shadow
Diocese de Dili > NOTÍCIAS > LETURA DIÁRIA > Quarta Feira, XV Semana do Tempo Comum

Quarta Feira, XV Semana do Tempo Comum

Ano A

 

Primeira Leitura                   Ex. 3, 1. 6. 9-12

Lia housi livro Éxodo

Iha loron neba, Moisés hein hela bibi, nia banin mane Jetro, na’ilulik iha rai Madiã ninian. Nia lori bibi sira ba iha rai-fuik maran nia sorin balu ba. Nia to’o iha Maromak Nia foho Horeb. Na’i Nia Anjo mosu ba nia hanesan áhi-klaak moris iha ai-klobor oan ida. Moisés hare áhi ne’e moris hela, maibé, la han mohu ai-klobor ne’e. Moisés hanoin iha nia laran nune’e: “Ha’u ba besik, hodi hare to’ok buat foun sa ne’e? Na’i hare nia hakbesik an ba ai-klobor ne’e?” Na’i hare nia hakbesik-an ai klobor ne’e. Nune’e, Na’i bolu nia housi ai-klobor ne’e: “Moisés, Moisés!” Nia hatan: “Ha’u mak ne’e!”  Maromak dehan teni: “Ó keta besik mai. Hasai tiha sandális housi ó ain, basá, fatin ó sama daudaun ne’e, rai lulik ida.” Maromak lia tun dehan teni:  “Ha’u mak ó aman nia Maromak, Abraão nia Maromak, Isaac nia Maromak, Jacob nia Maromak”. Moisés taka tiha oin, basá, nia tauk hateke ba Maromak. Hafoin, Na’i dehan tan: “Ha’u hare Ha’u nia povo terus iha rai Egipto; Ha’u rona mos nia lian, tan gurda sira fo terus nia. Oras ne’e Ha’u haruka ó ba iha Faraó, atu ó lori sai housi Egipto Ha’u Nia povo, Israel nia oan sira”. Moisés hasa’e lia ba Maromak, hodi dehan: “Maibé, Na’i, ha’u ne’e se los atu ba ko’alia ho Faraó hodi lori sai Israel oan sira housi Egipto?”  Maromak hatan ba nia: “Ha’u sei hela hamutuk ho ó, ida ne’e hanesan sinal katak Ha’u mak haruka ó:  Wainhira ó lori sai tiha ona povo sira housi Egipto imi sei mai hasa’e sacrificio ba Maromak iha foho ida ne’e”.

Maromak Futar Lia.

 

Salmo Responsorial.                                                                                  Sal. 103, 1-4, 6-7 

Refrão :  Na’i, Ita mak Maromak laran luak no laran maus. Repete-se

  1. Hahi Na’i, ha’u klamar, ha’u an tomak, hawelok Nia naran santo. Hahi Na’i, ha’u klamar, la haluha Nia kmanek tomak. Refrão
  2. Na’i kasu ó salan tomak, Nia perdua ó nia hahalok aat hotu; hasai ó moris housi mate, hafutar ó ho grasa no laran maus. Refrão
  3. Na’i halo justisa, Nia hatau direito ema sira be terus todan, Nia hatudu Nia dalan ba Moisés, no ba Israel oan, Nia hahalok kmanek sira. Refrão

 

Aclamação

Refrão : Aleluia, Aleluia. Repete-se

Rahun di’ak ba Ita, Aman, Na’i lalehan no rai nian, tan Ita hatudu misterio reino lalehan nian ba ki’ik sira. Refrão

 

Evangelho                                                                                                      Mt. 11, 25-27

+  Na’i Jesus Nia Evangelho nu’udar S. Mateus haktuir

Iha tempo neba, Jesus dehan nune’e; “Aman, Na’i Lalehan no Rai nia nian, Ha’u hahi Ita tan Ita subar tiha buat hirak ne’e ba ema matenek no neon na’in sira hodi hatudu ba ki’ik oan sira. Los duni, Aman, tan Ita hakarak duni nune’e. Ha’u Aman tau tiha buat hot-hotu iha Ha’u liman; ema ida la hatene Oan, Aman de’it mak hatene; nune’e mos ema ida la hatene Aman, Oan deit mak hatene no mos ema nebe Oan hakarak hatudu ba nia.”

Lia Maksoyn.

Leave a Reply

Your email address will not be published. Required fields are marked *