shadow
Diocese de Dili > NOTÍCIAS > LETURA DIÁRIA > Segunda Feira, XVII Semana Tempo Comum

Segunda Feira, XVII Semana Tempo Comum

Ano A

 

Primeira Leitura                              Ex. 32, 15-24. 30-34

Lia housi livro Êxodo

Iha loron hirak neba, Moisés tun fali housi Foho Sinai mai, lori ai kabelak Lei nian, hakerek iha ai kabelak sorin-sorin. Ai kabelak sira Maromak Nia liman fatin;  Maromak rasik mak hakerek iha ai kabelak sira. Josué rona povo hahi haklalak. Nia dehan ba Moisés: “Ema sira iha tenda haklalak hakilar tan funu”. Moisés hatan: “La’os lian knananuk ksolok manan nian, la’os lian laran susar lakon nian; ha’u rona knananuk ho lian oi-oin”. Wainhira la’o besik ba rai luan, nia hare karau vaka ida halo ho osa-mean; iha karau ne’e nia sori-sorin ema dansa hela. Tan ne’e, Moisés hirus teb-tebes, sóe ba rai ai kabelak sira Lei nian nebe nia simu, hodi tuda rahun tiha iha foho nia hun. Nia kaer karau vaka osa mean nebe Israel oan sira halo, sunu mutuk tiha, tuku halo rahun, kahur ho wé, obriga Israel oan sira atu hemu. Moisés husu ba Aarão: “Povo ne’e halo sa ba ó, atu ó halo nia hala’o sala boot hanesan ne’e”? Aarão hatan ba nia: “Keta laran hirus hanesan ne’e ha’u na’in! Ita rasik hatene povo ne’e nia neon sadere duni ba sala. Sira rasik mak hateten mai ha’u: ‘Halo Maromak ida mai ami atu la’o iha ami oin; basá, Moisés ne’e, ema nebe hasai ami housi rai Egipto, oras ne’e nia iha nebe, ami la hatene.’ Nune’e, ha’u dehan ba sira: ‘Se mak iha osa-mean’? Sira hasai sira nia osa-mean hodi fo mai ha’u. Hafoin, ha’u tau ba áhi hodi sai tiha karau vaka ne’e”. Iha loron tuir mai, Moisés hateten ba povo: “Imi halo sala ida boot teb-tebes. Maibé, oras ne’e ha’u sa’e ba Maromak Nia Futar oin, bele hetan karik perdua ba imi sala”. Nune’e, Moisés sa’e fila fali ba Na’i Nia  sorin hodi dehan: “Oh! Povo ne’e halo sala boot ida, hodi halo Maromak falsu ida ba nia an ho osa-mean! Ita Boot hakarak karik perdua ba nia salan ne’e. Se lae, ha’u husu atu hasai tiha ha’u naran housi livro nebe Ita Boot hakerek”. Na’i hatan ba Moisés: “Ema nebe halo sala hasouru Ha’u, mak Ha’u sei hasai nia naran housi Ha’u Nia Livro. Oras ne’e ó bele fila fali ba atu lori povo ne’e ba fatin nebe Ha’u hatudu ona ba ó. Ha’u Nia Anjo sei la’o ho ó iha ó nia oin. Maibé, iha loron nebe atu husu konta, Ha’u sei castigo sira tan sala ne’e”.

Maromak Futar Lia.

 

Salmo Responsorial.                                                                                                                                              Sal. 109, 19-20. 21-22. 23

Refrão : Agradece ba Na’i tan Nia diak. Repete-se

Iha Horeb sira halo karau vaka oan osa-mean nian,

sira adora Maromak  falsu nebe sira halo;

Sira troca Na’i Nia glória, ho ílas karau vaka oan nian ida nebe han du’ut. Refrão

 

Sira haluha tiha Maromak nebé soi sira,

Maromak nebe halo kmanek oi-oin iha Egipto,

kmanek oi-oin iha rai Cam, biit wa’in tebes iha Tasi Mean. Refrão

 

Nia hakarak atu halakon sira, maibé Moisés,

ida nebe Nia hili teri netik; ko’alia housi sira,

Na’i hatun Nia hirus, sira hetan sadia hodi la mate mohu. Refrão

 

Aclamação

Refrão : Aleluia, Aleluia! Repete-se

                 Aman Maromak halo ita sai oan hakiak housi lialos, atu ita bele sai oan fudin iha Nia criatura hotu nia leet. Refrão

 

Evangelho                                                                                                                                                                                  Mt.13:31-35

+  Na’i Jesus Cristo Nia Evangelho nu’udar São Mateus haktuir

Iha tempo neba, Jesus haktuir tan aiknanoik ida ba sira: “Reino lalehan nian hanesan mustarda musan ida nebe ema kuda iha nia to’os. Musan ne’e kiik liu musan sira hotu; maibe boot mai, nia moris boot liu hotu, to’o sai aihun nebe manu sira lalehan nian mai hamahan an iha nia sanak sira.” Nia dehan tan aiknanoik seluk ba sira: “Reino lalehan nian hanesan fermento nebe feto ida kahur ho farina sasukat tolu, to’o nia sa’e didiak.” Buat ne’e hotu Jesus dehan ba ema lubun boot ho aiknanoik sira; la ho aiknanoik mak Nia la ko’alia ba sira. Nune’e buat nebe uluk profeta dehan sai tuir lolos duni: “Ha’u sei loke Ha’u ibun ho aiknanoik, Ha’u sei haklaken buat sira nebe subar houri mundo hahu.”

Lia Maksoyn.

Leave a Reply

Your email address will not be published. Required fields are marked *