shadow
Diocese de Dili > NOTÍCIAS > LETURA DIÁRIA > Sexta Feira, XVII Semana Tempo Comum

Sexta Feira, XVII Semana Tempo Comum

Ano A

 

Primeira Leitura                                Lv. 23, 1. 4-11. 15-16. 27. 27. 34b-37

Lia housi Livro Levítico

Na’i lia tun ba Moisés nune’e: “Loron festa Na’i nian mak hirak ne’e, loron assembleia santa nian, nebe iha nia tempo lolos, imi sei bolu hamutuk Israel oan sira: Iha loron sanulu resin haat, fulan ba dala uluk nian, molok rai atu kalan, sei celebra Páscoa hodi hahi Na’i; no iha loron sanulu resin lima fulan ne’e nian, imi sei halo Festa ba Pão Ázimo nian, hodi hahi Na’i. Iha loron hitu nia laran, imi sei han de’it pão la ho fermento. Iha loron ba dala uluk, imi sei iha assembleia santa ida: imi sei la halo serbisu todan. Iha loron hitu nia laran imi sei hasa’e sacrificio ksolok nian ba Na’i, housi áhi. Iha loron ba dala hitu, imi sei iha assembleia santa ida; imi sei la halo serbisu todan.” Na’i lia tun teni ba Moisés nune’e: “Ó ko’alia ba Israel oan sira hodi dehan nune’e: Wainhira imi to’o iha rai nebe Ha’u sei hatudu ba imi, iha ne’e, wainhira imi sohi hare eh batar, imi nia to’os nia fuan, nebe imi sohi ba dala uluk, imi sei lori futun ida-ida ba na’ilulik. Nia hasa’e ba Na’i, atu iha Na’i Nia Futar Oin Na’i bele haksolok ho imi. Na’ilulik sei hasa’e ba Na’i nune’e, iha loron be tuir sábado. Imi sei sura semana hitu lolos, hahu housi loron tuir sábado, iha loron nebe imi lori futun ai-han fulin mai hodi hasa’e ba Na’i. Imi sei sura to’o loron lima nulu, tuir loron sábado ba dala hitu, imi sei hasa’e tan sacrificio ba Na’i. Tuir buat hirak ne’e, iha loron sanulu ba fulan dala hitu, mak loron Hamos-an nian. Imi sei iha assembleia santa ida: imi sei halo penitência hodi hasa’e ba Na’i sacrificio ksolok nian housi áhi. Housi loron sanulu resin lima fulan ba dala hitu ne’e nian, iha loron hitu nia laran imi sei halo Festa Tenda nian hodi hahi Na’i.  Iha loron ba dala uluk imi sei iha assembleia santa ida:  imi sei la halo serbisu todan ida. Iha loron hitu nia laran, imi sei hasa’e ba Na’i sacrificio ksolok nia housi áhi. Iha loron ba dala walu imi sei iha assembleia santa ida: imi sei hasa’e ba Na’i sacrificio ksolok nian housi áhi. Loron ne’e mak loron ikus liu ba assembleia: imi sei la halo serbisu todan iha loron ne’e. Sira ne’e mak loron santa ba Na’i, iha nebe imi sei halibur malu halo assembleia santa sira, atu hasa’e ba Na’i sacrificio ksolok nian housi áhi, sacrificio ho balada sira, sacrifício hasa’e pão no tua nian, no sacrificio selu-seluk tan, tuir cerimónia loron ida-idak nian.

Maromak Futar Lia.

 

Salmo Responsorial.                                                                                                   Sal. 81, 2-4. 5-6ab. 10-11ab

Refrão : Hahi Maromak ba, basá, Nia ita tulun na’in. Repete-se

  • Haksolok iha Maromak basá Nia ita kbiit, hahi Jacob nia Maromak ba; hahi no hananu hodi harpa no lira nia lian iha loron sira festa nian. Refrão
  • Nu’udar Lei ida ba Israel, ukun fuan ida Maromak Jacob nian, nu’udar ordem ida nebe Nia fo ba José, wainhira sai housi rai Egipto nian. Refrão
  • Ó sei la iha tan Maromak seluk ida, ó sei la adora tan Maromak seluk ida; Ha’u mak Na’i, ó nia Maromak, nebe halo ó sai housi rai Egipto. Refrão

 

Aclamação

Refrão : Aleluia, Aleluia! Repete-se

 

Evangelho                                                                                                                                           Mt. 13, 54-58

+  Na’i Jesus Cristo Nia Evangelho nu’udar São Mateus haktuir

Iha tempo neba, Jesus fila ba Nia rain hahu hanourin ema sira nebe iha sira nia sinagoga; ema hotu rona Nia ho hakfodak hodi dehan: “Matenek nebe Nia iha no milagre nebe Nia halo, Nia simu housi nebe?  Laos Nia mak badaen ai nia oan? Laos Nia Inan mak naran Maria?  Laos nia maun-alin sira mak naran Tiago, José, Simão no Judas?  Nia feton sira la hela hotu iha ita nia leet ne’e?  Nune’e, buat hirak ne’e hotu Nia simu housi nebe?  Sira hotu laran moras hasoru Nia. Maibé, Jesus dehan ba sira: Profeta ida ema sei la simu diak iha nia rain no iha nia uma rasik”.  Iha neba Nia la halo milagre barak tan ema sira nebe, fiar la dun iha.

Lia Maksoyn.

Leave a Reply

Your email address will not be published. Required fields are marked *