shadow
Diocese de Dili > NOTÍCIAS > LETURA DIÁRIA > Sexta Feira, XVI Semana Tempo Comum

Sexta Feira, XVI Semana Tempo Comum

Ano A

 

Primeira Leitura                          Ex. 20, 1-17

Lia housi livro Êxodo

Iha loron hirak neba, Maromak dehan liafuan hirak ne’e hotu: “Ha’u mak Na’i, ó nia Maromak; Ha’u mak hasai ó housi rai Egipto, housi moris atan nian; ó la iha tan Maromak seluk; mak Ha’u de’it. Ó la bele badaen naran ilas housi buat iha lalehan tutun, eh housi rai nian, eh housi ué okos nian. Ó keta tuku tur ba rai hana’i ba sira. Ha’u mak Na’i, ó nia Maromak, Maromak nebe hakarak hana’i de’it ba Nia. Ema sira be hewai Ha’u, Ha’u sei castigo nia oan ho bei-oan ba bei-oan sira tan aman inan sira nia salan; maibe, sira nebe hadomi Ha’u, halo tuir Ha’u nia ukunfuan, Ha’u sei hatudu laran-luak ba sira nia derasaan rihun ba rihun. Ó keta temi Na’i, ó nia Maromak naran atu tahan lia nebe hun abut la iha, basa, Na’i fo castigo ba ema nebe temi Nia naran hanesan ne’e. Ó sei hanoin nafatin loron sábado atu ó hala’o nia nu’udar loron santo. Iha loron neen nia laran mak ó sei kaer serbisu hodi halo buat hotu nebe ó atu halo. Maibe, ba bain hitu mak loron sábado, loron hamaha-an (descansa) nian, loron ó Maromak nian. Ó, ó nia oan mane eh oan feto, ó atan mane eh atan feto, ó nia balada dian sira, eh ema rai seluk nian be horik ho ó la bele halo naran serbisu ida; basa, Maromak halo lalehan, rai, tasi, no buat hotu nebe sira iha, iha loron neen nia laran; maibe to’o bain hitu nia hamaha-an. Tan ne’e, mak Na’i haraik bensa hodi halo santo loron sábado. Ó sei hamta’uk ó aman no inan; halo nune’e, ó nia moris sei naruk iha rai nebe Na’i, ó Maromak haraik ba ó. Keta oho; keta halo adulterio; keta na’uk; keta foti lia bosok hodi kesar ema. Keta kaan ema nia uma; keta kaan ema nia kaben no ema atan mane eh atan feto, karau eh kuda, naran buat ida nebe ema soi.

Maromak Futar Lia.

 

Salmo Responsorial.                                                                                                                                     Sal. 112, 1-2. 5-6. 8-9

Refrão : Na’i, Ita iha liafuan moris rohan laek nian. Repete-se

  • Na’i Nia lei los tebes, hamoris ema nia laran. Na’i Nia haruka metin tebes, fo matenek ba ema haraik-an sira. Refrão
  • Na’i Nia ukunfuan los tebes, sira haksolok fuan. Na’i Nia lei sira mos tebes, leno ita nia matan. Refrão
  • Hamta’uk Na’i, mos tebes, hela metin tinan ba tinan, Na’i tesi lia ho lialos tebes; Nia hanoin sira hotu mesak los duni. Refrão
  • Nia liafuan folin boot liu osa mean, osa mutin nebe kmo’ok liu. Sira midar liu uani ben, uani ben nebe midar tebes. Refrão

 

Aclamação

Refrão : Aleluia, Aleluia. Repete-se

                 Ksolok ba sira nebe rona Maromak Nia liafuan ho neon no laran hodi fo fuan, tan sira laran metin. Refrão

 

Evangelho                                                                                                                                                                           Mt. 13:18-23

+   Na’i Jesus Cristo Nia Evangelho nu’udar São Mateus haktuir

Iha tempo neba, Jesus lia tun ba escolante sira, dehan:  “Ne’e duni imi rona didiak aiknanoik kona ba ema nebe kari fini iha to’os. Fini nebe monu iha dalan ninin hanesan ema nebe rona liafuan reino nian maibe la hatene lolos. Ida nebe aat mai, no hasai buat nebe kuda tiha iha ema nia laran, fini nebe monu iha fatuk laran mak ida nebe rona liafuan hodi simu kedas ho ksolok. Maibe tan abut la iha, nia mate lalais; hetan tiha susar eh terus tanba liafuan, nia monu kedas. Fini nebe monu iha aitarak laran mak ida nebe rona liafuan maibe knaar sira nia rikusoi mundo ne’e nian hanehan liafuan ne’e; halo nia la fo fuan. Fini nebe monu iha rai di’ak mak ida nebe rona liafuan hodi hanoin didiak; ida ne’e fo fuan dala atus ida, ka neen nulu, ka tolu nulu”.

Lia Maksoyn.

Leave a Reply

Your email address will not be published. Required fields are marked *