Judá ba uluk fo hatene ba José, atu mai hasouru nia iha Géssen. Wainhira sira to’o iha fatin neba, José haruka hadi’a nia kareta atu mai hasouru nia aman iha Géssen. Hare hetan tiha nia aman nia halai ba hako’ak nia aman, hahu tanis kleur teb-tebes. Jacob dehan ba José:  “Oras ne’e ha’u bele mate, tan ha’u hare ona ó nia oin, no ó sei moris hela.”

Maromak Futar Lia.

                                                                         

Salmo Responsorial                                                                       Sal. 36(37), 34, 18-19, 27-28, 39-40

Refrão : Maksoyn ema los nian mai housi Na’i. Repete-se

  • Ó laran metin iha Na’i ba hodi halo diak, ó sei horik iha rai no moris hakmatek. Ó nia ksolok tomak o tau iha Na’i ba, Nia sei haraik ba ó fuan nia hakaran tomak. Refrão
  • Na’i hatene ema laran los nia loron sira, ninia lima-rohan sei hela ba nafatin. Sira sei la moe iha tempo suasr, iha tempo hamlaha, sira hetan aihan ua’in. Refrão
  • Hadook-an housi aat hodi halo buat di’ak, ó sei moris ba nafatin, basa, Na’i hadomi justisa; la husik sira be laran metin iha Nia. Refrão
  • Maksoin ema los nian mai housi Na’i, Nia mak ninia subar fatin iha tempo susar; tahan nia housi ema aat sira liman, no soi nia, basa, nia hamahan-an iha Na’i. Refrão

 

Aclamação

Refrão : Aleluia, Aleluia. Repete-se

                  Uainhira Espirito lialos nian mai, Nia sei hanourin lialos hotu ba imi.

                  Nia sei halo imi hanoin hetan fali buat hotu nebe Ha’u hanourin ona ba imi. Refrão

 

 Evangelho                                                                                                                                            Mt.10,16-23

+  Na’i Jesus Cristo Nia Evangelho nu’udar S. Mateus haktuir :

Iha tempo neba, Jesus hateten ba nia Apóstolo sira:  “Ha’u haruka imi ba hanesan bibi sira iha asu-fuik sira leet. Ne’e duni, matan moris neon na’in ba hanesan samea sira no mos laran los hanesan manu falur sira. Matan moris ho ema sira: sira sei lori imi ba sinédrio hodi baku imi iha sira nia sinagoga laran. Sira sei lori hodi kaer imi ba embo’ot no liurai sira tanba Ha’u, atu imi fo sasin ba sira no ba gentio sira. Maibe uainhira sira saran imi, keta hanoin resin kona bas a mak imi sei hatan, eh ko’alia oin sa; iha oras neba sei haraik ba imi atu dehan saida. Basa la’os imi mak ko’alia, maibe imi Aman nia espirito mak sei ko’alia liu housi imi.  Maun sei saran nia alin ba mate, aman sei saran nia oan; oan sira sei foti liman hasouru aman sira hodi oho sira. Ema hotu sei odi imi tan Ha’u nia naran; maibe ema nebe hela metin to’o rohan sei hetan makoin. Uainhira ema hanehan imi iha cidade ida, imi ba cidade seluk. Ha’u dehan ba imi katak molok imi liu housi cidade hotu Israel nian, Oan Mane sei mai ona.

Lia Maskoyn.

Leave a Reply

Your email address will not be published. Required fields are marked *