shadow
Diocese de Dili > NOTÍCIAS > LETURA DIÁRIA > Domingo XVI Comun

Domingo XVI Comun

Ano A

 

Premeira Leitura                         12, 13, 16-19

Lia housi Livro Sabedoria

La iha Maromak seluk, maibé ida de’it, nebé tau matan ba hotu-hotu; nune’e Ita halo ami haré katak Ita tesi lia sa sala. Ita nia kbiit halo moris justiça, Ita ukun sasán tomak hodi tahan sira nafatin. Ita hatudu kbiit, wainhira ema la fiar Ita bele halo hotu; Ita hamoe ema sira nebé hatene Ita nia kbiit. Maski Ita iha  kbiit atu ukun, Ita halo Justiça ho laran maus, Ita ukun ami ho laran luak, tan wainhira Ita hakarak, Ita nia kbiit tahan. La’o tuir dalan ida ne’e, Ita hanourin povo sira katak ema di’ak sei belun ho ema tomak; hanourin Ita oan sira atu hein ho laran metin katak, liu tiha salan, Ita haraik laran moras.

Maromak Futar lia.

 

Salmo Responsorial                                                               Sal. 85(86), 5-6. 9-10. 15-16ª

Refrão : Na’i Ita laran di’ak, laran luak! Repete-se

  • Na’i ita laran di’ak no laran luak, hadomi perdoa sira nebé harohan ba ita. Na’i, rona ha’u nia hamulak, simu ha’u nia lian. Refrão
  • Nação Tomak nebé Ita halo, sei mai hana’i hahi Ita naran. Tan Ita boot duni halo kmanek oi-oin; Ita de’it mak Maromak. Refrão
  • Ita, Maromak laran di’ak, laran luak, la rai hirus, hanoin nafatin. Hanoin Ita atan, Na’i haraik kbiit mai ha’u. Refrão

 

Segunda Leitura                                                                                                  Rom. 8, 26-27

Lia housi São Paulo nia surat ba sarani sira iha Roma

Maun alin sira: Espírito Santo mai tulun ita nia moris, tan ita la hatene husu, atu hamulak lolós; Espírito ne’e duni harohan mai ita ho terus nebé susar atu hakerek. Ida nebé haré ita laran hatene Espírito nia hakarak. Tan Espírito harohan ba sarani sira tuir Maromak nia hakaran.

Maromak Futar Lia

 

Aclamação                                                                                                                    Mat. 13, 24

Refrão : Aleluia. Repete-se

                 Reino Lalehan hanesan ema nebé kuda fini di’ak iha toos. Refrão

 

 

Evangelho                                                                                                             Mat. 13, 24-40

@    Na’i Jesus Cristo nia Evangelho nu’udar São Mateus haktuir

Iha tempo nebá, Jesus hateten ba ema sira dadolin ida ne’e: “Reino Lalehan nian hanesan ema ida nebé kuda fini di’ak iha nia toos. Wainhira nia toba, ema aat ida mai kuda du’ut aat iha trigo nia leet hafoin ba tiha. Bainhira trigo sa’e mai hodi fo fulin, mosu mos du’ut aat. Toos nain nia atan sira dehan ba nia: ‘Na’i Ita la kuda de’it fini di’ak iha toos? Oin sá, moris du’ut aat? Na’i hatán: ‘Ema aat ida mak halo.’ Atan sira simu ba nia: ‘Ita hakarak, ami ba fokit tiha du’ut aat?’ Toos nain dehan: Keta, keta halo, imi fokit du’ut aat fokit mos trigo. Husik sira moris hamutuk to’o loron atu sohi; Iha loron ne’e, Ha’u sei dehan ba ema sira: Hili uluk du’ut aat, kesi hamutuk tiha atu sunu; hafoin hili trigo hodi tau hamutuk iha uma.” Jesus hanourin dadolin seluk: “Reino Lalehan nian hanesan mostarda musan ida nebé ema ida kuda iha toos. Musan ne’e kiik liu musan seluk, maibé moris tiha mai, boot liu aihoris sira seluk iha toos, boot hanesan ai ida; manu-fuik sira mai tur iha nia sanak.” Jesus dehan dadolin seluk: “Reino Lalehan nian hanesan fermento nebé feto ida tau ba farina atu halo farina ne’e sa’e.” Lia hirak ne’e Jesus hateten ba povo sira hodi dadolin; Jesus la hanourin ho lia seluk maibé, hodi dadolin de’it hodi halo tuir lia nebé profeta haklaken ona, dehan: “Ha’u sei loke Ha’u ibun, atu hanourin hodi dadolin; Ha’u sei haklaken lialos nebé subar hela molok mundo foi mosu.” Jesus husik tiha ema sira ne’e, fila fali ba uma. Escolante sira hakbesik ba Jesus, hodi dehan: “Na’i, hanourin lolós mai ami dadolin du’ut aat nian ne’e.” Jesus hatán: “Ema nebé tau fini di’ak iha rai ne’e, Mane Maksoyn; Toos, mak mundo ne’e. Fini di’ak katak Reino Lalehan nia oan sira; Du’ut aat katak diabo nia oan sira; ema aat nebé kuda du’ut aat katak demónio. Loron atu ema ba sohi katak mundo ne’e atu hotu ona; ema nebé tama ba sohi ne’e katak Anjo sira. Hanesan ema hili du’ut aat hodi tau ba ahi; nune’e mos sei mosu iha loron ikus: Mane Maksoyn sei haruka Nia Anjo sira mai, Anjo sira ne’e sei hasai housi Nia Reino ema laran makerek no sira nebé moris aat; hafoin, sei tau sira iha fatin ida nebé iha de’it ahí. Iha nebá, sira sei terus, sei tanis. Maibé, ema Santo sira sei nabilan hanesan loron iha Aman Maromak nia Reino. Ema nebé iha tilun, rona mai!”   

Lia Maksoyn

Leave a Reply

Your email address will not be published. Required fields are marked *