shadow
Diocese de Dili > NOTÍCIAS > LETURA DIÁRIA > Sabado, XIV Semana Tempo Comum

Sabado, XIV Semana Tempo Comum

ANO A

 

 Primeira Leitura               Gn.49,29-33;50,15-25a(26a)

Lia housi livro Génesis

Iha loron hirak neba, Jacob hateten hela ba nia oan sira nune’e: “Ha’u atu ba ona hamutuk ho ha’u nia emar sira. Imi sei hakoi ha’u hamutuk ho ha’u nia bei-ala sira iha rate nebe hela iha rai Éfron ema hitita nian. Rate ne’e hela besik rai Macpela, iha Mambré nia oin iha rai Canaã. Rai ne’e Abraão sosa housi Éfron, ema hitita, ba cemitério. Iha neba mak hakoi Abraão ho nia feen Sara; iha neba mak hakoi Isaac ho nia feen Rebeca no mos iha neba mak ha’u hakoi Lia. Rai no rate sira ne’e Abraão sosa iha ema hitita nia liman.”  Hateten hela tiha lia fuan hirak ne’e ba nia oan sira, Jacob hasa’e nia ain ba toba fatin; hafoin, nia i’is kotu hodi ba libur-an hamutuk ho nia aman sira. Hare ba katak sira nia aman mate ona, José nia maun sira hateten ba malu: “Oras ne’e José fila mai karik nia sei hasouru ita tan buat nebe ita halo ba nia?” Tan ne’e, sira haruka fo hatene ba nia nune’e: “Wainhira atu mate, ó nia aman fo hela lia menon ida ne’e mai ami: ‘Hodi ha’u nia naran, imi fo hatene ba José nune’e: Ha’u husu ba ó atu perdua ó nia maun sira nia salan hotu nebe sira halo hasouru ó.’ Nune’e, ho laran diak, oras ne’e perdua sala boot ne’e housi ó aman Nia Maromak nia atan sira.!” Wainhira rona lia fuan hirak ne’e, José tanis teb-tebes. Nia maun sira ba kedas hasouru nia tuku-tur ba hodi dehan ba nia:  “Ami hotu iha ne’e atu sai nu’udar ó atan.”  Maibé, José hatan ba sira: “Imi keta tauk! Imi hanoin katak ha’u iha Maromak Nia fatin? Uluk imi hanoin atu halo aat mai ha’u, maibé Maromak, iha Nia hakaran, hasai buat diak housi ne’e, hodi halo buat diak nebe oras ne’e mosu,  soi ema povo wa’in nia moris. Tan ne’e, imi keta tauk. Oras ne’e, ha’u mak sei tau matan ba imi no ba imi nia oan sira. Nune’e, nia haksolok sira nia fuan.” José ho familia sira nia aman nian, hela iha rai Egipto; José nia moris to’o tinan atu ida sanulu. Nia hare Efraim nia oan sira to’o derasan ba dala tolu no mos Maquir nia oan sira, Manassés nia oan sira be nia simu iha nia ain tur leten uainhira sira moris. Ikus mai, José dehan ba nia maun sira: “Ha’u atu mate ona, maibé, Maromak sei mai tulun imi.  Nia sei halo imi sai housi rai ne’e fila hikas ba fali rai nebe Nia hakotu hela ho juramento ba Abraão, ba Isaac no ba Jacob.” Tan juramento ne’e, nia dehan ba Israel oan sira: “Maromak sei mai tulun imi; nune’e, imi sei lori ho ha’u nia ruin sira housi ne’e.” José mate ho tinan atus ida sanulu.

Maromak Futar Lia.

 

Salmo Responsorial                                                                                     Sal. 104(105), 1-2,3-4,6-7

Refrão :   Imi be haraik-an, buka Na’i ba. Repete-se

  • Agradece ba Na’i, hahi Nia naran, haklaken Nia hahalok iha povo sira leet. Hananu ba Nia salmo no hino, haklaken Nia kmanek hotu. Refrão
  • Hahi-an iha Nia naran santo, fuan be buka Na’i, haksolok ba. Hakbadak Na’i no Nia biit, buka nafatin Nia futar oin. Refrão
  • Bei-oan sira housi Abraão, Na’i nia atan, oan sira housi Jacob be Na’i hili nanis, Nia mak Na’i, ita nia Maromak, Ninia tesi lia mak lei iha rai tomak. Refrão

 

Aclamação

Refrão : Aleluia, Aleluia Repete-se

                  Ksolok ba imi uainhira ema hasara imi tan Cristo nia naran,

                  basa Maromak nia Espirito horik ona iha imi. Refrão

 

Evangelho                                                                                                                       Mt.10,24-33

+  Na’i Jesus Cristo Nia Evangelho nu’udar S. Mateus haktuir:

Iha tempo neba, Jesus hateten ba Nia Apóstolo sira: “Escolante, la bele boot liu fali Mestre, atan la bele boot liu fali nia na’i. Escolante ida sai hanesan nia mestre to’o ona, no mos baa tan sai hanesan nia na’in. Ema hanaran uma na’in Belzebu karik, oinsa liu tan mak sira sei hanaran sira nebe hela iha nia uma laran! Ne’e duni, keta ta’uk sira ba, basa la iha buat nebe subar hela nebe ema sei la fo sai, eh buat nebe naksubar nebe ema sei la hatene. Buat nebe Ha’u dehan ba imi iha nakukun laran, de’it, imi sei haklaken housi uma nia kakuluk leten.” “Keta ta’uk ema sira nebe oho isin lolon, maibe la bele oho klamar. Maibe tauk ba ida nebe bele halo lakon isin no klamar hotu iha inferno. Manu oan rua la fa’an ba doit ida? Maibe sira ida la monu ba rai uainhira imi Aman la husik. Imi nia fuuk iha ulun mos sura hotu. Ne’e duni, imi keta ta’uk, basa imi folin liu manu oan barak.” “Ne’e duni, ema nebe fo sasin karik kona ba Ha’u iha ema seluk nia oin, Ha’u mos sei sasin kona ba nia iha ha’u Aman nebe iha Lalehan nia oin. Maibe ema nebe heli lian Ha’u iha ema nia oin, Ha’u mos sei heli lian nia iha ha’u Aman nebe iha Lalehan nia futar oin.”

Lia Maksoyn.

Leave a Reply

Your email address will not be published. Required fields are marked *