shadow
Diocese de Dili > NOTÍCIAS > LETURA DIÁRIA > Quinta Feira, XV Semana do Tempo Comum

Quinta Feira, XV Semana do Tempo Comum

Ano A

 

Primeira Leitura            Ex. 3, 13-20

Lia housi livro Êxodo

Iha loron hirak neba, uainhira Moisés rona Na’i Nia lia housi ai-klobor nia hasa’e lia ba Na’i hodi dehan: “Ne’e  sa, ha’u ba buka Israel oan sira, hodi dehan ba sira: ‘Imi nia am’tuak sira nia Maromak haruka ha’u mai imi.’ Maibé, sira husu karik Ita naran mai ha’u, ha’u sei dehan los saida?”  Maromak dehan tan: “Ó sei dehan ba Israel oan sira nune’e: ‘Ida be iha naran “Ha’u mak Ha’u”. Nia mak haruka ha’u mai imi”. Hafoin, Maromak lia tun ba Moisés: Ó sei ko’alia nune’e ba Israel oan sira: ‘Na’i, Imi nia am’tuak sira nia Maromak, Abraão nia Maromak, Isaac nia Maromak, haruka ha’u mai imi’. Ne’e mak Ha’u nia naran ba nafatin housi otas ba otas. Ó ba halibur katuas sira Israel nian hodi dehan ba sira: ‘Na’i, imi nia am’tuak sira nia Maromak, Abraão, Isaac, Jacob nia Maromak mosu mai ha’u hodi dehan: Ha’u hare no hatene ona sa mak sira halo ba imi iha rai Egipto. Tan ne’e Ha’u hakotu lia atu lori sai imi housi Egipto iha nebe haterus imi, ba rai Cananeu sira nian, Hitita sira nian, Amorreu sira nian, Ferezeu sira nian, Hevita sira nian no Jebuseu sira nian: rai nebe susu-wén no wani-wen suli’. Israel nia katuas sira sei rona hodi halo tuir ó nia lia fuan sira; ó sei ba ho sira hasouru liurai Egipto nian. Imi sei hateten nune’e ba nia: ‘Na’i, Hebreu sira nia Maromak, mosu mai ami. Tan ne’e, husik ami ba iha rai fuik maran atu hasa’e sacrificio ba Na’i, ami nia Maromak, iha loron tolu nia laran.’ Ha’u hatene katak liurai Egipto nian sei la husik imi sai, selae ho liman biit na’in nian. Maibé, Ha’u sei halolo Ha’u liman hodi fo kastigu ba Egipto ho kmanek foun oi-oin nebe Ha’u sei halo iha sira leet. Nune’e, mak liurai sei husik imi sai housi Egipto.” 

Maromak Futar Lia.

 

Salmo Responsorial.                                                                                                            Sal. 105, 1. 5. 8-9. 24-27;

Refrão :   Na’i la haluha Nia moruk. Repete-se

  1. Agradece ba Na’i, haklaken Nia naran, halekar Nia hahalok ba povo tomak; hanoin hetan ba Ninia hahalok kmanek sira, no buat foun be Nia halo no liafuan sira housi Nia ibun. Refrão
  2. Nia la haluhan ba nafatin Nia moruk, Nia liafuan hela metin ba otas rihun ida, moruk nebe hakotu ona ba Abraão, no juramento nebe halo ba Isaac. Refrão
  3. Maromak hawa’in Nia povo, Nia halo sira biit na’in liu fali nia funu baluk sira; nakfila sira nia fuan be odi Nia povo, be rai kuna hasouru Nia atan sira. Refrão
  4. Nia haruka Nia atan Moisés, no Abraão, ida be Nia hili nanis; sira halo kmanek ua’in iha sira leet, halo kmanek ua’in iha rai Cam. Refrão

 

Aclamação

Refrão : Aleluia, Aleluia. Repete-se

Na’i dehan:  mai hamutuk ho ha’u imi hotu nebe kole no moris susar, tan Ha’u sei halo kmaan imi nia kole. Refrão   

 

Evangelho                                                                                                                                                         Mt. 11, 28-30

+  Na’i Jesus Cristo Nia Evangelho nu’udar S. Mateus haktuir

Iha tempo neba, Jesus lia tun nune’e: “Mai hamutuk ho Ha’u imi hotu nebe kole no moris susar, tan Ha’u sei halo kmaan imi nia kolen. Imi tau Ha’u Nia todan iha imi nia kbas hodi halo tuir Ha’u, tan Ha’u laran maus, Ha’u haraik-An. Imi sei hetan ksolok ba imi nia klamar, tan Ha’u Nia todan mamar, Ha’u Nia naha kmaan”.

Lia Maksoyn.

Leave a Reply

Your email address will not be published. Required fields are marked *