shadow
Diocese de Dili > NOTÍCIAS > LETURA DIÁRIA > Terça Feira, XV Semana do Tempo Comum

Terça Feira, XV Semana do Tempo Comum

Ano A

 

Primeira Leitura             Ex. 2.1-15a

Lia housi livro Éxodo

Iha loron hirak neba, mane ida housi uma-kain Levi nian káben ho feto foin sa’e ida, mos housi uma-kain Levi nian. Feto ne’e ko’us no tur áhi oan mane ida, nebe kmook tebes, tan ne’e nia subar tiha nia, iha fulan tolu nia laran. Maibé, tan nia la bele subar ba tempo kleur, nia halo ta’an iha ho soko, taka nia ko’ak ho bitume no ai ben. Hafoin, nia hatoba ki’ik oan iha laran, hodi tau iha onu naruk laran, iha mota ninin. Ki’ik oan ne’e nia feton housi dook hafunu hela atu hare buat sa mak sei mosu ba ki’ik oan ne’e. Faraó nia oan feto tun ba mota, atu haris; nia atan feto sira nebe ba ho nia, la’o tuir mota ninin. Nune’e, nia hare hetan ona ta’an iha onu laran, loke ta’an, nia hare hetan ki’ik oan nebe tanis hela. Nia hanoin netik ki’ik oan ne’e hodi hateten: “Hebreu sira nia oan ida.”  Ki’ik oan ne’e nia feton dehan ba Faraó nia oan feto:  “Ita hakarak ha’u ba buka feto ida housi feto sira hebreu nia leet atu mai fo susu ba nia?”  Faraó nia oan feto hateten ba nia:  “Ba”! Kiik oan nia feton ba bolu kedas nia inan rasik. Faraó nia oan feto dehan ba nia:  “Ó lori ki’ik oan ne’e ba hakiak ba ha’u, ha’u rasik mak sei selu ó nia kolen.”  Nune’e, feto ne’e lori kedas kiik oan ba nia uman hodi fo susu. Wainhira kiik oan ne’e boot nia lori hi’as mai hodi entrega ba Faraó nia oan feto, nebe simu ki’ik oan ne’e hanesan nia oan no hanaran nia, Moisés. Basá, nia dehan: “Ha’u hasai nia housi wé”.  Iha loron ida, wainhira nia boot ona, Moisés ba hare ema sira, nebe lor-loron halo serbisu todan. Nia hare mos ema Egipto ida baku hela nia maluk ema hebreu ida. Nia hateke ba-mai, hare ba katak egipto ne’e mesak, óho tiha nia hodi hakoi subar tiha iha rai henek laran. Iha loron tuir mai, Moisés fila hikas mai, nia hare ema hebreu na’in rua baku malu. Nia dehan ba ida nebe sala: “Tan sa ó baku ó nia maluk?”  Maibé, nia hatan ba Moisés:  “Se mak foti ó ba ami nia ulun eh juiz?”  Moisés tauk teb-tebes hodi dehan ba nia an rasik:  “Tebes, buat ne’e ema hatene ona!”  Faraó hatene ona katak Moisés óho egipto ida, tan ne’e nia buka atu óho tiha Moisés. Nune’e, Moisés halai dook housi nia, hodi ba subar-an iha Madiã.

Maromak Futar Lia.

 

Salmo Responsorial.                                                                    Sal. 69, 3. 13. 30-31. 33-34

Refrão :  Imi be kiak, buka Maromak, imi sei hetan moris. Repete-se

  1. Ha’u mouut iha tahu naruk laran, ha’u ain la hamriik metin; ha’u tama to’o ué kle’an nia okos, no laloran halo ha’u mout. Refrão
  2. Na’i, ba Ita ha’u hasa’e ha’u nia hamulak, iha tempo Ita see tilun mai, ha’u Maromak. Na’i, rona ha’u, tan Ita Nia laran diak, tan Ita laran luak, ha’u hein Ita Maksoin. Refrão
  3. Na’i, ha’u ema kiak no folin laek, souri ha’u, oh! Maromak, ho Ita Nia biit. Ha’u sei hananu hahi Maromak naran, ho laran ha’u sei haklaken Maromak beran. Refrão
  4. Imi be haraik an, rona mai hodi haksolok, buka Maromak, imi laran sei hetan biit foun. Maromak rona ema kiak sira la hakribi ema be moris iha susar laran. Refrão

 

Aclamação

Refrão : Aleluia, Aleluia. Repete-se

              Ohin imi rona karik Na’i nia lian, keta taka imi nia fuan. Refrão

 

Evangelho                                                                                                                    Mt. 11, 20-24

+  Na’i Jesus Cristo Nia Evangelho nu’udar S. Mateus haktuir

Iha tempo neba, Jesus haksiak maka’as cidade sira iha nebe Nia halo Nia milagre barak liu tan sira la moras ba sira salan.  “Susar ba ó, Corazim! Susar ba ó, Betsaida! Basa milagre sira nebe halo iha imi leet, halo tiha karik iha Tiro no Sidónia, kleur tiha ona, sira hakribi sala hodi hatais karon no ho ahikdesan. Tan ne’e Ha’u dehan ba imi katak iha Loron justisa nian castigo ba Tiro no Sidónia sei kmaan liu fali imi nian. Ó fali, Cafarnaum, ó hakarak foti an ó to’o Lalehan? Ó sei monu to’o inferno! basa milagre sira nebe halo ona iha ó halo tiha karik iha Sodoma, to’o ohin Sodoma sei hamriik hela. Tan ne’e, Ha’u dehan ba imi katak, iha loron justisa nian  castigo ba Sodoma sei kmaan liu fali ó nian”.

Lia Maksoyn.

Leave a Reply

Your email address will not be published. Required fields are marked *