shadow
Diocese de Dili > NOTÍCIAS > LETURA DIÁRIA > Quarta Feira, XVIII Semana Tempo Comum

Quarta Feira, XVIII Semana Tempo Comum

Ano A

 

Primeira Leitura                                                   Nm. 13, 1-2. 25-12; 1. 26. 34-35

Lia housi Livro Números

Iha loron hirak neba, Na’i hateten ba Moisés, iha rai fuik maran Parã nian: “Haruka ema balun ba hare rai Canaã, nebe Ha’u sei fo ba Israel oan sira. Imi sei haruka ema ida housi imi nia uma-kain ida-idak, nebe matenek tebes iha sira leet”. Liu tiha loron hatnulu, ema sira ne’e fila fali mai, wainhira sira hare didi’ak tiha rai neba. To’o mai, Sira ba hasouru Moisés, Aarão no comunidade tomak Israel nian iha Cades, iha rai fuik maran Parã nian. Sira fila housi rai neba ho aihan oi-oin no buat selu-seluk tan, hodi hatudu ba comunidade tomak. Sira haktuir nune’e ba Moisés: “Ami ba rai nebe ita haruka ami ba; tebes, iha neba suli duni susu-uen no uani-uen, no ami lori aifuan housi rai neba nian mak ne’e. Maibe, povo nebe moris iha rai neba iha biit, sira nia cidade sira mesak bobo’ot de’it, soldado sira hein metin cidade hirak ne’e. Iha neba, ami hare mos Anac nia bei-oan sira; amalecita sira horik iha rai Negueb; hitita sira, Jebuseu sira no amorreu sira horik iha foho, no cananeu sira hela besik tasi no iha mota Jordão nia sorin-sorin”.  Hafoin, Caleb haruka ema hotu nonok tiha iha Moisés nia oin, hodi dehan: “Ita sa’e ba, hodi hadau tiha rai ne’e; ita bele hasai tiha rai ne’e mai ita”. Maibe, ema sira be ba hamutuk ho nia, dehan: “Ita la bele ba funu hasouru povo ne’e, basa, nia biit maka’as liu tiha”.  Sira hahu haktuir buat aat kona ba rai nebe sira hare hodi dehan ba Israel oan sira”  “Rai nebe ami ba hare, rai ne’e tolan nia emar sira; ema hotu nebe ami hare iha neba mesak ema ain aas de’it. Ami hare iha neba gigante sira derasan Anac nia, nebe rasa gigante sira nian Ami hare ba ami-an rasik hanesan klala’ek sira. Nune’e mos sira hare ami hanesan klala’ek sira iha sira oin”. Nune’e, comunidade tomak hahu hakilar ho lian maka’as, no povo tanis iha kalan ne’e tomak. Na’i lia tun ba Moisés no Aarão nune’e: “To’o wainhira los mak Ha’u bele tahan ema laran aat sira ne’e, no sira nebe hamúu hasouru Ha’u? Ha’u rona Israel oan sira nia hamúu hasouru Ha’u. Tan ne’e, ó ba dehan ba sira: ‘Tebes duni, hanesan Ha’u moris Na’i futar lia nune’e, Ha’u sei halo ba imi, tuir buat nebe imi hato’o mai Ha’u tilun. Imi hotu nebe tau ona naran iha livro arrolamento nian ho tinan ruanulu ba leten, nebe hamúu hasouru Ha’u, sei mate hotu iha rai fuik maran ne’e. Imi ba hare rai neba hamutuk loron hatanulu nia laran. Imi ba hare rai neba hamutuk tinan ida. Nune’e, imi sei terus iha tinan hatnulu nia laran, tan imi nia nia salan nia todan; nune’e mak imi sei hatene oinsa Ha’u sei fo castigo ba imi. Ha’u mak Na’i nebe ko’alia:  Nune’e mak Ha’u sei fo castigo ba comunidade aat nebe hamriik hasouru Ha’u. Sira sei sai mohu iha rai fuik maran ne’e; sira sei mate hotu iha ne’e”.

Maromak Futar Lia.

 

Salmo Responsorial                                                                                              Sal. 106, 6-7ª 13-14. 21-22. 23         

Refrão :  Hanoin ami, Na’i, tan Ita domin ba Ita povo. Repete-se

  1. Ami sala hanesan ami aman sira, ami halo buat aat no la tuir Ita hakaran. Iha rai Egipto, ami aman sira la hatene tuir Ita nia hahalok kmanek sira. Refrão
  2. Lalais sira haluha Ita hahalok sira, la fo laran ba Ita hahalok kmanek sira. Sira tenta Maromak iha rai fuik maran, hodi sira nia ka’an, sira koko Maromak. Refrão
  3. Sira haluha tiha Maromak nebe soi sira, halo buat kmanek oi-oin iha Egipto, buat kmanek oi-oin iha rai Cam, halo buat foun iha Tasi Mean. Refrão
  4. Hakotu tiha ona lia atu hamohu sira, maibe, Nia atan Moisés tau netik nia-an iha klamar; harohan housi sira hodi hamamar Na’i Nia laran, sira la mate, sira la lakon. Refrão 

 

Aclamação

Refrão : Aleluia, Aleluia; Repete-se

                 Profeta boot ida mosu tiha iha ita nia leet: Maromak mai hare tiha Nia povo. Refrão

 

Evangelho                                                                                                                                    Mt. 15:21-28

+  Na’i Jesus Cristo Nia Evangelho nu’udar São Mateus haktuir

Iha tempo neba, Sai tiha housi neba, Jesus liu ba rai Tiro no Sidonio nian. Iha oras neba feto cananeia ida nebé mai housi rai neba hahu hakilar dehan: “Na’i, David nia Oan, sadi’a ha’u:  diabo fo terus boot ba ha’u nia oan feto.” Maibe Nia la hatan lia fuan ida. Escolante sira hakbesik ba Nia hodi husu: “Hatan tiha ba nia ba, basa nia hakilar beik-beik tuir ita.” Nia hatan: “Ha’u mai de’it ba bibi sira nebelakon housi umakain Israel nian.” Maibe feto ne’e mai hakneak iha Nia oin dehan: “Na’i, tulun ha’u!” Nia simu: “La di’ak hasai oan sira nia aihan hodi soe fali ba asu oan sira!” Feto ne’e dehan fali: “Ne’e los duni, Na’i; maibe asu oan sira mos han etu mumun nebe monu housi sira na’in nia mesa.” Jesus hatan ba nia: “Feto, ó nia fiar boot tebes! Halo duni tuir ó hakarak ba.” Iha ora neba, nia oan feto hetan fali isin di’ak.

Lia Maksoyn.

Leave a Reply

Your email address will not be published. Required fields are marked *