shadow
Diocese de Dili > NOTÍCIAS > LETURA DIÁRIA > Sabado, XVIII Semana Tempo Comum

Sabado, XVIII Semana Tempo Comum

Ano A

 

Primeira Leitura                                Dt. 6, 4-13

Lia housi livro Deuteronómio

Moisés dehan ba povo nune’e: “Israel, rona mai! Na’i, ita nia Maromak, Nia de’it mak Na’i; ó sei hadomi Na’i, ó nia Maromak, ho neon ho laran tomak, ho ó nia kbiit hotu. Ó sei rai metin didi’ak iha ó nia fuan lia nebe ohin ha’u fo hatene sai ba ó. Ó sei hanourin ba ó nia oan sira, no ko’alia kona ba lia hirak ne’e, wainhira tur iha uma, eh la’o tuir luron, wainhira toba eh wainhira hader. Ó sei kesi metin iha ó liman nu’udar sinal ida, ó sei hakerek hodi halo metin iha ó nia uma tatis no iha ó nia odamatan sira. Na’i, ó nia bei-ala sira, Abraão, Isaac no Jacob,  jura atu fo ba ó;  ó sei hetan cidade sira mesak boot no furak nebe ó la kole halo; uma sira ho sira nia riku-soi oi-oin nebe ó la gasta buat ida hodi sosa; ó sei hetan wé matan nebe ó la ke’e, ó sei hetan to’os uvas no oliveira nian nebe ó la kuda; ó sei han bosu to’o sai baruk! Iha oras ne’e,  ó sei neon moris no matan moris; keta haluha Na’i; Nia mak hasai ó housi rai Egipto, housi uma atan nian. Ba Na’i, ó nia Maromak, mak ó sei hamta’uk, ba Nia de’it ó serbi, hodi Nia naran mak ó sei jura”.

Maromak Futar Lia.

 

Salmo Responsorial.                                                                                                                              Sal. 18, 2-3. 7. 47. 51ab

Refrão : Na’i ha’u hadomi Ita boot, Ita boot mak ha’u kbiit. Repete-se

Na’i ha’u hadomi Itaboot!

Itaboot mak ha’u biit,

ha’u tulun nebe tahan ha’u,

Itaboot ha’u mahein nebe soi ha’u. Refrão

 

Ha’u nia Maromak, ha’u horik fatin,

ha’u subar fatin no ha’u biit salvasaun nian!

Ha’u harohan ba Na’i, ha’u nia Maromak,

Ha’u sei la hetan buat aat housi ha’u funu baluk sira. Refrão

 

Viva ha’u Na’i! Rahun di’ak ba nafatin!

Maromak ha’u Maksoy manan.

Nia haraik ba liurai vitória boot tebes,

Nia laran metin ba Nia atan santo. Refrão

                                      

Aclamação

Refrão : Aleluia, Aleluia. Repete-se

                Jesus Cristo, ita nia Maksoy, halakon mate;

               Nia halo moris nabilan housi Evangelho. Refrão    

 

Evangelho                                                                                                                                                                            Mt. 17, 14-20

+  Na’i Jesus Cristo Nia Evangelho nu’udar São Mateus haktuir

Iha tempo neba, wainhira Jesus mai hasouru ema lubun boot, mane ida hakbesik ba Nia, hakneak iha Nia oin hodi dehan: “Na’i, sadia netik ha’u nia ona mane, basa nia moras bibimate hodi terus teb-tebes. Nia mosu fila fila ba ahi no mos ba be. Ha’u lori ona nia ba nia escolante sira no sira la bele halo nia sai di’ak.” Jesus hatan dehan: “Imi ema fiar laek, ema laran aat! Ha’u sei hamutuk ho imi to’o wainhira los? To’o wainhira los Ha’u sei tahan imi? Lori nia mai!” Jesus ko’alia ba nia hodi si’ak, no diabo sai tiha housi nia. Houri oras ne’e larbarik sai di’ak kedas. Tuir mai escolante sira hakbesik ba Jesus mesa-mesak hodi husu ba Nia: “Tansa mak ami la bele duni sai nia?” Nia hatan: “Tanba imi nia fiar kiik. Tebes, Ha’u dehan ba imi: imi nia fiar hanesan mostarda musan ida karik, imi sei dehan ba foho ne’e, ‘Book ó an housi ne’e ba neba’, no nia sei book an duni; buat ida sei la susar ba imi”.

Lia Maksoyn.

Leave a Reply

Your email address will not be published. Required fields are marked *