shadow
Diocese de Dili > NOTÍCIAS > LETURA DIÁRIA > Segunda Feira, XIX Semana Tempo Comum

Segunda Feira, XIX Semana Tempo Comum

Ano A

 

Primeira Leitura                             Dt. 10, 12-22

Lia housi Livro Deuteronómio

Iha loron hirak neba, Moisés hateten nune’e ba povo: “Oras ne’e, Israel, sa mak Na’i, ó nia Maromak husu ba ó? Atu ó hamta’uk Na’i, ó nia Maromak, la’o tuir Nia iha Nia dalan sira, hadomi Nia, serbi Nia ho ó nia fuan no klamar tomak. Ó sei moris tuir lolos Na’i Nia Ukun fuan no Nia Lei sira, nebe ohin ha’u fo sai ba ó, atu ó bele hetan rahun diak. Buat hotu iha aas Lalehan, Rai, no buat hotu nebe iha Rai, Na’i, ó Maromak Ninian. Maibé, ba ó nia bei-ala sira de’it mak Na’i hatudu Nia domin; tuir sira, Na’i hili imi be nia oan sira, housi povo hotu-hotu nia leet nu’udar ohin loron ita hare. Nune’e, imi halakon buat nebe aat housi imi fuan, husik imi nia ulun tos, basá, Na’i, imi nia Maromak, mak Maromak hotu-hotu nia Na’i, Maromak Liurai no kbiit na’in, nebe la fihir ema, Nia la monu ba riku soin.  Nia tahan oan kiak no feto faluk sira nia direito, hadomi ema la’o rai sira nebe Nia fo pão no hatais. Imi sei hadomi ema la’o rai sira, basá, uluk imi mos hanesan iha rai Egipto nian. Maibé, ó sei hamta’uk no serbi de’it ba Na’i, ó nia Maromak; ó sei hakarak de’it mak Nia, hodi Nia naran mak ó sei jura. Ba Nia mak ó sei hahi: Nia mak ó nia Maromak!  Nia mak halo kmanek oi-oin nebe ó hare. Wainhira tama iha rai Egipto,  ó nia bei-ala sira hitunulu mak tama; maibé, Na’i, ó nia Maromak, halo imi sai wa’in tebes, hanesan fitun sira iha lalehan”.

Maromak Futar Lia.       

                                                                                   

Salmo Responsorial                                                                                   Sal. 147, 12-13. 14-15. 19-20

Refrão : Jerusalém, hahi ó nia Na’i. Repete-se

                     Hakmatek mai ó nia rai-keta,

                     Nia fo han ó ho trigu diak;

                      haruka mai rai Nia lia fuan,

                      Nia lia menon nakonu lalais rai hotu. Refrão

 

                       Hatudu Nia hakaran ba Jacob,

                        Nia Lei ba Israel;

                         la hare diak povo seluk ida hanesan ne’e,

                         Nia la fo hatene Ninia hakaran ba ema seluk. Refrão

 

Aclamação.

Refrão : Aleluia, Aleluia. Repete-se

                  Fo glória ba Na’i, Jerusalém; Sião, hahi ó nia Maromak!

                  Nia fo kbiit ba ó nia odamatan, haraik bensa ba ó nia oan sira Lori. Refrão

 

Evangelho                                                                                                                             Mt. 17, 21-26 (22-27)

+  Na’i Jesus Cristo Nia Evangelho nu’udar São Mateus haktuir

Iha tempo neba, Jesus ho Nia escolante sira halibur-an hela iha Galileia. Jesus dehan ba sira: “Sei saran Mane Maksoyn ba ema sira liman. Sira sei óho Nia, maibé, liu tiha loron tolu Nia sei moris hi’as housi mate”. Escolante sira rona tiha lia hirak ne’e, sira neon sala teb-tebes. Wainhira sira to’o iha Cafarnaum, ema sira nebe kobra imposto, ba besik Pedro hodi husu ba nia: “Imi nia Mestre la selu imposto”? Pedro hatan ba sira: “Nia selu”! Wainhira to’o iha uma, Jesus hahu husu ba Pedro: “Simão, ó hanoin oin sá? Liurai sira housi Rai ne’e, simu imposto housi se los? Housi oan sira eh housi ema rain seluk”? Tan nia hatan katak housi ema rain seluk, Jesus dehan teni ba nia:  “Nune’e, oan sira la iha obrigasaun atu selu! Maibé, atu keta fo exemplo aat ba sira, ó ba iha tasi hodi soe kail. Ikan nebe ó hakail ba dala uluk, ó sei hetan osan ida. Káer iha oasn ne’e hodi ba selu Ha’u nia ho ó nia imposto iha ema nebe kobra imposto.”

Lia Maksoyn.

Leave a Reply

Your email address will not be published. Required fields are marked *