shadow
Diocese de Dili > NOTÍCIAS > Notícias > Inan Ida Hatudu Nia Preucupação Laos ho Nia Interesse Maibé ho Oan Nia Interesse

Inan Ida Hatudu Nia Preucupação Laos ho Nia Interesse Maibé ho Oan Nia Interesse

DCDD – DILI – 16/07/2017 D. Virgilio do carmo da silva, SDB haklaken lia hirak ne’e iha nia reflexão relaciona ho Festa Padroeira Nossa Senhora do Carmo Letefoho. Bibi tana ne’e hateten: Ohin ita celebra Nain Feto do Carmo nia festa, ita hanoin kona ba inan ida nia papel, inan ida nebé iha fuan nebé boot, hatudu nia preucupação laos ho nia interesse maibé ho Oan nia interesse. Atitude ida ne’e hanourin mos Mama sira ohin loron nian precisa atu hakiak. Inan sira ohin loron nian precisa hare ba Nain Feto nia virtude. Ohin loron família barak hetan crize, problema no dificuldade tamba fen ka inan ladun halo sira nia papel nudar inan didiak. Nain Feto Continua Sai Modelo ba Inan Sira liu-liu inan ida nebé iha capacidade atu sai abilidade atu servi oan sira nia necessidade. Dalabarak oan sira dada-an housi família laos inan ho aman la tau matan, maibé dalaruma sente atenção Papa no Mama nian falta iha família tan apa no mama sibuk liu buka osan tun sae tan ne’e dala ruma oan sira la sente papa no mama sira nia domin. Domin ne’e la sukat ho osan, maibé oan sira precisa ema atu comprende sira, precisa inan-aman sira atu rona sira no lao hamutuk ho sira.

Ita Nain Feto concretiza Nia domin ida ne’e ba ema nebé kabenain sira ia festa casamento iha Caná Galileia nian. Tamba domin ida ne’e ita Nain Feto fo atenção ba  ema seluk nia necessidade, Nia iha abilidade atu servi. Nain Feto sente necessidade ema seluk nian. Ida ne’e mak dehan domin katak fo buat nebé ita nian, hasai ita nia força rasik, ita nia tempo rasik, ita nia recurso rasik ida ne’e mak dehan domin. Se ita mak iha Nain Feto nia fatin ita bele descobre buat nebé Nain Feto descobre galae? Buat nebé halo ita admira iha evento ida ne’e mak Jesus nia Inan de’it mak nota katak kabenain hirak ne’e Tua laiha ona. Ida ne’e buat ida ema la hein maibé importante. Nain Feto hein solução ruma hodi comfia Jesus nia diak. Nain Feto continua hanorin ita atu pacência hodi hatene hein. Dala hira mak ita hakarak buat hotu lalais, wainhira ita harohan ita hakarak buat nebé lalais tamba lakon pacência. Ida ne’e bele deha ema nia fiar ne’e superficial, fiar ladun klean. Fiar ida ne’e hakarak haré kedas milagre fiar nebé lalos maibé fiar nebé los precisa hein, precisa terus, fiar nebé los precisa hein ho pacência.

Mahein ne’e hatutan tan: Ema ida-idak haré fila fali ba nia moris pessoal, moris família nian, moris Comunidade nian, ema ida-idak sei sente katak Maromak iha Nia liman fatin iha ha’u nia moris, iha família no Comunidade. Ida ne’e mak razão ohin lori ita mai iha ne’e. Tamba domin ida ne’e mak ohin ita rona mos laos de’it domin ida ne’e mak ohin ita sente iha Letefoho ida ne’e. Foin dadaun ita concretiza actos nebé concreto liu tan iha ita nia maluk sira hahú housi Madre sira nia renovação voto ohin sira halo iha ita nia oin hodi renova sira nia voto, sira nia consagração bolu nebé Na’i Maromak fo ba sira. Maromak mos bolu ita atu sai animadores iha comunidade sira, atu ba haklaken Bíblia, atu servi Paróquia ida ne’e liu housi Conselho Pastoral, ida ne’e missão ida ne’e laos hakarak de’it. Balu dalaruma lakohi maibé wainhira Maromak bolu ita hakfodak. Então ne’e hatudu katak domin ida Maromak nia ne’e laos buat ida nebé iha mehi de’it maibé ohin ita bele koko experência ida ne’e. Domin ida ne’e ita ida-idak iha ita nia família, iha comunidade lor-loron Maromak hadomi ita no bolu ita. Ne’e atu dehan bainhira mak ita sente Maromak bolu ha’u! Dader quando ó hader ne’e katak Maromak hadomi ó tan ne’e ó moris, fo hikas is ne’e ba ó. Experência koko fila fali Maromak nia domin ida ne’e is nebé Maromak fo no continua fo mai ita lor-loron no bolu ita atu continua renova ita nia-an e bolu ida ne’e hanesan Abrão sente ida ne’e, São Paulo mos ohin dehan iha Segunda Leitura: Maromak tamba domin boot ida ne’e mai ita Nia lakohi halo ita ne’e sente de’it hanesan Abrão Nia bolu e lao ba! Maromak mos hakarak ita sente Nia nudar Aman ida iha Lalehan nebé tau matan mai ita. Ho ida ne’e mak comvida ita atu sente liu tan papel ita ida-idak nian iha Maromak nia futar oin. (Janu)

Leave a Reply

Your email address will not be published. Required fields are marked *