shadow
Diocese de Dili > NOTÍCIAS > LETURA DIÁRIA > Quinta Feira, XVII Semana Tempo Comum

Quinta Feira, XVII Semana Tempo Comum

Ano A

 

Primeira Leitura                                Ex. 40, 16-21, 34-39

Lia housi livro Êxodo

Iha loron hirak neba, Moisés hahu hala’o serbisu, no hala’o lolos buat hotu nebe Na’i haruka nia atu halo. Iha loron ida fulan uluk ba tinan dala rua nian, nia hari Tabernáculo nune’e: nia hahu ho nia hun, taka ai-kabelak mahar, hari ai-rin hodi tula ai travesaun iha leten. Tuir mai, nia nahe Tenda iha Tabernáculo nia leten, no tau housi leten Tenda nia hena, tuir Na’i haruka. Moisés kaer iha ai-kabelak Lei nian hatama iha Arca; nia hatama báculo sira iha Arca, iha Arca nia leten vaso osa mean nian. Tuir fali, nia lori Arca hatama iha Tabernáculo laran, atu hamahan Arca Lei nian, nia taka véu ida iha leten, tuir Na’i haruka. Hafoin, kalohan taka metin Tenda Hasouru Malu nian, no glória Na’i nian hakonu Tabernáculo. Moisés la bele tama iha Tenda hasouru Malu nian, tan kalohan hela iha nia leten no glória Na’i nian hakonu Tabernáculo. Wainhira kalohan housi Tabernáculo leten sa’e, Israel oan sira sai housi sira tenda hodi ba iha liur. Maibé, wainhira kalohan la sa’e, sira sei hein to’o kalohan ne’e sa’e, hafoin sira sai. Basá, iha loron, kalohan Na’i nian, taka Tabernáculo nia leten, iha fali kalan, áhi mak lakan iha nia laran, nebe leno Uma kain Israel nian tomak, housi fatin sira nebe sira hakarak la’o.

Maromak Futar Lia.

 

Salmo Responsorial.                                                                                                                                                        Sal. 84, 3. 4. 5-6ª. 8ª. 11

Refrão : Ita Nia templo kmanek tebes, Na’i, Lalehan no Rai nian. Repete-se

  1. Ha’u klamar neon sala, hodi hanoin Na’i nia kadunan; ha’u an tomak no ha’u isin haksolok iha Maromak moris. Refrão
  2. Manu sira lalehan nian hetan hela-fatin, Koá-lelok (andorinha) halo knu’uk ba nia oan sira; besik Ita altar, Na’i klibur funu-na’in nian, ha’u nia Liurai no ha’u nia Maromak. Refrão
  3. Ksolok ba sira nebe horik iha Ita uma, sira bele hahi Ita loron kalan. Ksolok ba sira be hetan biit iha Itaboot, sira la’o ba atu hare Maromak iha Sião. Refrão
  4. Loron ida iha Ita kadunan di’ak liu fali rihun ida dook housi Ita. Ha’u hakarak horik iha Na’i nia uma-labis, liu fali hela iha tenda ema sala na’in sira nian. Refrão

 

Aclamação

Refrão : Aleluia, Aleluia! Repete-se

                 Loke, Na’i, ami fuan atu simu futar liafuan housi Ita Oan Mane. Refrão

 

Evangelho                                                                                                                                                                                                 Mt. 13 ,47-53

+  Na’i Jesus Cristo Nia Evangelho nu’udar São Mateus haktuir

Iha tempo neba, Jesus dehan ba ema lubun boot: “Reino Lalehan nian hanesan dai ida nebe ema sóe ba tasi hodi dada ikan sira, kiik no boot. Nia nakonu ona, hakail na’in sira dada ba tasi ibun; tur tiha, sira hili ikan di’ak sira hodi tau hamutuk iha lafatik; ikan nebe aat, sira soe tiha. Sei sai mos nune’e uainhira mundo to’o ona nia rohan: anjo sira sei mosu hodi haketak ema aat sira housi ema di’ak sira. Hafoin sira sei soe ema aat sira ba ahi lakan manas: iha neba sira sei tanis no ruun nehan,” “Imi rona lolos buat hirak ne’e hotu?” Sira hatan: “Ami rona.” Nia dehan tan ba sira: “Tan ne’e, escriba sira nebe matenek kona ba reino lalehan nian hanesan uma nain ida nebe hasai buat foun no tuan housi nia rikusoi.” Hanourin hotu tiha ho aiknanoik sira ne’e, Jesus husik rai neba.

Lia Maksoyn.

Leave a Reply

Your email address will not be published. Required fields are marked *