shadow
Diocese de Dili > NOTÍCIAS > LETURA DIÁRIA > Terça Feira, XVII Semana Tempo Comum

Terça Feira, XVII Semana Tempo Comum

Ano A

 

Primeira Leitura                                          Ex. 33, 7-11;34, 5b-9. 28

Lia housi livro Êxodo

Iha loron hirak neba, hanesan bai-bain, Moisés foti sai tenda housi acampamento hodi ba hatur iha liur. Tenda ne’e naran “Tenda Hasouru Malu nian”. Ema nebe hakarak ko’alia ho Maromak, ba iha Tenda Hasouru Malu nian, nebe la dook housi acampamento. Wainhira Moisés sai atu ba Tenda, povo tomak hamrik. Ida-idak sei hamrik iha nia tenda nia odamatan rasik to’o Moisés tama tiha iha Tenda Hasouru Malu nian. Wainhira Moisés tama tiha iha laran, kalohan boot ida tun mai, hari-an iha Tenda nia odamatan no Na’i ko’alia ho Moisés. Povo tomak hare hetan kalohan ne’e, nebe hari-an hela iha odamatan oin Tenda Hasouru Malu nian. Ema tomak hamrik, ida-idak tuku tur ba rai iha nia tenda rasik nia odamatan. Na’i ko’alia ho Moisés oin ho oin, hanesan ema ida ko’alia ho nia belun ida. Tuir mai, Moisés fila fali ba acampamento, maibé Moisés nia ajudante be foin sa’e Josué, Nun nia oan, la sai housi tenda laran.  Moisés harohan ba Na’i Nia naran. Nune’e, Na’i liu iha Moisés nia oin hodi haklaken: “Na’i, Na’i mak Maromak ida laran luak no laran maus, la rai hirus, maibé laran kmanek no neon lós. Rai metin Nia laran kmanek ba ema rihun ba rihun. Perdua nafatin salan sira, maibé, hatene los ema nebé sala ho ema nebé la sala. Inan-aman nia salan monu ba oan sira leten, oan sira nia salan monu ba bei-oan sira leten to’o ba derasaan tolu no haat”. Moisés monu kekas ba rai hodi hakneak hakruuk to’o rai harohan, dehan: Ita Boot haré karik ha’u diak iha Ita Futar Oin, ne’e sa simu ha’u nia harohan, haraik tulun hodi la’o iha ami hotu nia leet. Tebes duni, ami povo ida sala na’in, maibé Na’i, perdua ami salan tomak; halo ami sai Ita lima rohan”. Moisés hela hamutuk ho Na’i iha fatin nebá; la han la hemu iha loron haat-nulu no kalan haat-nulu nia laran. Na’i hakerek iha ai-kabelak lia fuan sira Aliança nian: Ukun-fuan sira be sanulu.

Maromak Futar Lia.             

                                                                             

Salmo Responsorial.                                                                                                                              Sal. 102 (103), 6-7, 8-9, 10-11, 12-13

Refrão : Na’i laran-luak no laran maus! Repete-se

Na’i halo justiça, no tahan ema sira be kiak no terus todan.

Nia hatudu Nia dalan ba Moisés,

no Nia biit ba Israel oan sira. Refrão

 

Na’i laran diak no laran maus,

la rai hirus no laran diak tebes;

la si’ak bei-beik no la hatatan,

la rai hirus ba nafatin. Refrão

 

La haré ita tuir ita hahalok aat,

la selu ita tuir ita salan; hanesan lalehan dook liu housi rai,

nune’e Nia hatudu Nia laran luak ba sira be hamta’uk Nia. Refrão

 

Nu’udar  loro-sa’e dook housi loro-monu,

nune’e Nia hadook ita housi ita salan;

nu’udar aman ida hadomi nia oan sira,

nune’e mos Na’i hadomi sira be hamta’uk Nia. Refrão

 

Aclamação

Refrão : Aleluia, Aleluia! Repete-se

                 Fini mak Maromak futar-liafuan sira, Cristo mak kari fini.

                 Se mak buka hetan fini ne’e sei hela tinan ba tinan. Refrão

 

Evangelho                                                                                                                                                                                                   Mt. 13, 36-43

+  Na’i Jesus Cristo Nia Evangelho nu’udar São Mateus haktuir

Iha tempo nebá, husik tiha ema lubun boot ne’e, Jesus ba fali uma. Nia escolante hakbesik ba Nia hodi dehan: “Hanourin mai ami aiknanoik kona ba du’ut aat iha to’os.” Nia hatan ba sira: “Ida nebe kuda fini di’ak mak Oan Mane. To’os mak mundo. Fini di’ak mak reino nia oan sira. Funu baluk nebe kuda fini aat mak diabo. Loron koa nia mak loron ikus mundo ne’e nian. Sira nebe koa mak anjo sira. Ne’e duni, hanesan sira futu du’ut aat hodi sunu iha ahi, nune’e mos sei mosu uainhira mundo sei to’o nia rohan. Oan Mane sei haruka nia Anjo sira atu hasa’e tiha housi nia reino sira hotu nebe fo exemplo aat no sira hotu nebe halo aat, hodi soe sira ba ahi lakan; iha neba sira sei tanis no ruun nehan. Ema di’ak sira sei nabilan hanesan loron iha sira Aman nia reino. Ema nebe iha tilun, rona ba!”

Lia Maksoyn.

Leave a Reply

Your email address will not be published. Required fields are marked *