shadow
Diocese de Dili > NOTÍCIAS > LETURA DIÁRIA > Dominggo Tempo Comum XVII

Dominggo Tempo Comum XVII

ANO A

 

Primeira Leitura                                          1 Rs. 3, 5. 7-12

Lia housi Livro Liurai sira nian

Iha loron hirak nebá, iha kalan ida, Na’i mosu hodi fo mehi ida ba Salomão iha Gábaon. Maromak dehan ba nia: “Husu buat nebé ó hakarak atu Ha’u fo ba ó.” Salomão simu: “Na’i, ha’u nia Maromak, Ita halo atan ha’u ukun povo ne’e, hodi ha’u aman David nia fatin; ha’u foin sa’e, ha’u la hatene ukun los oin sa. Atan  ha’u iha Ita nia povo nia leet, povo ida be ua’in, ua’in tebes, sura mos la bele. Haraik mai atan ha’u neon naroman ida atu bele hatene fihir di’ak no aat. Ema nebe los mak bele ukun Ita nia povo ua’in tebes ne’e?” Lia nebe Salomão husu, monu los ba Maromak nia laran. Maromak dehan ba nia: “Tan ó husu buat ida ne’e mai Ha’u, hodi la husu atu fo moris naruk, la husu riku; hodi la hakarak mate ba ó funu-balu sira, maibe, husu de’it matenek atu bele hatene  lia di’ak; ne’e duni, Ha’u sei fo buat nebe ó husu: Ha’u sei fo fuan ida ba ó, fuan ida be la iha ema seluk atu hanesan, houri uluk; ikus mai mos, sei la iha ema ida hanesan ó.”

Maromak  Futar Lia.

 

Salmo Responsorial                                                                                                      Sal. 118(119), 57. 75. 76-77. 127-128. 129-130

Refrão : Na’i, ha’u hadomi tebes Ita nia ukun. Repete-se

  • Na’i, ha’u dehan : sei hasa’e ha’u nia moris atu tuir ukun-fuan. Ha’u sei hadomi Ita ukun, liu osan mean no mutin tomak. Refrão
  • Ita nia kmanek fo di’ak mai ha’u, tuir lia nebe Ita hakotu ona ba Ita atan. Haraik Ita nia tulun atu ha’u bele moris. Ha’u haksolok ho Ita tulun. Refrão
  • Ita nia ukun kmanek tebes, Ita atan halo tuir, tan Ita nia liafuan fo naroman, fo matenek ba ema kiik. Refrão

 

Segunda Leitura                                                                                                                                                                        Rom. 8, 28-30

Lia housi São Paulo nia surat ba sarani sira iha Roma

Maun-alin sira: Ita hatene katak Maromak halo buat hotu atu ema tomak nebe hadomi Nia, bele hetan di’ak; ema sira nebe Nia hili ona, tuir Nia hakarak. Tan ema nebe Nia hatene kedas houri uluk, Nia hakarak ema sira ne’e moris tuir Nia Oan Mane nia ilas: Nia Ona Mane hanesan ema ua’in nia maun boot. Ema sira nebe Nia hakarak, Nia bolu mos; sira nebe Nia bolu, Nia halo moris santo; sira nebe Nia halo moris santo, Nia hahi iha Lalehan.

Maromak Futar Lia.

 

Aclamação                                                                                                                                                                                     Mt. 13, 44

Refrão : Aleluia, Aleluia. Repete-se

                 Reino Lalehan hanesan murak mean ida subar hela iha toos ida. Refrão

 

Evangelho                                                                                                                                                                                        Mt. 13, 44-52

+  Na’i Jesus Cristo nia Evangelho nu’udar São Mateus haktuir

Iha tempo neba, Jesus hateten ba ema lubun boot ida: “Reino Lalehan hanesan murak mean ida subar hela iha toos ida. Ema ida hetan tiha, hafoin subar fali; haksolok teb-tebes, ba fa’an nia sasan tomak, hodi ba sosa toos ne’e. Reino Lalehan hanesan mos ema ida nebe buka atu sosa fatuk murak. Hetan tiha ida folin boot, ba fa’an tiha nia sasan tomak hodi ba sosa fatuk murak ne’e. Reino Lalehan hanesan mos dai boot ida nebe ema soe ba tasi hodi hili sasan oi-oin de’it. Naresin tiha, sira dada mai tasi ibun; tur tiha, sira hili hodi tau ba ka’ut buat nebe di’ak; buat nebe aat, sira kaer soe tiha. Nune’e, sei mosu iha tempo ikus: Anjo sira sei mai fahe ema aat housi ema di’ak sira leet, hodi soe ba áhi laran. Iha neba, sei terus hodi tanis teb-tebes. Imi hatene lia hirak ne’e?” Sira hatan ba Nia: “Ami hatene.” Jesus dehan teni: “Tan ne’e, ema tomak nebe hahu hakerek iha Reino Lalehan, hanesan toos na’in ida nebe hatene hili buat foun no tuan housi nia murak”.

Lia Maksoyn.

Leave a Reply

Your email address will not be published. Required fields are marked *