shadow
Diocese de Dili > NOTÍCIAS > LETURA DIÁRIA > Segunda Feira, XVIII Semana Tempo Comum

Segunda Feira, XVIII Semana Tempo Comum

Ano A

 

Primeira Leitura                             Nm. 11, 4b-15

Lia housi livro Números nian

Iha loron hirak neba, Israel oan sira hateten nune’e: “Se mak sei fo na’an mai ita atu han? Ita hanoin hetan fila fali ikan nebe ita han ‘de graça’ de’it iha rai  Egipto; pepino, pateka, lis no lis-asu la susar ba ita! Oras ne’e, ita susar ba buat hotu! La iha buat ida iha ne’e! Iha de’it mak maná!” Maná ne’e hanesan coentru musan eh atu hare hanesan goma-ai-ben. Povo ida-idak sai atu hili; hafoin, dulas rahun eh fai rahun; tuir mai te’in hodi halo bolo. Midar hanesan dosi be halo ho mina. Kalan, wainhira maha-wen monu iha acampamento, monu mos maná. Moisés rona povo tanis, ida-idak iha nia família, iha odamatan tenda nian. Maromak Nia castigo boot tebes, halo Moisés neon sala. Nune’e, Moisés hasa’e lia ba Na’i, dehan: “Tan sa Ita halo terus Ita atan? Tan sa Ita la hare hodi tau povo ne’e iha ha’u liman? Povo ne’e ha’u mak kou’us? Ha’u mak halo moris povo ne’e atu Ita Boot halia mai ha’u: ‘Kele nia didiak, hanesan inan hakiak ida kele kosok-oan ida, to’o iha rai nebe Ha’u hakotu nanis ona ho jurameneto, ba nia bei-ala sira?’ Ha’u sei ba hetan na’an iha nebe atu fo ba povo ne’e hotu? Tan sira mai tanis iha ha’u oin hodi dehan mai ha’u: ‘Fo na’an mai ami atu han’. Ha’u mesak sei la bele halo buat ida ba povo ne’e: ne’e todan tebes mai ha’u. Ita hakarak fo todan ne’e mai ha’u karik, ne’e sa, diak liu halo ha’u mate tiha; ha’u monu karik ba Ita matan, halo, atu ha’u la hare tan terus ne’e”. 

Maromak Futar Lia.

      

Salmo Responsorial                                                                                                                                                                Sal. 81, 12-17

Refrão :  Haksolok iha Maromak, Nia ita tulun. Repete-se

  1. Ha’u Nia povo la rona Ha’u lian, Israel la halo tuir Ha’u Nia lia fuan; tan ne’e Ha’u saran sira ba sira fuan tos, husik sira tuir sira nia hakaran. Refrão
  2. Oh! Ha’u Nia povo rona karik Ha’u, Israel tuir karik Ha’u dalan: sira nia funu baluk sira sei hakru’uk ba sira, Ha’u Nia liman sei mai hasouru sira funu baluk sira. Refrão
  3. Ema sira nebe la hatene Na’i sei hahi nia, nia moris sei tuba rai metin nafatin; Ha’u sei fo han nia ho aihan diak nian, Ha’u sei fo hemu nia ho wani-wen foho nian. Refrão

 

Aclamação

Refrão : Aleluia, Aleluia. Repete-se

                  Ema la moris de’it ho aihan, maibe ho liafuan

                  sira nebe sai housi Maromak futar ibun. Refrão

 

Evangelho                                                                                                                                                                                       Mt. 14, 13-21

+  Na’i Jesus Cristo Nia Evangelho nu’udar São Mateus haktuir

Iha tempo neba, rona tiha katak ema óho ona João Baptista, Jesus sa’e mesak ba ró, ida hodi ba mesak iha rai fuik maran: maibé hatene tiha ne’e, ema lubun boot husik cidade hodi la’o tuir buka Nia. Tun housi ró hodi hare ema barak ne’e, Nia hanoin teb-tebes sira, hodi fo isin diak ba sira nebe moras. Loraik daudaun ona, escolante sira hakbesik ba Nia hodi dehan: “Fatin ne’e rai fuik, no kalan besik ona; haruka ema sira ne’e ba ona, atu sira bele sosa ai-han iha knua sira”. Nune’e Jesus dehan ba sira: “Sira lalika ba; imi rasik fo han sira ba.” Sira hatan ba Nia: “Ami iha de’it pão fuan lima no ikan rua.” Lori sira mai,” Nia dehan. Hafoin Nia haruka ema lubun boot tur iha du’ut leten, Nia kaer pão fuan lima no ikan rua ne’e, foti matan ba Lalehan hodi fo bensa. Tuir mai Nia silu pão sira ne’e hodi fob a escolante sira; hafoin sira fahe ba ema lubun boot. Sira hotu han to’o bosu; baluk sira nebe resin, sira tau ba luhu sanulu resin rua nakonu! Ema sira nebe han hamutuk mane rihun lima, la sura feto no labarik sira.

Lia Maksoyn.

Leave a Reply

Your email address will not be published. Required fields are marked *