shadow
Diocese de Dili > NOTÍCIAS > LETURA DIÁRIA > Terça Feira, XVIII Semana Tempo Comum

Terça Feira, XVIII Semana Tempo Comum

Ano A

Primeira Leitura                                Nm. 12, 1-13

Lia housi livro Números nian

Iha loron hirak neba, Maria ho Aarão hateten aat Moisés, tan de’it nia kaben, feto housi Etiópia. Tebes duni, nia kaben ho feto Etiópia ida. Sira dehan: “Ba Moisés de’it mak Na’i ko’alia? La ko’alia mos ba ita?” Na’i rona hela sira ko’alia. Moisés, ema ida nebe haraik-an teb-tebes; iha rai ne’e, la hetan ema ida nebe haraik-an hanesan nia. Teki-tekir, Na’i dehan ba Moisés, Aarão no Maria: “Imi na’in tolu mai iha Tenda Hasouru Malu nian.” Sira na’in tolu ba. Nune’e, Na’i tun mai housi riin kalohan nian ida hodi hela iha Tenda nia odamatan. Hafoin bolu Aarão ho Maria, sira na’in rua hakbesik ba Na’i. Na’i dehan ba sira: “Imi rona didi’ak Ha’u Nia liafuan ba: Iha karik imi leet profeta ruma, Ha’u hatudu Ha’u-an ba nia hanesan mehi ida, eh ko’alia ho nia iha mehi ida. Maibe, Ha’u la halo nune’e ho Ha’u Nia atan Moisés: Nia ema ida nebe Ha’u tau neon; nia ema housi Ha’u nia uma laran rasik. Ba nia, Ha’u ko’alia oin ho oin, hare ho matan rasik, la hodi mehi; Nia hare Na’i nia lalatak rasik! Tansa imi la ta’uk ko’alia hasouru Ha’u atan Moisés?” Na’i hatudu Nia hirus hasouru sira na’in rua. Hafoin, Na’i fila hikas fali wainhira kalohan hadook-an housi tenda. Iha oras ne’e kedas, Maria hetan moras lepra, halo nia isin tomak mutin hanesan neve. Aarão fila ba Maria, hare ba katak nia hetan ona moras lepra.  Nune’e, Aarão dehan ba Moisés: “Ha’u Na’i, sadi’a ami: Keta hamonu sala ne’e mai ami leten, basa, ami halo tan ami beik, atu nia keta sai hanesan kiik-oan ida nebe moris mai housi nia inan nia knotak mate uluk tiha ho isin dodok”. Nune’e, Moisés harohan ba Na’i hodi dehan: “Na’i, sadi’a Ita atan, fo ba nia isin di’ak ba”. 

Maromak Futar Lia.

 

Salmo Responsorial                                                                                                                         Sal. 51, 3-4. 5-6ª. 6bc-7, 12-13

Refrão : Na’i, ami sala duni, sadi’a ami. Repete-se

Na’i sadi’a ha’u, tan Ita laran-luak,

tan Ita laran di’ak tebes,

kasu ha’u salan! Fase ha’u aat tomak,

hamos ha’u salan hotu. Refrão

 

Ha’u hatene katak ha’u sala,

ha’u sala iha hela ha’u oin.

Na’i, ha’u sala hasouru Ita,

ha’u halo sala iha Ita oin. Refrão

 

Nune’e, Ita tesi lia mai ha’u tuir justisa,

no Ita Nia tesi tuir lialos.

Tanba ha’u moris mai ho sala,

ha’u inan be sala na’in kous ha’u. Refrão

 

Hakiak iha ha’u, Na’i, fuan mos ida,

hafoun iha ha’u klamar, biit foun ida.

Keta soe ha’u dook housi Ita futar oin,

keta hadook housi ha’u, Ita espirito santidade. Refrão

 

Aclamação

Refrão : Aleluia, Aleluia Repete-se

                 Na’i, Ita mak Maromak nia Oan Mane, Ita mesak Israel nia Liurai. Refrão

 

Evangelho                                                                                                                                                                                 Mt. 14:22-36

+  Na’i Jesus Cristo Nia Evangelho nu’udar São Mateus haktuir

Iha tempo neba, Jesus haruka escolante sira sa’e ró hodi ba uluk tasi sorin ba; Nia fali haruka ema lubun fila ba uma. Haruka tiha sira ba uma, Nia sa’e ba foho atu harohan mesa-mesak. To’o kalan, Nia mesak de’it iha neba. Ró fali kilometro ruma ona iha tasik klaran, laloran baku maka’as, basa anin huu hasouru. To’o kalan fahe ba haat, Nia hakbesik ba sira hodi la’o iha tasi leten. Hare tiha Nia la’o iha tsi leten, escolante sira ta’uk hodi dehan: “Rai na’in ida!” Sira hakilar ho ta’uk. Jesus ko’alia kedas ba sira dehan: “Hakmatek ba! Ha’u mak ne’e: keta ta’uk!” Ne’e duni Pedro hatan dehan: “Na’i, Itaboot mak neba karik, haruka ha’u ba to’o Itaboot housi laloran leten.” Ne’e duni, Jesus simu: “Mai!” Pedro tun housi ró hodi la’o iha laloran leten atu ba to’o Jesus. Maibe, hare anin huu maka’as, nia ta’uk hodi hahu mouut. Nia hakilar. “Na’i, soi ha’u!” Jesus lolo liman kedas ba nia hodi kaer nia dehan: “Ema fiar kiik, tansa ó laran namlele?” Sira tama tiha bar ó laran, anin maus tiha. Sira nebe iha ró laran monu iha Jesus nia ain hodi dehan: “Tebes duni, Itaboot Maromak nia Oan Mane.” Hakur tiha tasi, sira tun ba rai Genesaré. Hatene tiha Nia, ema sira rai neba nian ba fo hatene ba maluk sira iha fatin hotu. Sira lori ba Nia moras sira hotu, hodi husu ba Nia atu husik netik sira kona nia tais ninin. No sira nebe kona, hetan isin di’ak.

Lia Maksoyn.

Leave a Reply

Your email address will not be published. Required fields are marked *